Newcastle Klúbburinn á Íslandi

Fréttir í apríl 2009

29.Apr

(Varalið)

Liverpool - Newcastle Utd 5-1

Varalið Newcastle endaði tímabilið illa þegar þeir steinlágu fyrir varaliði Liverpool 5-1 í kvöld á Warrington's Halliwell Jones vellinum. Það var Haris Vuckic sem skoraði eina mark Newcastle. Varaliðið á eftir einn bikarleik sem eru úrslitaleikur í Northumberland Senior Cup en það er héraðsbikar þeirra Newcastle manna

Varalið NUFC:Soderberg, Airey, Lough, Vuckic, Tozer, Tavernier, Baheng (Inman 46), Donaldson, Ranger, Danquah (Doninger 64), Xisco (Godsmark 58).
Ónotaðir varamenn: Taylor, Grieve.

(ÞV

28.Apr

(Varalið)

Síðasti leikur varaliðsins annað kvöld

Varalið Newcastle leikur sinn síðasta leik á tímabilinu annað kvöld þegar þeir heimsækja varalið Liverpool á Halliwell Jones Stadium. Lið Newcastle er nú í fjórða sæti deildarinnar og en með sigri geta þeir lyft sér upp um tvö sæti. Varalið Liverpool er í tíunda og næst neðsta sæti. Lið Sunderland hefur þegar tryggt sér efsta sætið og er sjö stigum á undan næsta liði.

Richard Money og strákrnir hans hafa ekki tapað í tíu síðustu leikjum og hafa tapað aðeins einum leik frá því í nóvember. Leikmannahópurinn sem Money hefur úr að velja er eftirfarandi. Forster, Airey, Donaldson, Doninger, Godsmark, Grieve, Inman, Xisco, Lough, Ngo Baheng, Ranger, Soderberg, Tavernier, Tozer, Danquah, Vuckic.

Það var reiknað með að Ignacio Gonzalez myndi spila þennan leik en samkvæmt þessum upplýsingum af heimasíðu Newcastle mun hann ekki spila.

(FB)

27.Apr

NEWCASTLE - PORTSMOUTH 0-0

(Alan Shearer horfir sennilega á liðið falla í vor)

Dæmdir til að falla

Ég ætla ekki að skrifa mikið um þennan leik enda segja tölur leiksins allt sem segja þarf. Bitlaust og arfaslakt í leik sem varð að vinnast og virðist allt benda til að Newcastle sé á leið niður í Championship deildina.

NUFC: Harper, Beye, Coloccini, Bassong, Enrique (Guthrie 28), Smith, Butt (Jonas 71), Duff, Viduka (Carroll 64), Owen, Martins.

Gult spjald: Bassong.

Skot (á mark) Nufc 13 (8) - Por 15 (7)

Horn: Nufc Nufc 7 - Por 10

Áhorfendur: 47,481

Maður leiksins: Nicky Butt (ég hélt að ég myndi aldrei skrifa þetta, en Butt var engu að síður skásti maðurinn í arfaslöku liði Newcastle í kvöld)

(FB)

26.Apr

(U18)

Man Utd - Newcastle Utd 4-2

Unglingalið Man United tók á móti strákunum frá Newcastle í gær og var leikið á Carrington vellinum.

Það voru heimamenn sem komust yfir á þriðju mínútu leiksins með marki frá Oliver Norwood. Korteri seinna eða 19 mínútu jöfnuðu strákarnir frá Newcastle leikinn með marki frá sænska sóknarmanninum Samuel Adjei og á 42 mínútu komust þeir yfir þegar Brad Inman skoraði sitt þriðja mark á tímabilinu með skoti af stuttu færi. Rauðu djöflarnir jöfnuðu leikinn eftir að aðeins tvær mínútur voru liðnar af seinni hálfleik og á 68 mínútu komust þeir yfir annað sinn í leiknum. Man United tryggðu sér sigurinn með fjórða markinu þegar aðeins voru sex mínútur eftir af leiknum.

NUFC: Soderberg, Taylor, Folan, Inman, Grieve, Dummett, McCrudden, Airey, Adjei, Spear (Leadbitter 64), Vuckic.

Ónotaðir varamenn: Archer, Wrightson, Nzuzi, Alnwick.

(ÞV)

26.Apr

NEWCASTLE - PORTSMOUTH

Alan Shearer vonast eftir fyrsta sigrinum sínum sem stjóri Newcastle annað kvöld þegar Hermann Hreiðarsson og félagar í Portsmouth koma í heimsókn á St James´ Park. Og það vita allir stuðningsmenn Newcastle að þessi leikur VERÐUR að vinnast ef liðið á að eiga möguleika að bjarga sér frá falli. Úrslit um helgina hafa verið nokkuð hagstæð fyrir okkur Newcastlemenn fyrir utan að Blackburn nældi í 3 stig gegn Wigan. En hin liðin fyrir ofan okkur Middlesbro, Sunderland og Hull töpuðu sínum leikjum og þetta tækifæri gegn Portsmouth verður því að nýtast.

Það má reikna með að Shearer stilli upp þremur sóknarmönnum (Viduka, Martins, Owen) enda verður liðið að fara skora mörk. Jose Enrique, Peter Lovenkrands eru búnir að jafna sig á sínum meiðslum og verða í leikmannahópnum. En Steven Taylor verður ekki með þar sem ökklameiðsli hans tóku sig upp í leiknum gegn Tottenham og verður hann frá í tvær vikur. Það er óvíst hvort Coloccini og Joey Barton verði með. Það yrði kærkomið að fá Barton aftur í liðið enda hefur sárlega vantað skapandi miðjumann í vetur og hefur Shearer kvartað undan skort á sköpunargleði miðjumanna Newcastle. Ignacio Gonzalez er byrjaður að æfa á fullu og mun spila með varaliðinu gegn varaliði Liverpool í vikunni.

Oba Martins er sagður hafa frestað aðgerð á ára til loka tímabilsins eftir að hafa ráðfært sig við lækna.

Fyrri leikur liðanna í vetur endaði með 0-3 sigri okkar manna og er það sennilega besti leikur Newcastle á tímabilinu. Það voru Owen, Martins og Guthrie sem skoruðu mörk Newcastle í leiknum. En á síðasta tímabili töpuðu Newcastle 1-4 fyrir Portsmouth á SJP, en þá skoruðu leikmenn Portsmouth þrjú mörk á þrem mínútum og gerðu út um leikinn. Við skulum vona að sagan endurtaki sig ekki annað kvöld.

Undafarnir leikir gegn Portsmouth á SJP:

2007/08 Tap 1-4 (Campbell sjm)
2006/07 Sigur 1-0 Sibierski
2006/07 Sigur 3-0 Rossi, Solano 2 (Carling Cup)
2005/06 Sigur 2-0 N'Zogbia, Shearer
2004/05 Jafntefli 1-1 Bowyer
2003/04 Sigur 3-0 Speed, Shearer, Ameobi

Leikmannahópur Newcastle: Harper, Forster, Krul, Beye, Bassong, Coloccini ?, Edgar, Enrique, Cacapa, Butt, Duff, R. Taylor, Gutierrez, Nolan, Guthrie, Barton ?, Geremi, Lovenkrands, Smith, Martins, Owen, Carroll, Xisco, Ranger, Ameobi, Viduka.

Dómari leiksins verður Mike Riley

(FB)

25.Apr

Ekkert nema sigur dugar gegn Portsmouth

Leikurinn gegn Portsmouth á mánudagskvöld verður að vinnast ef Newcastle á að eiga möguleika á að halda sæti sínu í deildinni. Alan Shearer hefur ekki náð að landa sigri frá því að hann tók við liðinu og hefur aðeins náð í eitt stig í þremur leikjum. "Þetta er mikilvægasti leikurinn minn í mjög langan tima. Við vitum allir hvað er í húfi og verðum að sækja þrjú stig. Það hljómar auðveldlega en það verður ekki auðvelt. Nú verðum við að mæta á völlinn og taka öll stigin sem eru í boði. Ég tel að níu stig gætu dugað okkur miðað við leikina sem liðin í kringum okkur eiga eftir. Ég gæti haft rangt fyrir mér, en ég fer fram á það við mína leikmenn að við vinnum þessa þrjá heimaleiki sem við eigum eftir, sá fyrsti gegn Portsmouth á mánudagskvöld" sagði Shearer.

Hvort sem liðið fellur eða ekki þá má reikna með miklum breytingum á leikmannhópnum í sumar. Leikmenn eins og Mark Viduka, Geremi, Michael Owen, Alan Smith, Cacapa, Oba Martins, og sennilega fleiri munu fara frá liðinu.

(FB)

24.Apr

(Varalið)

Man Utd - Newcastle Utd 1-1

Varalið Manchester United tók á móti varaliði Newcastle United í gær á Altrincham's Moss Lane í Manchester og endaði leikurinn 1-1 og er varalið Newcastle búnið að vera taplaust í síðustu tíu leikjum í öllum keppnum. Það voru heimamenn sem komust yfir á 9 mínútu með marki frá Cory Evans. En það tók ekki nema tíu mínútur fyrir Newcastle að jafna leikin og var það Frank Wiafe Danquah (mynd) sem átti skot af 27 metra færi og boltinn steinlá í netinu hjá Tomas Kuszcak(Það vantar svona leikmann í aðalliðið, leikmann sem getur skotið af löngu færi). Á 36 mínútu skoraði Nile Ranger skallamark en það var dæmt af vegna smá snertingar inn í teignum. Seinni hálfleikurinn var fjörugur og á 60 mínútu munaði litlu að Newcastle náði forustunni þegar Xisco átti skot í utanverða stöngina. Man United fékkdæmda vítaspyrnu á 79 mínútu þegar Ben Tozer braut af sér en þeir náðu ekki að nýta sér hana því að Tim Krul varði skotið frá Fabio. Eftir vítaspyrnuna átti Newcastle tvö góð færi, varnarmenn Man United náðu að hreinsa af línunni eftir tilraun frá Xisco og Ben Tozer sem áttu góða skalla að marki sem Tomas Kuszczak varði.

NUFC: Krul, Tavernier, Ferguson, Donaldson, Tozer, Lough, Godsmark (Doninger 52), Danquah, Ranger,
Xisco, Baheng (Vuckic 72).
Ónotaðir varamenn: Soderberg, James Taylor, Grieve.

MUFC: Tomasz Kuszczak, Richard Eckersley, Fabio Da Silva, Corry Evans (c), Oliver Gill, Wes Brown (Cameron Stewart, 46m), Matthew Jones, Daniel Drinkwater, Darron Gibson (Magnus Eikrem, 63m), Lee Martin, Zoran Tosic
Ónotaðir varamenn:Joe Dudgeon, Ben Amos, Robert Brady

(ÞV)

22.Apr

Ignacio Gonzalez byrjaður að æfa

Gonzalez sem hefur aðeins tekið þátt í tveimur leikjum með Newcastle frá því hann kom á láni frá Valencia í ágúst er byrjaður að æfa með aðalliðinu.

Hann meiddist á hásin í september og hefur ekkert spilað síðan þá. Ian Dowie segir að hann muni sennilega spila með varaliðinu í næstu viku.

"Nacho hefur verið meiddur á hásin í nokkurn tíma. Hann er hefur æft núna í þrjá eða fjóra daga. Hann tók fullan þátt í æfingu og hvíldi síðan, hann mun æfa aftur á fullu á morgun (fimmtudag) og við munum skoða að láta hann spila með varaliðinu gegn Liverpool í næstu viku" sagði Dowie.

Nacho er skapandi miðjumaður, eitthvað sem okkur hefur sárlega vantað í vetur og vonandi munum við sjá hann áður en langt um líður. Allavega getur miðjuspilið hjá Newcastle ekki versnað. Alan Shearer hefur gagnrýnt miðjumenn Newcastle og segir þá ekki skapa nógu mikið fyrir sóknarmennina.

"Sóknarmenn okkar eiga eftir spila stórt hlutverk í þessum fimm leikjum, en ég veit best af öllum að það þarf að skapa færi fyrir þessa menn. Í fyrri hálfleik gegn Stoke og Tottenham sköpuðum við engin færi, það er eitthvað sem við erum að reyna breyta. Við verðum að skapa meiri færi því það er enginn vafi á að við höfum mennina til að klára þessi færi"

(FB)

22.Apr

Nýr búningur fyrir tímabilið 2009/10

Newcastle kynnti í dag nýjan búning fyrir næsta tímabil og eru ekki miklar breytingar á honum. Rendurnar eru aðeins minni og hann verður í forsölu á heimasíðu Newcastle frá og með deginum í dag. Hér til hliðar má sjá Jonas Gutierrez í nýja settinu.

(FB)

19.Apr

Tottenham - Newcastle 1-0

(Bent 24)

(Martins í baráttu við Woodgate í dag)

Enn versnar staða Newcastle í deildinni

Það verður bara að segjast eins og er að lið sem vinnur ekki leiki og skorar ekki mörk á hreinlega skilið að falla og það er staða Newcastle þessa dagana. Þeir skora ekki mörk og hafa aðeins unnið einn leik á þessu ári í deildinni.

Newcastle er nú í fast í næst neðsta sæti deildarinnar og fall blasir við liðinu. Því miður sé ég það ekki gerast að liðið fari að vinna þrjá til fjóra leiki af þeim fimm sem eftir eru. Það þarf allavega mikið að breytast hjá leikmönnum Newcastle ef þeir ætla að snúa við blaðinu á lokasprettinum.

Alan Shearer gerði þrjár breytingar á liðinu frá því í leiknum gegn Stoke um síðustu helgi. Steven Taylor, Jonas Gutierrez og Andy Carroll voru í byrjunarliðinu í stað David Edgar, Danny Guthrie og Shola Ameobi.

Newcastle stálheppið að vera aðeins 1-0 undir í hálfleik og áttu okkar menn ekki margar sóknir sem vörn Tottenham þurfti að hafa áhyggjur af. Mark Tottenham kom eftir vel útfærða skyndisókn heimamanna (eitthvað sem leikmenn Newcastle ættu að gera oftar). Leikur Newcastle breyttist töluvert eftir að Mark Viduka og Oba Martins komu inná þegar um 30 mínútur voru eftir af leiknum og ætla ég svo innilega að vona að Viduka verði heill það sem eftir er af leiktímabilinu. Besta færi Newcastle fékk Martins á rétt fyrir lok leiksins en han skaut yfir í ágætu færi.

Alan Shearer eftir leikinn: "Ég var sáttur við seinni hálfleikinn. Eini kosturinn í stöðunni var að setja Viduka og Martins inná og það virkaði ágætlega. Það jákvæða úr þessu er seinni hálfleikurinn þar sem við vorum meira ógnandi en því miður náðum við ekki að jafna". Um markið sem Newcastle fékk á sig sagði hann: "Það var klaufalegt, þeir skoruðu eftir að við áttum hornspyrnu sem er mjög svekkjandi. Harper varði vel frá Bent en hann féll aftur beint fyrir lappirnar á honum aftur og hann skoraði í autt markið"

NUFC: Harper, Beye, Bassong, S Taylor (Smith 46), Duff, R Taylor, Jonas, Butt, Nolan (Viduka 60), Owen, Carroll (Martins 60).

Ónotaðir varamenn: Krul, Guthrie, Edgar, Ameobi.

Gult spjald: R Taylor.

Skot (á mark) Tott 22 (18) - NUFC 8 (3)

Hornspyrnur: Tott 4 - NUFC 7

Áhorfendur: 35,850

Maður leiksins: Oba Martins.

(FB)

18.Apr

Tottenham - Newcastle

Newcastle mætir Tottenham á White Hart Lane kl 12:30 á sunnudag og nú verður liðið að fara vinna leiki ef ekki á illa að fara. Liðin fyrir ofan Newcastle eru að taka stig og má nefna að Sunderland, Stoke og Portsmouth unnu sína leiki á laugardag. Middlesbrough gerði jafntefli og fyrir vikið féll Newcastle um eitt sæti og er í næst neðsta sæti deilarinnar. Alan Shearer: "Við höfum ekki efni á að tapa neinum leikjum. Við höfum átt góða viku á æfingasvæðinu og við munum reyna nýta okkur það á vellinum á sunnudag. Við náðum ágætum úrslitum um síðustu helgi á erfiðum útivelli. Við ætlum að berjast fyrir þetta félag".

Mark Viduka snýr til baka í leikmannahópinn og er Shearer ánægður að fá hann til baka. "Hann er með geysilega hæfileika og við höfum trú á því að ef hann nær að halda sér í formi þá hefur mun hann eiga stóran þátt í að bjarga liðinu" sagði Shearer. Obafemi Martins er tæpur og verður ákveðið í fyrramálið hvort hann verður með eða ekki. Steven Taylor verður að öllum líkndum með á ný eftir meiðsli og yrði það þá í fyrsta sinn sem hann spilar undir stjórn Shearer. Daninn Peter Lovenkrands er einnig búinn að jafna sig á meiðslunum sem hann hlaut í leiknum gegn Chelsea. Þeir leikmenn sem eru frá vegna meiðsla eru: Jose Enrique, Joey Barton, Ignacio Gonzalez. Þetta er sennilega í fyrsta sinn í vetur sem meiðslalistinn er svona lítill. Alan Shearer hrósaði vörninni eftir leikinn gegn Stoke en þá spilaði hann með þrjá miðverði Bassong, Beye og Edgar. Það kemur svo í ljós hvort hann breytir þessari upstillingu. Það eina sem ég fer fram á frá Shearer að Ameobi spili ekki meira á þessu tímabili. Ég er alveg búinn að fá nóg af honum og fékk upp í kok af honum í síðasta leik. Jú og svo á Jonas Gutierrez að byrja inná, hann er mest ógnandi miðjumaður liðsins og er einnig geysilega duglegur að koma til baka og hjálpa til í vörninni.

Fyrri leikur liðanna í vetur endaði með sjaldgæfum sigri Newcastle 2-1 og voru það N´Zomnia og Duff sem skoruðu mörk NUFC. Hann er minnisstæður leikur liðanna á White Hart Lane á síðasta tímabili en þá unnu okkar menn 1-4 sem var sennilega besti leikur liðsins á því tímabili.

Leikmannahópur Newcastle: Harper, Forster, Krul, Beye, Bassong, S Taylor, Coloccini, Edgar, Cacapa, Butt, Duff, R. Taylor, Gutierrez, Nolan, Guthrie, Geremi, Lovenkrands, Smith, Martins, Owen, Carroll, Xisco, Ranger, Viduka.

Dómari leiksins verður Mark Halsey

(FB)

18.Apr

(U18)

Crewe - Newcastle 4-0

Ungu strákarnir steinlágu fyrir Crewe á Alexandra Park í gær og er þetta stærsta tap liðsins síðustu 19 mánuði.

Aaron Spear og Samuel Adjei áttu ágætis færi í fyrri hálfleik áður en Alex Titchener kom heimamönnum yfir á 42 mínútu. Þeir bættu svo tveimur mörkum við í byrjun seinni hálfleik og voru þar að verki Alex Titchener og Matthew Lund. Haris Vuckic var nálægt því að minnka munin en Titchener fullkomnaði þrennuna sína undir lok leiksins með fjórða marki Crewe

NUFC: Johnson, Tavernier, Dummett, Inman, Grieve,
James Taylor, Adjei (McCrudden 75), Vuckic, Airey,
Spear, Ferguson.
Ónotaðir varamenn: Leadbitter, Robinson, Page, Archer.

(FB)

16.Apr

Stuttar fréttir

# Peter Lovenkrands og Steven Taylor verða með á æfingu á föstudag og gætu verið með gegn Tottenham á sunnudag. "Við munum fylgjast með þeim en við erum vongóðir" sagði Shearer um þá tvo.

# Fabricio Coloccini meiddist á æfingu í vikunni og er óvíst hvað hann verður lengi frá keppni.

# Mark Viduka er orðin leikfær og ferðast með liðinu til London á sunnudaginn. Hann hefur ekki spilað síðan í tapleik gegn Bolton í síðasta mánuði. "Hann hefur æft á fullu þessa viku og það er fráfært að fá hann til baka" sagði Shearer.

# Obafemi Martins hefur ekkert æft þessa viku en Shearer hefur ekki útiokað að hann verði með gegn Tottenham. "Oba hefur ekkert æft þessa viku, en við höfum ekki útilokað hann og munum fylgjast með honum og taka ákvörðun á lokastundu" sagði Shearer um Martins.

# Habib Beye segir að hinn 22 ára Sebastien Bassong geti orðið leiðtogi hjá Newcastle í framtíðinni. "Ég vissi um Sebastien áður en hann kom hingað frá Metz. Ég hef reynt að hjálpa honum vegna þess að hann er ungur og er á fyrsta ári í nýju landi. En ég held að hann hafi sýnt hvað hann er góður og hann hefur verið einn af okkar bestu leikmönnum í vetur. Ef hann heldur áfram að þróast eins og hann hefur gert þá verður hann mikill leiðtogi fyrir liðið" sagði Beye

# Andy Carroll er líklegur að byrja inná um helgina gegn Tottenham eftir fínan leik gegn Stoke um síðustu helgi.

Hann kom inná fyrir arfaslakan Ameobi og vona ég innilega að hann verði ekki leikmannahópnum um helgina. Eins og sjá má á könnuninni hér til hliðar þá eru stuðningsmenn ekki spenntir fyrir að Ameobi sé í byrjunarliði Newcastle. Þegar þetta er ritað hafa 98% valið Carroll fram yfir Ameobi.

(FB)

15.Apr

Varalið Newcastle er komið í úrslit

Newcastle United - Newcastle Benfield 2-1

Varalið Newcastle tók á móti Newcastle Benfield (NBFC) á Whitley Park í gær og með sigrinum á NBFC komu þeir sér í úrslitaleik Northumberland Senior Cup. Alan Shearer , Iain Dowie og Chris Hughton voru allir á leiknum og urðu vitni af því þegar NBFC komust yfir á 14 mínútu þegar Ian Graham skoraði í autt markið eftir að Foster átti slæmt úthlaup. Varalið Newcastle United var skipað mjög ungum strákum í dag og áttu þeir lítið af marktækifærum í fyrri hálfleik en þrátt fyrir það náði ungi frakkinn Wesley Ngo Baheng (mynd) að skora eftir að vörn NBFC mistökst að hreinsa boltann útúr vítateignum. Staðan var 1-1 í hálfleik og það tók sjö mínútur fyrir Newcastle United að ná forustunni í leiknum þegar Mark Doninger skoraði af 18 metra færi eftir stoðsendingu frá Jonny Godsmark. Leikmenn Newcastle United sköpuðu sér nokkur mjög góð færi í seinni hálflek en heppnin var ekki með þeim. Úrslitaleikurinn verður þann 12 mai á St.James´Park og þá mætast varalið Newcastle United og Ashington

NUFC: Forster, Tavernier, Ferguson, Doninger, Morris, Lough, Godsmark, Donaldson (Inman 88), Ranger, Baheng, Danquah (Adjei 78).

Ónotaðir varamenn: Vuckic, Grieve, Taylor.

(ÞV)

15.Apr

Joey Barton á réttri leið

Það styttist í endurkomu Joey Barton og gæti hann verið með gegn Portsmouth mánudaginn 27 apríl. Það voru einhverjar sögur um að hann hefði fengið bakslag en Ian Dowie segir að ekkert sé til í því. "Það er allt í fínu lagi hjá honum og hann er á réttri leið hvað okkur varðar. Hann vill ólmur spila á ný og við höfum sett stefnuna á leikinn gegn Portstmouth fyrir hann. Ef sá leikur er of snemma fyrir hann, þá verður klár í næsta leik. Við verðum að sjá til hvernig honum gengur næstu daga, en hann er mjög ákveðinn eins og gefur að skilja. Þannig persóna er hann og vonandi getur hann spilað eitthvað í þeim leik" sagði Dowie.

Eins og menn vita þá var Jose Enrique ekki með gegn Stoke um síðustu helgi vegna meiðsla á hné og hefur hann einnig sett stefnuna á leikinn gegn Portsmouth. Dowie bætti við: "Jose er að jafna sig mun fyrr en við reiknuðum með, við bjuggumst við að han yrði frá í nokkurn tíma"

(FB)

15.Apr

Dowie: "Ekkert vesen með Martins"

Aðstoðarstjóri Newcastle Ian Dowie segir að Martins sé ómissandi partur af liðinu í fallbaráttunni og vonar að hann verði klár í þá sex leiki sem eftir eru. Martins var ekki með gegn Stoke um síðustu helgi en hann dró sig úr leikmannahópnum á laugardagsmorguninn og kvartaði undan meiðslum í nára. Alan Shearer var mjög ósáttur við tímasetningu á afturköllun Martins úr hópnum en Dowie segir að það sé búið að ræða þetta mál og það er úr sögunni.

"Það er ekkert vandamál með Martins og þetta mál er úr sögunni. Þetta er búið og hann hefur sagt að hann er með fullan hug við liðið, við sögðum aldrei að það væri engin meiðsli hjá honum. Það eina sem Alan sagði að hann var óánægður með að honum var ekki sagt frá meiðslunum fyrr en kl 11.15 á laugardagsmorguninn, sem var of seint. Það var svekkjandi vegna þess að við vorum búnir að æfa alla vikuna með leikkerfi og þurftum svo að breyta því á síðustu stundu vegna meiðsla hans. Hann hefur farið í skoðun og vonandi verður hún jákvæð fyrir okkur, vegna þess að hann er okkur mjög mikilvægur, það er ekki spurning. Samskiptin hefðu átt að vera betri, en Oba til varnar þá vildi hann ólmur taka þátt í leiknum og þess vegna dró hann það svo seint að láta vita af meiðslunum" sagði Dowie að lokum.

(FB)

15.Apr

Nile Ranger skrifar undir nýjan samning

Newcastle hefur verðlaunað Ranger með nýjum þriggja og hálfs árs samning eftir frábæra frammistöðu í vetur.

Þessi ungi framherji hefur staðið sig mjög vel á sínu fyrsta ári hjá Newcastle og hefur hann skorað 22 mörk fyrir vara og unglingaliðið. Hann varð 18 ára á laugardaginn og var á bekknum gegn Stoke. Ranger hefur ekki enn spilað fyrir aðallið Newcastle en Alan Shearer hefur sagt að hann muni ekki hika við að nota hann á þessu tímabili. Í viðtali á heimasíðu Newcastle sagði Ranger: "Þetta síðasta ár hefur verið sannkallaður draumur fyrir mig og hefði ekki getað verið betra. Ég er mjög ánægður með samninginn og skuldbindingu mína við félagið, því hérna vill ég spila fótbolta"

(FB)

11.Apr

(U18)

Newcastle United - Sheffield United 2-2

U18 ára lið Newcastle tók á móti strákunum frá Sheffield United í dag og spiluðu þeir á Benton vellinum í Newcastle. Það voru nokkur ný andlit í hópnum hjá Newcastle þar á meðal Ben Robinson , Ryan Page og Patrick Nzuzi. Það voru gestirnir sem komust yfir eftir 44 mínútur og var staðan 0-1 í hálfleik. Newcastle strákarnir jöfnuðu á 62 mínútu með marki frá Ryan Donalson af stuttu færi. Sheffeild var ekki lengi að ná forustunni í annað sinn og skoruðu þeir annað mark sitt á 68 mínútu. Tveimur mínútum seinna fékk Newcastle dæmda vítaspyrnu sem þeir náðu ekki að nýta sér. Það var svo Patrick Nzuzi, sem kom inna fyrir Don Williams á 63 mínútu, sem jafnaði leikinn fyrir Newcastle á 73 mínútu og var þetta hans fyrsti leikur fyrir U18 lið Newcastle. Eftir þetta gerðu bæði liðin tilkall til sigursins með nokkrum góðum færum en leiknum lauk 2-2.

NUFC: Robinson, Henderson, Folan (Archer), Inman, Grieve, Dummett, McCrudden, Page , Donalson, Vuckic, Williams (Nzuzi).

Ónotaðir varamenn: McCorrigan, Wrightson, Johnson.

(ÞV)

11.Apr

Stoke - Newcastle 1-1

(Faye 33) - (Carroll 81)

(Carroll skoraði glæsilegt skallamark í dag)

Newcastle heppnir að sleppa með eitt stig

Það voru ekki góðar fréttir sem maður fékk rétt fyrir leikinn í dag. Oba Martins er ekki í leikmannahópnum vegna meiðsla og ekki skánaði það þegar maður sá að Ameobi væri í byrjunarliðinu. Ég hef sagt það margoft áður og segi það enn einu sinni, ég get ekki skilið hvað menn sjá við Ameobi og ég trúi því ekki að Alan Shearer ætli að falla í sömu gryfju og aðrir stjórar Newcastle og nota þennan arfaslaka leikmann hvað eftir annað. Hann átti alla sök á markinu sem Abdoulaye Faye skoraði í dag, það var hans hlutverk að gæta hans í hornspyrnunni en hann var að hugsa eitthvað allt annað en að passa Faye. Coloccini var settur á bekkinn í fyrsta sinn í vetur en hann átti arfaslakan leik gegn Chelsea um síðustu helgi. David Edgar kom inn í hans stað og stóð sig bara nokkuð vel.

Heimamenn í Stoke voru mun ákveðnari í sóknarleik sínum og var ekki mikið að gerast í sóknaraðgerðum Newcastle. Jonas Gutierrez var á bekknum í dag og það get ég ekki hledur skilið. Hann er lang hættulegasti miðjumaður Newcastle og svo er hann líka mjög duglegur að koma til baka og hjálpa til í vörninni.Stoke komst yfir á 33 mínútu þegar þeir fengu hornspyrnu á silfurfati frá Chris Foy dómara leiksins, það sást greinilega að boltinn hrökk af leikmanni Stoke en engu að síður fengu þeir hornspyrnu sem þeir svo skoruðu úr. Eins og áður sagði átti Ameobi alla sök á því að fyrrum leikmaður Newcastle Abdoulaye Faye var einn og óvaldaður á markteig og skallaði auðveldlega í markið. Það var svo ekki fyrr en Andy Carroll kom inná á 70 mínútu fyrir títtnefndan Ameobi sem sóknarleikur Newcastle fór að bera árangur. Hann er í allra staði betri sóknarmaður en Ameobi, hann berst fyrir öllum boltum og er mun betri skallamaður. Carroll var nálægt því að janfa leikinn stuttu eftir að hann kom inná en skallaði rétt framhjá úr erfiðu færi. En hann gerði engin mistök stuttu seinna en þá skallaði hann glæsilega framhjá Sorensen í markinu eftir fína sendingu frá Damien Duff. 1-1 jafntefli niðurstaðan í dag og er eitt stig betra en ekkert, liðið er því enn í fallsæti og á erfiðan útileik um næstu helgi gegn Tottenham.

Alan Shearer eftir leikinn: "Mér fannst við sína góðan karakter að koma til baka og janfa leikinn. Ég sagði við Andy í vikunni að hann ætti eftir að spila stórt hlutverk. Ég sagði honum einnig að sína hungur og löngun, hann gerði það og tryggði okkur stig"

Ég skora á Alan Shearer að gefa Ameobi frí frá knattspyrnuiðkun út leiktíðina og gefa Andy Carroll tækifæri, enda er hann í alla staði betri leikmaður en Ameobi.

NUFC: Harper, Edgar, Bassong, Beye, R Taylor, Guthrie (Jonas 63), Butt, Duff, Nolan, Owen, Ameobi (Carroll 70)

Ónotaðir varamenn: Krul, Coloccini, Smith, Geremi, Ranger.

Gul spjöld: Bassong, R Taylor.

Skot (á mark) Nufc 8 (2) - Sto 17 (6)

Hornspyrnur: Nufc 4 -Sto 8

Áhorfendur 24,862

Maður leiksins: Andy Carroll (Skoraði glæsilegt skallamark og gerði meira en Amobi hefur gert í allan vetur)

(FB)

10.Apr

Stoke - Newcastle

Nú er að duga eða drepast fyrir Newcastle United. Liðið verður að fara vinna leiki til að bjarga sér frá falli úr úrvalsdeildinni. Alan Shearer þarf að stokka aðeins upp í vörninni vegna meiðsla Jose Enrique sem meiddist á æfingu í vikunni. Það var vonast til að Steven Taylor yrði tilbúinn í þennan leik en af því verður ekki þar sem hann hefur ekki enn jafnað sig á meiðslunum sem hann hlaut í leiknum gegn Arsenal. Peter Lovenkrands verður heldur ekki með vegna meiðsla sem hann hlaut í leiknum gegn Chelsea um síðustu helgi. En góðu fréttirnar eru að Sebastien Bassong er búinn að jafna sig á sínum meiðslum og verður með.

"Við vitum hvernig þeir spila og hver ógn þeirra er. Ef maður skoðar hvað þeir hafa fengið mörg stig á heimavelli þá sér maður að þeir eru að gera eitthvað rétt. Við vitum hverju við eigum von á en getum við höndlað það ? Við verðum að vera hugrakkir og sterkir" sagði Shearer.

Líklegt byrjunarlið: Harper, Beye, Coloccini, Bassong, R Taylor, Jonas, Butt, Nolan, Duff, Martins, Owen.

Ég hefði viljað sjá breytingu á leikkerfi Newcastle úr 4-4-2 í 4-3-3 og hafa Andy Carroll í framlínunni með Martins. Owen ætti svo að vera fyrir aftan þá líkt og Keegan gerði í lok tímabilsins í fyrra. En ég ætla að treysta Alan Shearer til að til að bjarga liðinu frá falli.

Fyrri leikur liðanna í vetur endaði með 2-2 jafntefli og skoraði Owen bæði mörk Newcastle í leiknum. Fyrrum leikmaður Newcastle Abdulaye Faye skoraði jöfnunarmark Stoke á lokamínútu leiksins.

Leikmannahópurinn: Harper, Forster, Krul, Beye, Bassong, Coloccini, Edgar, Cacapa, Butt, Duff, R. Taylor, Gutierrez, Nolan, Guthrie, Geremi, Smith, Martins, Owen, Carroll, Xisco, Ranger.

(FB)

10.Apr

Barton og Viduka byrja að æfa á fullu í næstu viku

Alan Shearer er viss um að þeir félagar Mark Viduka og Joey Barton eigi eftir að spila stórt hlutverk í fallbaráttunni sem er framundan hjá Newcastle. Þeir gætu hugsanlega verið tilbúnir í slaginn gegn Tottenham þann 19 apríl. Shearer býst við að þeir munu báðir byrja að æfa á fullu í næstu viku en þeir hafa báðir verið að æfa undanfarið en bara tekið þátt í léttum æfingum. "'Ég veit að þeir hafa verið að æfa nokkuð vel, þeir eru vongóðir um að byrja æfa á fullu í næstu viku" sagði Shearer um þá tvo. Aðspurður um hvort þeir munu spila eitthvað hlutverk í þeim sex leikjum sagði Shearer: "Án nokkurs vafa, já örugglega"

Barton hefur ekki spilað síðan hann ristarbrotnaði í leik gegn Man City í lok janúar. Han gæti skipt sköpum á miðjunni þar sem hann er einn sá besti miðjumaður sem Newcastle hefur til umráða. Hann er sennilega besta vítaskyttan sem hjá Newcastle.

Mark Viduka hefur aðeins spilað sex leiki í vetur vegna meiðsla sem hafa hrjáð hann í allan vetur, en hann gæti skipt sköpum í sóknarleik Newcastle sem hefur verið arfaslakur. Vonandi að Shearer breyti nú einhverju í uppstillingu liðsins og fari jafnvel í 4-3-3 leikkerfi sem gaf svo vel á síðasta tímabili með þá Martins, Owen og Viduka í framlínunni. Það þarf allavega að fara hrista aðeins upp í þessu liði því það virðist vera svolítið fyrirsjáanlegt hvernig liðið spilar enda hefur aðeins einn sigur komið í hús á þessu ári sem er skelfilegur árangur.

(FB)

9.Apr

Shearer: "Mjög mikilvægt að ná góðum úrslitum"

Alan Shearer heimtar hagstæð úrslit í leiknum gegn Stoke um helgina en það munar sex stigum á liðinum. "Það er mikilvægt að ná góðum úrslitum og við munum reyna að krækja í öll þrjú stigin sem eru í boði. Ég er ekki að segja að jafntefli myndi ekki gera neitt fyrir okkur, vegna þess að við myndum sætta okkur frekar við eitt stig en ekki neitt. En við munum reyna vinna þennan leik. Við þurfum þrjú stig"

Brittania Stadium hefur verið sterkur heimavöllur og hafa Stoke fengið 28 stig af þeim 35 sem þeir hafa á heimavelli í vetur. Shearer bætti við: "Þeir eru erfiðir heim að sækja og flest stig þeirra hafa komið á heimavelli. Þeir eru stórir og líkamlega sterkir. Þeir eru hættulegir í föstum leikatriðum og við vitum það. En að vita það og stöðva það eru tveir ólíkir hlutir. Við munum tyggja þetta ofan í leikmenn þangað til þeir verða bláir í framan. Þeir verða að fara út á völlinn og berjast fyrir öllu, við erum að reyna útrýma klaufamistökum í leik okkar, til að ná því verða menn að vera með fulla einbeitningu í 95 mínútur. Það verðum mikið af boltum dælt inn í boxið hjá okkur. Við verðum að geta höndlað það".

(FB)

9.Apr

Jose Enrique ekki með gegn Stoke

Spánverjinn Jose Enrique meiddist á hné á æfingu í vikunni og Alan Shearer segir að hann verði ekki með gegn Stoke um helgina. "Hann fékk smá hnykk á hnéð fyrr í vikunni en vonandi verður hann ekki lengi frá". Shearer staðfesti einnig að Steven Taylor og Peter Lovenkrands verða ekki heldur með vegna meiðsla. En það eru betri fréttir af Sebastien Bassong sem er byrjaður að æfa á fullur og verður klár í leikinn gegn Stoke.

(FB)

8.Apr

Llambias: "Shearer var okkar fyrsti kostur"

Stjórnarformaður Newcastle Derek Llambias hefur hrósað Alan Shearer fyrir þau áhrif sem hann hefur haft á liðið hingað til. Hann hefur alla stuðningsmenn á bak við sig og segir Llambias að Shearer hefði verið þeirra fyrsti kostur í að reyna bjarga liðinu frá því ástandi sem það er í. Llambias sagði: " Þetta er mikil lyftistöng fyrir alla í Newcastle. Leikmenn eru mjög spenntir og þeim hlakkar til næsta leiks. Við urðum að skoða okkar mál. Við vorum í þeirri stöðu að við urðum að gera eitthvað og Alan var okkar besti kostur. Hann er sá eini sem við töluðum við og okkur fannst hann vera sá eini kostur. Hann hefur skipt sköpum, hann mjög hreinskilinn. Mér líkar það vel í hans fari. Það er ekkert farið í kringum hlutina. Hann hefur virðingu allra. Hann er elskaður hér og hann ætti að vera það. Alan hefur Ian Dowie með sér og það virkar vel saman, en Alan tekur ákvarðanir. Það er mjög mikilvægt að við höldum okkur uppi og Alan er rétti maðurinn í verkið"

Llambias var einn af 7500 áhorfendum á æfingu Newcastle í gær og sá Shearer taka þátt í æfingunni. Llambias sló á létta strengi "Ég hefði átt að semja við hann sem spilandi stjóra, en að alvarlegri málum þá tel ég að hann muni hafa strákana tilbúna í leikinn gegn Stoke og við getum farið að horfa fram á veginn"

(FB)

8.Apr

Joe Kinnear fékk fína skoðun

Kinnear fór í skoðun á mánudag og stóðst allar prófanir, hann mun þó ekki snúa til baka fyrr en í sumar.

Hvaða staða mun bíða eftir honum í sumar á enn eftir að koma í ljós. Aðalatriðið núna er að liðið bjargi sér frá falli og svo má ræða hans framtíð hjá félaginu. Derek Llambias hafði þetta um Kinnear að segja: "Joe fór í skoðun á mánudag og læknarnir voru ánægður með hann. Hann hefur lést aðeins en stóðst allar skoðanir með prýði. Nú er hann allur að koma til og ætti að vera tilbúinn eftir tvo mánuði".

(FB)

7.Apr

(Varalið)

Newcastle - Man City 2-1

Andy Carroll var hetja kvöldsins en hann skoraði bæði mörk Newcastle í 2-1 sigri í gærkvöldi á St James´ Park fyrir framan Alan Shearer og þjálfarateymi hans. Hann gerir því sterkt tilkall í sæti í aðallið Newcastle fyrir leikinn gegn Stoke á laugardag. Newcastle stillti upp nokkuð sterku varaliðið með þá Alan Smith, Danny Guthrie, David Edgar, Xisco og Andy Carroll. Man City var einnig með sterka leikmenn í sínu liði eins og Martin Petrov, Benjani og Dietmar Hamann fyrrum leikmann Newcastle.

Heimamenn í Newcastle komust yfir á 16 mínútu þegar Carroll skoraði með þrumuskoti af um 23 metra færi algjörlega óverjandi fyrir markmann City. Tim Krul kom svo í veg fyrir að City jafnaði með góðri markvörslu frá Martin Petrov úr aukaspyrnu. En hann kom engum vörnum við þegar Benjani skallaði í markið af stuttu færi þegar um 30 mínútur voru liðnar af leiknum. Staðan var því 1-1 í hálfleik en stuttu eftir hlé áttu Xisco og Vuckic ágæt færi sem ekki nýttust. Andy Carroll skoraði sigurmark leiksins á 63 mínútu eftir sendingu frá Frank Danquah. City pressaði nokkuð í lokin en Newcastle náði að halda fengnum hlut og eru ósigraðir í átta leikjum. Danny Guthrie þurfti að fara af velli í fyrri hálfleik vegna hné meiðsla en þau eru ekki talin vera alverleg og ætti hann að vera klár um næstu helgi.

NUFC: Krul, Tavernier, Lough, Edgar, Morris, Smith, Doninger, (Godsmark 61), Guthrie (Vuckic 40), Xisco (Danquah 51), Ranger, Carroll.

Ónotaðir varamenn: Ferguson, Taylor.

Áhorfendur:1,457. (Þar á meðal Alan Shearer, Ian Dowie, Chris Hughton, Habib Beye, Sebastien Bassong, Joey Barton, Kevin Nolan og Fabricio Coloccini.

(FB)

7.Apr

7500 áhorfendur á æfingu á St James´ Park

Alan Shearer hélt ákvað að bjóða áhorfendum að mæta og horfa á æfingu hjá liðinu í dag og það þarf ekki að spyrja að því þegar um er að ræða Newcastle áhangendur, það mættu 7500 á völlinn í morgun til að sjá leikmenn á æfingu. Alan Shearer tók sjálfur þátt í æfingunni og sagði:

"Ég sagði við strákana, hvar annarsstaðar mynduð þið fá nokkur þúsund áhorfendur koma og horfa á þriðja neðsta liðið á æfingu ?

"Þetta hefur verið frábær dagur og strákarnir hafa notið hans. Þetta var fín æfing og nú erum við að undirbúa okkur fyrir erfiðan leik gegn Stoke á laugardaginn"

Menn sáu til Joey Barton og Mark Viduka taka þátt í léttum æfingum en það styttist í að þeir verði leikfærir. Myndbrot frá æfingunni má sjá hér.

(FB)

6.Apr

Shearer skoðar varaliðið í kvöld

Varalið Newcastle spilar gegn varaliði Man City í kvöld á St James´ Park og verða nokkrir leikmenn úr aðalliðinu sem munu taka þátt í leiknum. Alan Smith, Danny Guthrie, Andy Carroll, David Edgar og Xisco eru allir í hópnum ásamt ungu strákunum Tim Krul og Nile Ranger.

Alan Shearer: "Ég mun horfa á leikinn í kvöld. Það eru allir að berjast um sæti í liðinu núna og það mun ég segja strákunum sem spila í kvöld. Þetta er gott tækifæri fyrir mig að sjá þessa stráka spila".

(FB)

6.Apr

Góðar fréttir af Bassong og Taylor

Alan Shearer er vongóður að hafa þessa tvo tilbúna í slaginn gegn Stoke um næstu helgi. Bassong og Taylor misstu báðir af leiknum gegn Chelsea vegna meiðsla sem þeir hlutu í leiknum gegn Arsenal þann 21 mars. Það voru líkur á að þeir myndu ná leiknum gegn Chelsea og Alan Shearer hafði þetta um málið að segja: "Þeir voru ekki langt frá því að spila á laugardaginn gegn Chelsea. Sebastien var nær því heldur en Steven. En það hefði verið mikil áhætta að láta hann spila vegna þess að hann var bara 85% leikfær. Við gerum okkur grein fyrir að við eigum bara sjö leiki eftir og ef hann hefði spilað og fengið bakslag þá hefðum við sennilega misst hann enn lengur. Svo að vonandi með því að sleppa þessum leik þá verða þeir báðir klárir í þessa sjö leiki".

Það eru einnig góðar fréttir af Peter Lovenkrands en hann var fluttur á sjúkrahús á laugardaginn þegar hann fékk slæmt högg á bakið gegn Chelsea. Shearer staðfesti að hann hefði verið útskrifaður af sjúkrahúsinu seinna um kvöldið.

(FB)

4.Apr

Newcastle - Chelsea 0-2

(Lampard 56, Malouda 65)

(Boltinn er greinilega fyrir innan marklínuna)

Enn eitt tapið á St James´ Park

Það var enginn draumabyrjun hjá Alan Shearer í dag þegar Newcastle mætti sterku liði Chelsea á St James´ Park. 0-2 tap líkt og á síðasta tímabili og voru mörkin sem Chelsea skoraði frekar ódýr og hreinlega gjöf frá varnarmönnum Newcastle. Það munar mikið um þá Bassong og Taylor sem voru ekki með í dag vegna meiðsla. Fyrir vikið þurfti Habib Beye okkar besti hægri bakvörður að spila í miðverðinum ásamt Coloccini sem átti klárlega sinn slakasta leik fyrir Newcastle frá því hann kom til liðsins. Hann átti alla sök á því að Chelsea skoraði fyrsta mark sitt. Hann náði ekki að hreinsa frá þegar hann fékk frekar auðvelda sendingu til baka og horfði svo á Lampard skalla í autt markið eftir að boltinn hafði farið í slánna eftir skot Anelka. Annað mark Chelsea var einnig gjöf að mínu mati, Peter Chech tók útspark og Lampard skallaði boltan niður til Malouda sem skoraði auðveldlega framhjá Harper í markinu. Newcastle náði svo stuttu seinna að koma boltanum yfir línuna þegar Owen átti skot að marki sem hrökk af varnarmanni Chelsea en Ashley Cole hreinsaði frá markinu. Boltinn greinilega yfir marklínuna en línuvörðurinn var ekki á sama máli og virðist ekkert falla með Newcastle þessa dagana. Chelsea fékk svo dauðafæri í lokin en Harper varði glæsilega frá Kalou sem slapp einn í gegn þegar títtnefndur Coloccini var að gæta hans.

Eitt sinn var St James´ Park nánast óvinnanlegt vígi en nú hefur liðið tapað sex leikjum á heimavelli og aðeins unnið fjóra af þeim sextán leikjum sem hafa verið spilaðir þar í vetur. Alan Shearer og Ian Dowie eiga geysilega erfitt verkefni fyrir höndum en þeir verða að vinna 3-4 leiki af þeim sjö sem eftir eru til að bjarga sér frá falli. Ég vona að Bassong og Taylor verða tilbúnir í næsta leik sem er á útivelli gegn Stoke um næstu helgi og Colcoccini fái að verma bekkinn í fyrsta sinn í vetur. Vörnin verði því svona: Beye, Taylor, Bassong, Enrique.

Peter Lovenkrands þurfti að fara af velli rétt fyrir lok fyrri hálfleiks þegar hann fékk slæmt högg á bakið og átti hann erfitt með andardrátt. Hann var fluttur á sjúkrahús til skoðunar en samkvæmt síðustu fréttum er hann ekki mikið slasaður og ætti að vera klár um næstu helgi. Eftir leikinn sagði Shearer: "Við verðum að hætta að fá á okkur svona ódýr mörk, það gera allir mistök en það er ekki afsökun. Við spjölluðum saman í búningsklefanum eftir leikinn og við vitum hvað þarf að gera. Að vita og framkvæma eru tveir ólíkir hlutir en við munum reyna því get ég lofað. Við eigum mjög erfiðan leik næstu helgi gegn Stoke þar sem við verðum að ná úrslitum.

NUFC: Harper, R Taylor, Beye, Coloccini, Enrique, Jonas, Butt, Nolan (Guthrie 69), Lovenkrands (Duff 44), Martins (Carroll 81), Owen.

Ónotaðir varamenn: Forster, Smith, Geremi, Edgar.

Skot (á mark): Nufc 6(4) - Che 16(10)

Hornspyrnur: Nufc 4 - Che 6

Áhorfendur: 52,112 (fullt hús á SPJ í dag og er það aðeins í þriðja sinn í vetur sem það gerist)

Maður leiksins: Erfitt val en Steve Harper fær mitt atkvæði í dag.

(FB)

3.Apr

Owen endurnærður

Michael Owen er mjög ánægður með ráðningu Alan Shearer og segist vera endurnærður.

"Ég er virkilega ánægður að fá Alan hingað sem stjóra. Ég fylgdist með honum þegar ég var krakki. Ég dáðist að honum sem leikmanni og fékk tækifæri að spila með honum með Newcastle fyrir nokkrum árum, sem var frábært. Nú er nýr kafli í þessari sögu að hefjast, núna er hann stjórinn minn. Hverjum hefði dottið það í hug ? Ráðning hans var akkúrat það sem við þurftum til að gefa okkur auka innblástur og ákafa. Það hafa allir lagt harðar að sér eftir ráðningu hans. Þetta er virkilega spennandi og það er mikill spenningur í loftinu hérna. Það eru ekki margir sem hefðu komið hingað og haft þessi áhrif á klúbb eins og þennan. Það eru allir með rétt hugarfar og ef við náum jákvæðum úrslitum þá getur þetta haft góð áhrif á framhaldið. Síðustu átta leikirnir eru eins og nýr kafli. Við vitum að við getum gert ýmislegt gegn bestu liðinum og við fáum tækifæri til að sanna okkur gegn toppliði Chelsea".

Owen hefur skorað 30 mörk í 72 leikjum síðan hann kom til Newcastle árið 2005. Nú vonum við bara að þessi mikli markaskorari fari í gang í þeim átta leikjum sem Newcastle á eftir.

(FB)

3.Apr

Newcastle - Chelsea

Fyrsti leikur Newcastle undir stjórn Alan Shearer er heimaleikur gegn Chelsea kl 14:00 á morgun laugardag.

Þegar þetta er ritað er enn óvíst hvort þeir Bassong, Taylor og Duff verði leikfærir og verður tekin ákvörðun um þessa leikmenn á morgun. Shola Ameobi er frá vegna meiðsla á ökkla. Um meiðslamál sagði Shearer: "Bassong og Taylor eru að jafna sig. Ég er ekki búinn að útiloka þá, það mun vera á síðustu stundu sem ákvörðun verður tekinn. Duff æfir í dag (föstudag) en Ameobi verður ekki með. Carroll er búinn að æfa og það kom ekkert bakslag hjá honum. Fyrir utan langtímameiðsli leikmanna eins og Barton, Viduka og Gonzales, þá er þetta í lagi hjá okkur. Það eru þessi meiðsli en ég tel okkur hafa nógu góðan leikmannahóp". En um leikinn gegn Chelsea sagði hann: "Fólk segir að við munum ekki fá neitt út úr þessum leik, ég sætti mig ekki við það. Chelsea eru í baráttu um titilinn og eru í fjórðungsúrslitum meistaradeildarinnar en samt sem áður tel ég þetta fínan leik fyrir okkur. Ef við fáum ekkert útúr þessum leik og liðin fyrir ofan okkur vinna sína leiki þá verða þau fimm stigum á undan okkur. Við viljum það ekki, við verðum að ná einhverju úr þessum leik".

Það er ómögulegt að segja hvernig Shearer mun stilla upp liðinu en það má reikna með einhverjum breytingum. Shearer lýsti því yfir á blaðamannafundi í gær að Owen myndi byrja inná og hefur hann mikla trú á Owen. Líklegt byrjunarlið er kannski svona: Harper, Beye, Coloccini, Bassong, Enrique, Jonas, Nolan, Butt, Lovenkrands, Martins, Owen.

Ég myndi vilja sjá Guthrie á miðjunni í stað Butt en það er bara mín skoðun. Ef Bassong og Taylor verða ekki með má reikna með að Cacapa eða Edgar verði í miðverðinum ásamt Coloccini.

Fyrri leikur liðanna endaði með 0-0 jafntefli á Stamford Bridge í nóvember en leikur liðanna á SJP á síðasta tímabili endaði með 0-2 sigri Chelsea.

Leikmannahópurinn:

Harper, Forster, Krul, S Taylor, Beye, Bassong, Coloccini, Enrique, Edgar, Cacapa, Butt, Duff, R Taylor, Gutierrez, Nolan, Guthrie, Lovenkrands, Geremi, Smith, Martins, Owen, Carroll, Xisco.

Dómari leiksins verður Rob Styles.

(FB)

3.Apr

(U18) Newcastle - Sheffield Wedensday 3-1

Ungmennalið Newcastle tók á móti ungmenna liði Sheffield Wedensday í dag og var engin annar en Alan Shearer með Ian Dowie sér við hlið sem voru á meðal áhorfenda og hefur það mjög líklega gefið strákunum aukin kraft. Það var hinn bráðefnilegi Wesley Ngo Baheng sem kom heimamönnum yfir eftir 14 mínútur með skoti af stuttu færi. Á 21 mínútu komust Newcastle strákarnir í 2-0 með marki frá sænska sóknarmanninum Samuel Adjei en þetta var hans fyrsta mark fyrir félagið. Svo á 75 mínútu kom smá vonarglæta hjá Sheffield þegar þeir náðu að minnka munninn í 2-1 eftir smá samskipta örðuleika á milli markvarðarins Jak Alnwick og varnar Newcastle og gátu Sheffield menn rúllað boltanum í autt mark Newcastle. Það var svo í uppbótartíma sem Dan Williams gulltryggði strákunum öll stigin í dag og verður það að teljast sanngjörn úrstlit.

NUFC: Alnwick, Tavernier, Dummett, McDermott (Williams 55), Taylor, Henderson, Adjei (Spear 46), Inman, Baheng, Danquah (Folan 90), Ferguson.
Ónotaðir varamenn: Robinson, Archer.

(ÞV)

2.Apr

Shearer: "Ég hef trú á að við höldum okkur uppi"

Alan Shearer hefur trú á að Newcastle nái að halda sér í deildinni í þeim átta leikjum sem eftir eru. Hann hefur verið í viðtali á heimasíðu Newcastle og hafði hann ýmislegt að segja. "'Ég vil hafa það á hreinu að þetta snýst ekki um mig heldur um Newcastle United. Ég var spurður hvort ég gæti hjálpað þeim að halda sætinu í deildinni og þess vegna er ég hér - Ég elska þetta félag. Þetta er erfið staða sem við erum í en ég hef trú á að við náum að bjarga okkur. Við erum með marga góða leikmenn hérna, en sjálfstraust leikmanna er ekki mikið þessa stundina og það er mitt verk að breyta því. Þetta er erfitt, við erum með menn í meiðslum, en ég lofa ykkur einu, við munum gera okkar allra besta. En ég mun leita til allra leikmanna og fá þá til að rífa þetta lið upp, taka skref fram á við og ná þeim úrslitum sem við þurfum til að halda okkur í deildinni"

Alan Shearer sem hefur enga reynslu af stjórastarfi fékk Ian Dowie til að vera aðstoðarmaður sinn og segir Shearer að reynsla Dowie komi til með að skipta miklu máli. "'Ég kem inn í þetta með enga reynslu en ég fékk Ian Dowie mér til aðstoðar og á hann eftir að spila stórt hlutverk. Hann hefur verið stjóri áður og hefur verið í þessari stöðu áður sem er ómetanlegt. Hann er góður þjálfari og leikmönnum mun líka vel við hann. Þetta er stórt verkefni en okkur hlakkar til að byrja.

Fyrsta verkefni þeirra verður gegn stórliði Chelsea á laugardaginn og hefur Shearer hvatt leikmenn til að einbeita sér að því verkefni. Hann bætti við "Það eru góðir leikmenn hérna en einhverra hluta vegna hafa þeir ekki sýnt hvað þeir geta. Þetta er búið að vera erfitt tímabil en ég er ekki að velta mér uppúr fortíðinni. Ég hef bara áhuga á næstu átta leikjum, sá fyrsti er gegn Chelsea á laugardaginn. Ég mun segja leikmönnum þetta - "Sjáið til, gleymið því sem hefur gengið á. Við erum í þessari stöðu sem við erum í vegna þess að úrslit hafa ekki verið okkur í hag útaf ýmsum ástæðum, meiðsli, slakt form eða ekkert sjálfstraust. Það skiptir ekki máli núna, við byrjum á laugardaginn" sagði meistari Shearer að lokum.

(FB)

2.Apr

Shearer: "Ég vill fá fleiri mörk frá Owen"

Michael Owen hefur ekki skorað síðan í janúar í leik gegn West Ham sem endaði

2-2. Owen hefur ekki verið í náðinni hjá Fabio Capello landsliðsþjálfara Englands þrátt fyrir mikil meiðsli sóknarmanna. Alan Shearer hefur hinsvegar mikla trú á Owen og hefur sagt að hann muni byrja inná á laugardaginn gegn Chelsea. "Ég vill bara sjá Michael skora mörk. Hann hefur gert það allan sinn feril. Ég er búinn að tala við hann og hef beðið hann að setja nokkur í þeim leikjum sem eftir eru.

(FB)

1.Apr

Yfirlýsing frá Newcastle

Newcastle hefur staðfest endurkomu Alan Shearer til félagsins og mun hann stýra liðinu síðustu átta leikina í deildinni. Shearer mun taka strax við stjórn liðsins og Ian Dowie verður aðstoðarmaður hans. Félagið tekur þessa ákvörðun í ljósi þess að Joe Kinnear er enn að jafna sig eftir hjartaaðgerð fyrir nokkru.

Chris Hughton og Colin Calderwood munu halda áfram sínum störfum sem þjálfarar liðsins. Stjórnarformaður Newcastle Derek Llambias sagði: "Allir hér hjá félaginu eru í skýjunum að Alan vildi taka þessari áskorun. Við finnum fyrir mikilli ánægju hér í Newcastle. Þessar fréttir hafa gefið öllum mikla lyftistöng".

Shearer mun stýra fyrstu æfingu liðsins á morgun og í kjölfarið verður blaðamannafundur þar sem hann mun taka við spurningum frá blaðamönnum.

Það var svo einnig staðfest að Dennis Wise hefur látið af störfum hjá Newcastle sem yfirmaður fótboltamála. Ekki stendur til að ráðið verði í stöðu hans.

(FB)

1.Apr

Úthreinsun hafin á St James´Park ?

Samkvæmt fréttum verða töluverðar breytingar á þjálfarateymi Newcastle við ráðningu Shearer. Þar má fyrst nefna að Dennis Wise verður látin fjúka og kætast þá margir en hann hefur ekki verið vinsæll í Newcastle. Wise var ekkert hafður með í ráðum varðandi ráðningu Shearer og hefur Sherar lýst yfir því að hann myndi ekki vinna undir óbreyttum aðstæðum talið er að

Wise hafi verið aðalástæðan á því að Keegan fór frá liðinu í september.

Ian Dowie er sagður vera skipaður aðstoðarmaður Shearer. Dowie hefur stýrt liðum eins og QPR, Coventry, Charlton og Crystal Palace. Rob Lee hefur einnig veri' nefndur til sögunnar sem þjálfari hjá Newcastle. Fyrrum sjúkraþjálfari Newcastle Paul Ferris mun einnig ganga til liðs við Newcastle á ný. Hvað verður um Chris Hughton og Colin Calderwood hefur ekki enn komið fram í fréttum, ólíklegt er að þeir verði látnir fara frá félaginu.

Mike Ashley virðist loksins hafa sannfært Shearer til að koma til Newcastle og hjálpa liðinu í þeim vandræðum sem liðið er í. Það er alveg ljóst að Alan Shearer hefur sett nokkur skilyrði og er brotthvarf Dennis Wise eitt af þeim.

Næsti leikur liðsins er á laugardaginn gegn Chelsea og verður virkilega gaman að sjá stemminguna á St James´ en eins og allir stuðningsmenn Newcastle vita að þá er Shearer í algjörri guðatölu hjá heimamönnum í Newcastle.

Enn er beðið eftir yfirlýsingu frá Newcastle en það má reikna með henni seinna í dag.

(FB)