Newcastle Klúbburinn á Íslandi

Ivor J. Allchurch

Fæddur: 16.10.1929
Staður: Swansea
Hjá NUFC: 1958-62
Staða: Sóknarmaður
Hæð: 185 cm
Deildarleikir/Mörk: 153/47
1958-59: 26/16
1959-60: 41/14
1961-62: 36/7
1962-63: 40/10
FA Cup: 8/4
League Cup: 3/1
Alls með Magpies: 164/52

Ivor John Allchurch getur talist í hópi með bestu framherjum Newcastle. Hann byrjaði að nema sparkfræðin hjá ungmennaliði Plesmark en gekk til liðs við Swansea Town í maí 1947. Meðan hann gegndi herþjónustu var hann hjá Shrewsbury Town en að því loknu hélt hann aftur heim til Swansea.

Það var svo í október 1958 að Newcastle keypti Allchurch á 28.000 pund. Þá þegar hafði Ivor vakið gríðarlega athygli fyrir frammistöðu sína með Swansea og landsliði Wales. Og byrjunin með Magpies var glæsileg. Hann lék fyrst á heimavelli gegn Leicester 11. október og skoraði tvö marka liðsins í 3-1 sigri. Hann sló því svo sannarlega í gegn í sínum fyrsta leik og var reyndar illstöðvandi út tímabilið.

Í raun má kannski segja að þetta fyrsta tímabil Ivors hafi verið hans besta með Newcastle. Liðið átti í óttalegu basli á þessum árum og féll í 2. deild vorið 1961. Það tímabil skoraði Ivor mark í þremur fyrstu umferðum FA bikarsins en liðið féll svo út í fjórðu umferð (6. umferð). Vafalaust var ætlunin að komast beint upp á ný vorið 1962 en það gekki ekki. Ivor var svo seldur um sumarið, til Cardiff á 15.000 pund. Hann hélt áfram að heilla áhorfendur þar með snilli sinni.

Ivor var einfaldlega stórgóður knattspyrnumaður. Það sást á leik hans að þar fór klassaspilari með afburða boltatækni. Hann var mjög öruggur í öllum aðgerðum sínum og sjaldgæft var að sendingar hans rötuðu ekki á samherja. Hann var líka til fyrirmyndar á velli og missti aldrei stjórn á skapi sínu. Áhangendur Magpies, sem og annars staðar þar sem hann lék, kunnu sannarlega vel að meta þennan stóra framherja sem var þekktur fyrir þrumufleyga sína. Merkilegt reyndar að oft skóku þeir fleygar tréverkið. Og Ivor var ekki einungis mikill markaskorari, hann var einnig mjög laginn við að leggja upp færin fyrir samherjana.
Þó Ivor væri að verða þrítugur þegar hann kom til Magpies, átti hann nóg eftir. Hæfileikarnir voru slíkir að hann þurfti ekki að fara hratt yfir. Hann var kallaður „næstum því maðurinn“ í Newcastle því þrumufleygarnir höfnuðu næstum því alltaf í netinu, ef þeir buldu þá ekki í tréverkinu. Allchurch spilaði 14 landsleiki á meðan hann var hjá Newcastle.

Í júlí 1965 gekk Ivor enn eina ferðina til liðs við Swansea Town. Liðið borgaði 6.500 pund fyrir hann og hann spilaði með Swansea þrjú næstu tímabil. Um sumarið 1968 fór hann svo til Worchester City og var síðan að spila í Wales þar til hann lagði knattspyrnuskóna endanlega á hilluna í apríl 1970.

Ferill Ivors var óhemju glæsilegur. Hann gerði 160 mörk fyrir Swansea og hefur enginn leikmaður náð að toppa það afrek. Enda er hann talinn besti leikmaðurinn sem hefur klæðst búningi Swansea. Hann var kallaður Gulldrengurinn en þrátt fyrir það naut hann aldrei þeirrar athygli sem hann hefði átt skilið. Sennilega var það vegna þess að hann var ekki að leika með nægilega sterkum félagsliðum. Hann vakti þó gríðarlega athygli með landsliði Wales í úrslitakeppni HM 1958 í Svíþjóð. Þar lék hann fimm leiki, gerði tvö mörk og sýndi allar sínar bestu hliðar.

Gulldrengurinn Ivor var aðalhetja Walesverja frá 1949 til 1968. Hann skoraði 241 mark í 694 deildarleikjum og skoraði 23 mörk í 68 landsleikjum og átti landsleikja- og markamet hjá Wales. Markametið stóð þar til Ian Rush kom til sögunnar. Í janúar 1966 fékk Ivor MBE orðu fyrir framlag sitt til knattspyrnunnar. Þegar allt er talið spilaði Ivor vel yfir 700 leiki og mörkin voru yfir 250. Yngri bróðir hans, Len, lék einnig fyrir landslið Wales.