Newcastle Klúbburinn á Íslandi

Fréttir í febrúar 2009

28.Feb

Bolton - Newcastle

Newcastle heimsækir Bolton á sunnudaginn kl 13 og er þetta sannkallaður sex stiga leikur. Bolton er tveimur sætum fyrir ofan Newcastle í deildinni og með tveimur stigum meira. Með sigri getur Newcastle mjakað sér aðeins frá fallbaráttunni en að sama skapi ef þessi leikur tapast þá er liðið í hópi neðstu liða áfram.

Kevin Nolan byrjar að afplána þriggja leikja bann sitt og mætir því ekki fyrrum liðsfélögum sínum í Bolton. Danny Guthrie hefur ekki náð fullum bata og verður ekki með.

Aðrir leikmenn sem eru frá vegna meiðsla eru: Michael Owen, Ignacio Gonzalez, Xisco, Habib Beye og Joey Barton. Andy Carroll er orðinn leikfær og gæti hugsanlega verið á bekknum.

Newcastle náði í ágætt stig um síðustu helgi gegn Everton eftir að hafa verið einum færri allan seinni hálfleikinn. Chris Houghton þarf að gera breytingu á byrjunarliðinu frá síðasta leik og eru nokkrir möguleikar í stöðunni. Geremi gæti komið inn á miðjuna í stað Nolan, Alan Smith gæti líka komið í stöðu Nolan og er það sennilega líklegra að Houghton velji Smith en hann kom einmitt inná gegn Everton í sínum fyrsta leik á tímabilinu. Ég ætla rétt að vona að Martins byrji inná á sunnudaginn og Houghton sjái nú sóma sinn í því að gefa Ameobi frí í nokkra leiki eða bara út tímabilið. Vörnin þótti standa sig mjög vel í leiknum gegn Everton og verður óbreytt nema eitthvað óvænt komi uppá.

Jose Enrique spilaði sennilega sinn besta leik fyrir Newcastle og Bassong átti einnig frábæran leik. Coloccini og Steven Taylor áttu einnig mjög góðan leik. Jonas Gutierrez á að byrja inná, enginn spurning með það. Þannig að líklegt byrjunarlið er þá svona: Harper, S Taylor, Colo, Bassong, Enrique, R Taylor, Smith, Butt, Jonas, Lovenkrands og Martins. Þetta finnst mér vera líklegasta uppstillingin en þetta er engin óskauppstilling með þá Butt og Smith á miðjunni. Viduka gæti líka byrjað inná í stað Lovenkrands en hann virðist loksins vera orðinn heill eftir mikil meiðsli í vetur.

Fyrri leikur liðanna á þessu tímabili sem var fyrsti heimaleikur Newcastle á tímabilinu og með Kevin Keegan í stjórastólnum endaði með 1-0 sigri okkar manna og var það Michael Owen sem skoraði sigurmarkið. Leikur liðanna á Reebok Stadium á síðasta tímabili endaði með 1-3 sigri Newcastle og skoruðu N´Zogbia og Oba Martins (2) mörk okkar manna.

Hér eru nokkrar athyglisverðar staðreyndir.

# Newcastle hefur ekki tapað deildarleik í vetur þar sem þeir eru fyrri til að skora, unnið sex og gert þrjú jafntefli af níu leikjum.

# Newcastle hefur ekki unnið leik í vetur ef þeir eru fyrri til að fá á sig mark, gert fjögur jafntefli og tapað 10 af 14.

# Newcastle hefur fengið á síg níu vítaspyrnur í úrvalsdeildinni á þessu tímabili, flest allra liða. Átta hafa endað í markinu.

# Newcastle hefur ekki unnið tvo útileiki í röð í deildinni frá 2006 eða síðan liðið vann granna sína í Middlesbrough (1-2) og Sunderland (1-4) þann 9 og 17 apríl 2006.

Leikmannahópur Newcastle: Harper, Krul, Forster,

S Taylor, Bassong, Coloccini, Enrique, Edgar, Cacapa, Geremi, R Taylor, Butt, Duff, Lovenkrands, Ameobi, Jonas, Smith, Viduka, Martins, Carroll.

Dómari leiksins verður Alan Wiley

(FB)

26.Feb

Butt: "Við verðum að halda áfram hala inn stigum"

Newcastle er núna fimm stigum frá fallsæti og Nicky Butt segir að liðið verði að halda áfram að hala inn stigum til að losna vil falldrauginn.

"Við erum með smá forskot núna en það getur verið fölsk öryggiskennd.

Það eru þarna um tíu lið sem dragast þarna niður ef það tapast einn eða tveir leikir en að sama skapi ef þú vinnur einn eða tvo leiki þá fjarlægist maður fallsætin. Við verðum að halda áfram að bæta við okkur stigum. Það er mikill andlegur munur á að gera jafntefli eða að tapa. Við eigum erfiða leiki framundan (Man Utd, Arsenal og Chelsea eru næstu heimaleikir) og við verðum að standa okkur á heimavelli. Við höfum tapað of mörgum stigum á heimavelli í vetur og við verðum að breyta því. Á milli þessara leikja verðum við að fara taka stig á útivelli gegn liðum sem við vitum að við getum unnið. Þetta er erfið staða sem við erum í en við verðum að standa saman" sagði Butt.

(FB)

26.Feb

Tæpar 16 þúsund heimsóknir frá áramótum

Nú hafa rétt um 16 þúsund manns heimsótt síðuna frá áramótum og er það örlítið betra en á sama tíma í fyrra.

Það gerir að meðaltali um 280 heimsóknir á dag.

Eins og sjá má hér til hliðar þá er kominn teljari á síðuna og er markmiðið að ná yfir 80 þúsund heimsóknum á þessu ári en á síðasta ári vorum rétt tæpar 79 þúsund heimsóknir á síðuna.

(FB)

25.Feb

Enrique ósáttur við að missa lykilleikmenn

Spánverjinn Jose Enrique segir að það hafi verið mikill missir að selja leikmenn eins og James Milner, Shay Given og Charles N´Zogbia en hann sé engu að síður ánægður á St James´ Park. Enrique: "Ég hef verið ósáttur þetta tímabil vegna þess í hvaða stöðu við erum í. Þetta hefur verið erfitt fyrri alla. En við viljum rífa þetta lið upp. Við höfum átt við mikil meiðsli að stríða í vetur en menn eru að snúa til baka hægt og rólega. En það þarf samt að styrkja hópinn. En við erum sannfærðir að vera öruggir í deildinni. Ég kom hingað til keppa um titla. Ég kom hingað til að spila í Evrópukeppninni, allavega í UEFA keppninni. Meistaradeildin er kannski erfiðara markmið. En við eigum að vera keppa um betra sæti í deildinni. Þetta félag er með stóra og mikla sögu og við verðum að fá góðu dagana til baka. Ég er reiður vegna þess að við erum í slæmri stöðu. Við höfum frábæra aðstöðu og góða leikmenn svo að það er erfitt að skilja þetta".

(FB)

25.Feb

Habib Beye setur stefnuna á leikinn gegn Arsenal

Beye hefur verið frá keppni síðan hann meiddist á ökkla í leik gegn Wigan á annan dag jóla þegar títtnefndur Lee Cattermole braut illa á honum. Eftir að hafa farið til þriggja sérfræðinga og einnig talað við sjúkrateymi Newcastle þá vildi Beye ekki fara í aðgerð.

Og hann hefur sett stefnuna á að verða leikfær í leikinn gegn Arsenal þann 21 mars. Hann viðurkennir þó að leikurinn gegn Chelsea 4 apríl sé kannski líklegri.

"Þetta hefur verið erfitt tímabil hjá okkur en vonandi næ ég að spila eitthvað í lok tímabilsins. Læknirinn sagði við mig að ég yrði frá í fimm til sex vikur. Ég vil snúa til baka fyrr, en það mikilvægasta er að ég finn ekkert til í ökklanum þegar ég sný til baka. Það er engin ástæða að flýta sér of mikið þar sem ég hef beðið í þrjá mánuði. það er nógu langt, en ég er sannfærður að ég kem fyrr til baka.

Um atvikið þegar Cattermole braut á Beye sagði hann: "Þetta var erfiðasta reynsla mín á ferlinum, ég hélt að ég væri brotinn. Þegar ég kom á sjúkrahúsið var mikill léttir að vita að ég væri ekki brotinn. En þegar ég kom til Newcastle fór ég í skoðun og þá kom í ljós að liðböndin væru slitin. Venjulega þarf maður á aðgerð að halda. Skurðlæknir í London og Amsterdam sögðu að ég þurfti á aðgerð að halda, en ég hafði samband við læknirinn okkar. Við vissum að ég yrði frá í fjóra mánuði ef ég færi í aðgerð og einnig fjóra mánuði án aðgerðar og sjúkraþjálfun, svo við völdum að sleppa aðgerðinni. Þegar maður er 31 árs þá vill maður sleppa aðgerð og læknirinn sagði að það væri í lagi þar sem við höfum frábæra sjúkraþjálfara hér. Ég hef unnið með Hendo (David Henderson) á hverjum degi og ég finn ekkert til í ökklanum, en ég þarf að styrka mig til að verða klár í úrvalsdeildina".

Cattermole hefur ekki enn beðið Beye afsökunar á brotinu og fékk aðeins að líta gula spjaldið fyrir brotið. Hann braut einmitt illa á Didier Digard leikmanni Middlesbrough um síðustu helgi og verður Digard frá út tímabilið. Aðspurður um hvort hann hafi heyrt frá Cattermole sagði Beye: "Nei, hann hefur ekki sagt neitt. Hann fékk gult spjald en sendi einhvern á sjúkrahús. Eftir leik Wigan gegn Boro heyrði ég Steve Bruce segja að þetta hafi ekki verið ljótt brot á Digard, en hvað mig varðar þá var þetta ljótt brot. Ef þetta hefði verið einn af hans leikmönnum þá hefði hann ekki sömu skoðun. Svona er lífið, stundum gerist svona. Ég óska honum ekki ills.

(FB)

25.Feb

Derek Llambias: "Starf Joe Kinnear er öruggt"

Stjórnarformaður Newcastle Derek Llambias segir að Kinnear þurfi ekki að hafa áhyggjur af starfi sínu hjá félaginu svo lengi sem hann sé heill heilsu.

Llambias sagði:"Joe Kinnear er enn stjóri Newcastle og mun halda því áfram. Við erum ekki að reyna skipta honum út. Við viljum að hann haldi áfram sínu starfi

því við teljum hann rétta manninn í starfið. Okkur líkar við hann og við treystum honum. Það er okkur mjög mikilvægt. Það hefur verið sagt að við séum á eftir hinum og þessum stjóra en við viljum að Joe haldi áfram því starfi sem hann byrjaði. Auðvitað mun heilsa hans spila stórt hlutverk, ef hann fær ekki bakslag þá kemur hann aftur. Hann er hema hjá sér að slaka á og vill ólmur snúa til baka. Hann er sterkur og ég er sannfærður að hann kemur til baka. Sumir stuðningsmenn hafa efasemdir um að hann sé rétti maðurinn í starfið, en vonandi gefa þeir honum tækifæri á að sanna sig. Chris Houghton og Colin Calderwood stjórna liðinu í hans fjarveru. Chris hefur staðið sig vel. Hann er fullur sjálftrausts. Colin hjálpar til og Joe stendur á bak við þá. Við erum sáttir við þá stöðu og þetta verður svona. Þegar Joe er orðinn hress þá tekur hann við stjórninni aftur. Hann hefur sett stefnuna á leikinn gegn Stoke þann 11 apríl en það kæmi mér ekki á óvart ef hann kæmi fyrr.

(FB)

24.Feb

Nolan í þriggja leikja bann

Newcastle hefur fengið staðfestingu á þriggja leikja banni Kevin Nolan fyrir rauða spjaldið gegn Everton um síðustu helgi. Hann mun því missa af leikjunum gegn Bolton, Man Utd og Hull City.

(FB)

24.Feb

Þriðji sigurinn í röð

Það var Mark Doninger sem var hetja liðsins þegar varalið Newcastle lagði varalið Middlesbrough í 3-2 sigri á Witley Park í Newcastle. Mark Doninger skoraði þrjú mörk og tryggði Newcastle þriðja sigurinn í röð. Fyrsta markið kom rétt fyrir hálfleik og var staðan í hálfleik 1-0 fyrir Newcastle. Stuttu eftir að seinni hálfleikur byrjaði fékk Middlesbrough dæmda á sig vítaspyrnu. Það var Mark Doninger sem tók spyrnuna og kom okkar mönnum tveimur mörkum yfir. Eftir það breyttist leikurinn og Middlesbrough náði að jafna í 2-2. Newcastle stal svo sigrinum með marki á 93 mínútu eftir frekar jafnan leik.

Það var Alan Thompson sem stýrði varaliðinu í fyrsta sinn en hann var ráðinn í þjálfarateymi Newcastle síðasta sumar. Thompson er fyrrum leikmaður Newcastle og er einnig fæddur og uppalinn í Newcastle. Hann lék lengi með Bolton, Aston Villa og Celtic.

Newcastle : Krul, Tavernier, Dummett, Doninger, Taylor, Lough, Godsmark, LuaLua, Ranger, Danquah (Spear 83), McCrudden (Williams 58)

Ónotaðir varamenn: Soderberg, Bath, Neary.

(ÞV)

23.Feb

Bassong boðin nýr samingur ?

Sebastien Bassong hefur virkilega komið á óvart í vetur og í gær átti hann enn einn stórleikinn fyrir Newcastle. Bassong skrifaði undir þriggja ára samning síðasta sumar en hann hefur staðið sig svo vel að Newcastle ætlar að bjóða honum nýjan og betri samning. Bassong var keyptur á 1,5 milljónir frá Metz og eru þetta klárlega ein bestu kaupin í vetur. Hann er sagður vera í hópi lægst launaðra manna hjá Newcastle og eftir frammistöðu hans um helgina gegn Everton stendur til að bjóða honum betri samning. Vörn Newcastle þótti standa sig með mikilli prýði enda voru okkar menn einum færri í um 50 mínútur. "Við urðum að stnada saman eftir rauða spjaldið, þetta var bakslag en við komumst yfir það. Þetta var erfiður leikur en þetta var gott stig fyrir okkur. Ég er ánægður að við héldum hreinu of náðum góðum úrslitum. Það er ánægjulegt að vera kosinn maður leiksins, en ég er virkilega stoltur af liðsfélögum mínum fyrir þessa baráttu sem við sýndum. Eitt stig er allt í lagi en við hefðum getað fengið öll þrjú. Við erum ánægðir með úrslitin og vonandi getum við farið til Bolton og náð góðum úrslitum þar" sagði Bassong í viðtali við Shields Gazette.

(FB)

23.Feb

Lee Cattermole slátrar enn einum leikmanninum

Lee Cattermole leikmaður Wigan sendi enn einn leikmanninn á sjúkrahús núna um helgina og í þetta sinn var það Didier Digard hjá Middlesbrough sem varð fyrir barðinu á Cattemole og er reiknað með að hann verði frá keppni í nokkrar vikur. Eins og Newcastle aðdáendur vita þá hefur þessi leikmaður slátrað bæði Habib Beye og Joey Barton í vetur. Þessi leikmaður heldur hinsvegar áfram að spila og fær enga refsingu frá enska knattspyrnusambandinu þrátt fyrir að senda hvern leikmanninn af fætur öðrum á sjúkrahús. Svona leikmenn eiga ekki heima á knattspyrnuvellinum. Kevin Nolan fékk að líta rauða spjaldið fyrir sitt brot um helgina og fer í þriggja leikja bann fyrir það en Cattermole hefur aðeins fengið eitt gult spjald eftir þessi þrjú brot á Barton, Beye og Digard.

(FB)

22.Feb

Newcastle - Everton 0-0

(Kevin Nolan fær reisupassann í dag)

10 leikmenn Newcastle náðu að halda jöfnu

Jafntefli í dag gegn Everton eru sennilega sanngjörn úrslit miðað við gang leiksins, þó svo að tölfræðin sýni að Everton hefði kannski átt meira í leiknum þá segir það ekki alltaf alla söguna. Newcastle spilaði einum færri allan seinni hálfleikinn en Kevin Nolan fékk að líta rauða spjaldið undir lok fyrri hálfleiks. Nolan braut þá illa á Victor Anichibe leikmanni Everton og fékk beint rautt frá Lee Mason dómara leiksins. Hárréttur dómur hjá Mason og var Anichibe heppinn að brotna ekki illa eftir þessa tveggja fóta tæklingu frá Nolan. Anichibe fór útaf í hálfleik enda hlatraði hann mikið eftir tæklinguna frá Nolan.

Mín skoðun er sú að svona tæklingum á að útrýma og á svona brot ekkert skylt við fótbolta. Nolan fer vonandi bara í þriggja leikja bann en það kæmi mér ekki á óvart ef hann yrði dæmdur í lengra bann.

Everton varð fyrir miklu áfalli strax í byrjun leiks þegar Mikel Arteta varð að fara meiddur af velli og virtist hann sárþjáður.

Besta færi leiksins fékk Peter Lovenkrands í fyrri hálfleik en náði ekki að klára færið sitt.

Everton náði ekki að nýta sér liðsmuninn í seinni hálfleik og náði vörn Newcastle að halda aftur öllum sóknartilburðum gestanna.

Alan Smith kom inná á 77 mínútu og var þetta fyrsti leikur hans á tímabilinu með Newcastle. Oba Martins kom einnig inná sem varamaður fyrir arfaslakan Ameobi og var þetta fyrsti leikur Martins í tvo mánuði. Þeir náðu ekki að gera neitt af viti í dag og man ég ekki eftir að Smith hafi komið við boltann.

Bæði Chris Houghton og David Moyes sögðu eftir leikinn að brotið hjá Nolan hafi ekki verið viljaverk.

"Ég held að þetta hafi ekki verið viljandi gert hjá Nolan og hann hefur beðið bæði leikmanninn og David Moyes afsökunar. Þann stutta tíma sem hann hefur verið hjá okkur þá höfum við séð hverskonar strákur hann er og hann er mjög heiðarlegur leikmaður. Kevin er mikill keppnismaður eins og Nicky Butt og Steven Taylor. Þetta var ekki góð tækling en okkar mat er að hann tímasetti hana illa en hún var ekki viljandi".

David Moyes: "Þetta var rautt spjald og þetta var slæm tækling en ég þekki ekki Kevin Nolan sem þannig leikmann. Ég hef verið leikmaður sjálfur og ég hef aldrei vitað af leikmanni sem gerir þetta viljandi. Hann hefur beðist afsökunar og málið er búið".

Chris Houghton stillti upp sama byrjunarliði og gegn WBA. Ég skil ekki af hverju þegar þú ert með menn eins og Jonas Gutierrez og Oba Martins leikfæra, klárlega tvo af bestu mönnum liðisins þá notar maður þá í byrjunaliðinu. En það er bara mín skoðun, sennilega hefur Houghton ekki viljað breyta liðinu eftir sigurleikinn gegn WBA.

NUFC: Harper, Steven Taylor, Bassong, Coloccini, Jose Enrique, Ryan Taylor, Butt, Nolan, Duff (Gutierrez 46), Ameobi (Martins 58), Lovenkrands (Smith 77).
Ónotaðir varamenn: Krul, Cacapa, Geremi, Viduka.

Rautt spjald: Nolan 44 mínútu.

Skot (á mark): Nufc 4 (0) - Eve 15 (5)

Hornspyrnur: Nufc 0 - Eve 6

Áhorfendur: 47,683

Maður leiksins: Sebastien Bassong (Virkilega góður í dag og stoppaði margar sóknarlotur Everton)

(FB)

22.Feb

Derby U18 - Newcastle U18 2-4

Þrjú mörk á lokamínútum leiksins tryggðu ungu strákunum sigur gegn Derby í gær. Newcastle hafði lent tvisvar undir en náðu að tryggja sér sigur á Moor Farm. Staðan var 1-0 í hálfleik en þegar sex mínútur voru liðnar af seinni hálfleik hafði hinn ungi og bráðefnilegi Haris Vuckic jafnað leikinn þegar hann slapp einn í gegnum vörn heimamanna. Derby komst svo aftur yfir aðeins þrem mínútum seinna. Bæði lið gerðu sitt besta á erfiðum vellinum og ekki var rokið til að bæta aðstæður. Vuckic átti svo glæsilegt skot af löngu færi en markmaður Derby varði glæsilega. Eins og áður sagði skoraði gerði Newcastle þrjú mörk á síðustu tíu mínútunum og voru þar að verki Jeff Henderson, Dan Williams og Michael McCrudden sem skoruðu mörkin. Glæsilegur sigur hjá strákunum og eiga þeir nú í harðri baráttu við granna sína í Sunderland um sigur í sínum riðli en stöðuna í þeirra riðli má sjá hér fyrir neðan.

NUFC: Soderberg, Tavernier, Ferguson, Henderson, Dummett, Inman, Godsmark, McCrudden, Williams, Ranger, Vuckic.

Ónotaðir varamenn: Bath, Johnson, McGorrigan, Page, Mogwo.ðir varamenn: Bath, Johnson, McGorrigan, Page, Mogwo.

(FB)

21.Feb

Styttist í Spiderman fagnið ?

Jonas Gutierrez hefur lofað alvöru fagni þegar hann skorar sitt fyrsta mark fyrir félagið. Jonas var svekktur að missa af sigurleiknum gegn WBA fyrir tveimur vikum síðan en nýtti landsleikjafríið vel og skoraði sitt fyrsta mark fyrir landslið Argentínu þegar þeir unnu landslið Frakka 2-0. Jonas var frægur fyrir að setja á sig Spiderman grímu þegar hann skoraði fyrir sitt fyrra félag Real Mallorca. Jonas sagði í dag:

"Ég vill skora fyrir aðdáendur. Ég er búin að ákveða hvernig ég ætla að fagna markinu, en það mun koma í ljós þegar ég skora fyrsta markið. Ég vill skora í hverjum leik. Ég hef fengið tækifæri, en hef ekki nýtt þau. Vonandi kemur fyrsta markið á morgun gegn Everton. Mér líður vel í liðinu og sjálfstraust er mjög mikilvægt. Ég spilaði ekki gegn WBA en ég var mjög ánægður vegna þess að við þurftum á þessum stigum að halda og við unnum, það er mjög mikilvægt".

(FB)

20.Feb

Newcastle - Everton

Newcastle fær David Moyes og lærisveina hans í Everton í heimsókn á St James´ Park á sunnudaginn kl 16.00. Þetta verður vafalaust erfiður leikur fyrir okkar menn enda er Everton með mjög gott lið og hefur Moyes gert frábæra hluti með þetta lið. Everton hefur gengið mjög vel á útivelli í vetur og hafa þeir fengið fleiri stig á útivelli en á heimavelli.

Chris Houghton þarf að gera upp á milli nokkurra sóknarmanna sem gera tilkall í byrjunarliðið. Oba Martins, Mark Viduka og Alan Smith eru allir orðnir leikfærir en þeir Lovenkrands og Ameobi spiluðu saman í framlínunni í síðasta leik. Jonas Gutierrez er klár í slaginn aftur eftir að hafa tekið út leikbann gegn WBA í síðustu umferð. Það verður því erfitt fyrir Houghton að velja liðið í þetta sinn og hefur þessi staða ekki komið upp í vetur að svona margir séu leikfærir.

En eru samt nokkrir meiddir og þar af nokkrir sem myndu hæglega byrja inná. Joey Barton (ristarbrotinn), Habib Beye (ökklameiðsli), Andy Carroll (ökklameiðsli), Ignacio Gonzalez (hásin), Danny Guthrie (aftan í læri), Michael Owen (ökklameiðsli), Xisco (tábrotinn) eru allri frá en það styttist í þá alla og ekki veitir af liðstyrk í lokabaráttuna. Chris Houghton segir að það sé freistandi að láta Martins byrja inná gegn Everton en hann hefur ekki spilað síðan um miðjan desember. "Hann hefur verið frá í nokkurn tíma og við verðum að meta hvernig hann hefur staðið sig á æfingum síðan hann snéri til baka, en þetta er ánægjulegt vandamál og við verðum bara að sjá til á sunnudaginn" sagði Houghton. Hann bætti svo við: "Þetta hlé sem við höfum fengið núna hefur verið mikilvægt, maður vill auðvitað spila leiki en það sem kom fyrir Joe Kinnear hefur gefið okkur smá tíma til að meta stöðuna. Við höfum fengið leikmenn til baka úr meiðslum og fengið tækifæri til að þjappa okkur saman. Hlutirnir eru stöðugri og þetta verður tækifæri til að færa okkur lengra frá fallbaráttunni".

Margir eru á því að það eigi að hvíla Coloccini en hann hefur ekki verið að spila vel undanfarið og vilja fá Bassong og S Taylor í miðverðina. Það er erfitt að segja til um hvernig byrjunarliðið verði á sunnudaginn en ég ætla að skjóta á að það verði svona: Harper, R Taylor, Bassong, Colo, Enrique, Jonas, Nolan, Butt, Duff, Lovenkrands, Martins. En auðvitað er þetta bara ágiskun hjá mér :)

Fyrri leikur liðanna í vetur endaði með 2-2 jafntefli og voru það S Taylor og Duff sem skoruðu mörk okkar manna. Það var einmitt fyrsti leikur Newcastle undir stjórn Joe Kinnear. Leikur liðanna á SJP á síðasta tímabili endaði með 3-2 sigri okkar manna og skoruðu Butt, Emre og Owen mörk Newcastle.

Leikmannahópur Newcastle: Harper, S Taylor, Bassong, Coloccini, Enrique, R Taylor, Butt, Nolan, Duff, Lovenkrands, Ameobi, Jonas, Smith, Viduka, Martins, Edgar, Forster, Cacapa, Geremi, Edgar, Donaldson.

Dómari leiksins verður Lee Mason.

(FB)

20.Feb

Steven Taylor: "Enginn ástæða að við getum ekki unnið Everton"

Newcastle sýndi mikla samheldni og baráttu í leiknum gegn WBA með þá Lovenkrands, Nolan og R Taylor fremsta í flokki og Steven Taylor er sannfærður að liðinu muni ganga vel á sunnudaginn. Í viðtalið við The Evening Chronicle sagði hann: "Við verðum að standa saman eins og við gerðum síðustu 15 mínúturnar gegn WBA þegar við sýndum mikinn karakter. Við erum í fallbáráttu og við vitum það. Everton er með mikla samheldni líka og við verðum að sýna það líka. Það er enginn ástæða að við getum ekki unnið þá eða hvaða lið sem kemur hingað til Newcastle. Ég held að síðustu 15 mínúturnar gegn WBA hafi verið þær lengstu af ferlinum mínum. Þetta skipti okkur svo miklu máli, við höfðum lagt svo hart að okkur og við getum tekið mikið sjálfstraust úr þessum leik.

Taylor er kominn með fjögur gul spjöld og þarf aðeins eitt í viðbót til að fara í leikbann en hann segist ekki hugsa um það. "Þegar leikurinn er flautaður á þá hugsa ég ekki um spjöld. Ef ég fæ spjald þá fæ ég spjald. Ég breyti ekki mínum leik"

(FB)

20.Feb

Solano fluttur á sjúkrahús

Nolberto Solano fyrrum leikmaður Newcastle var fluttur á sjúkrahús í gær eftir sigurleik

1-0 Universitario gegn San Lorenzo í Libertadores Cup. Hann er talinn hafa orðið fyrir of miklu vökvatapi og var fluttur á sjúkrahús til aðhlynningar. Hann var svo kominn á lappir daginn eftir og virtist hress

Solano hefur staðið sig vel með Universitario og hefur skorað fjögur mörk í þremur leikjum með Universitario sem leikur í heimalandi hans Perú.

(FB)

19.Feb

Kinnear vonast til að útskrifast af sjúkrahúsinu á sunnudaginn
Eins og menn vita fór Kinnear í þrefalda hjáveituaðgerða í síðustu viku og nú vonast hann eftir að fá að fara af sjúkrahúsinu á sunnudaginn. Hann vonast til að snúa til baka í stjórastólinn um miðjan apríl og þá eru 6 leikir eftir af tímabilinu.

(FB)

19.Feb

Steve Bruce orðaður við Newcastle

Ýmsir netmiðlar hafa sagt að stjóra Wigan Steve Bruce verði boðið stjórastarf hjá Newcastle í sumar en Bruce hefur blásið á þessar sögusagnir. Í viðtali við Manchester Evening News sagði hann: "Svo ég er á leið til Newcastle, það eru fréttir í mínum eyrum og mér finnst þetta vanvirðing þegar þeirra stjóri er að ganga í gegnum erfið veikindi. Ég hef ekkert heyrt um þetta og er ánægður hér hjá Wigan"

Bruce sem er fæddur í Corbridge sem er 26 km frá Newcastle hefur stýrt mörgum liðum síðan hann hóf stjóraferil sinn. Hann hefur stýrt liðum eins og Sheff Utd, Hudderfield, Crystal Palace, Birmingham og svo Wigan í tvígang.

(FB)

19.Feb

Jonas: Stuðningsmenn hafa verið fráfærir

Argentínumaðurinn Jonas Gutierrez var einnig kosinn leikmaður janúarmánaðar á heimasíðu Newcastle líkt og stuðningsmenn hér á landi gerðu. Þessi frábæri kantmaður hefur verið að spila vel undanfarið og er hann í miklu uppáhaldi hjá stuðningsmönnum Newcastle. "Þaö er alltaf gaman að fá viðurkenningu frá stuðningsmönnum. Ég þakka þeim fyrir þetta og vonandi held ég áfram í þessu formi vegna þess að mér finnst ég vera ná mínu besta formi eftir meiðslin á síðasta ári. Stuðningsmenn hafa verið frábærir síðan ég kom hingað, ég vann þessa sömu viðurkenningu í ágúst sem var frábær byrjun fyrir mig" sagði Jonas.

(FB)

19.Feb

Butt: "Við erum í góðum höndum"

Varafyrirliði Newcastle Nicky Butt segir að Colin Calderwood og Chris Houghton séu vel færir um að stjórna liðinu í fjarveru Joe Kinnear. "Chris og Colin vinna vel saman og ég er viss um að þeir muni taka þessari áskorun vel. Við erum leiðir yfir því sem kom fyrir Joe. Við óskum honum skjótum bata og vonum að hann komi til baka sem fyrst. En við erum þar sem við erum og við höfum tvo mjög góða þjálfara og reynslumikla menn. Þeir eru vel færir um að stjórna liðinu og þeir hafa virðingu allra leikmanna. þetta er erfið staða en við verðum að standa saman sem hópur" sagði Butt.

(FB)

7.Feb

Jákvæðar fréttir af Kinnear

Newcastle sendi frá sér tilkynningu í kvöld varðandi Joe Kinnear en það var farið með hann á sjúkrahús í morgun eftir að hann kenndi sér meins á hótelinu sem liðið var á fyrir leikinn gegn WBA. Hann gekkst undir nokkrar rannsóknir og niðurstöður sýna að allt sé í lagi hjá honum. Hann mun þó vera á sjúkrahúsinu næstu daga undir eftirliti til öryggis. "Ég vill þakka öllum sem hafa spurst fyrir um mig. Þó svo að ég missti af leiknum þá var barnabarn mitt hjá mér og lýsti leiknum fyrir mig. Þetta var góður sigur hjá okkur og ég sagði Chris (Houghton) að koma þeim skilaboðum áleiðis til strákana að þeir hafi gert vel í dag, þegar hann kom til mín í kvöld" sagði Kinnear á heimasíðu Newcastle í kvöld.

(FB)

7.Feb

WBA - Newcastle 2-3

(Fortune 4, 73) - (Duff 2, Lovenkrands 8, S Taylor 41)

(Nýju mennirnir Kevin Nolan og Ryan Taylor í baráttunni)

Fyrsti sigurinn á þessu ári í hús

Loksins kom að því að Newcastle náði að landa þrem stigum og var þetta mikill baráttuleikur tveggja liða í botnbaráttunni. Flest allir höfðu búist við því í dag að Obafemi Martins myndi byrja inná en einhverra hluta vegna var hann ekki einu sinni í leik manna hópnum í dag. Peter Lovenkrands og Ryan Taylor byrjuðu inná í fyrsta sinn fyrir Newcastle í dag en Lovenkrands hafði tvisvar komið inná í síðustu tveim leikjum. Og þeir stóðu sig bara nokkuð vel báðir tveir. Lovenkrands skoraði og var sprækur í framlínunni, R Taylor lagði upp mark og barðist mikið. Hann á greinilega að taka aukaspyrnur og horspyrnur og er það mikill fengur fyrir Newcastle því að föst leikatriði hafa verið mikill höfuðverkur fyrir okkur í vetur.

Newcastle byrjaði leikinn mjög vel og komust yfir strax á 2 mínútu. Damien Duff skoraði þá eftir mikil varnarmistök hjá WBA og setti Duff boltann á milli lappana á Scott Carson í markinu. En sú forysta stóð ekki lengi yfir nema í 3 mínútur en þá hafði Marc Antoine Fortune jafnað leikinn eftir að Nicky Butt hafði misst boltann klaufalega frá sér á miðjunni. Fortune náði að hrista Steven Taylor léttilega af sér og skoraði hjá Steve Harper sem kom engum vörnum við. En það leið ekki á löngu þar til Newcastle komst yfir á ný. Daninn Peter Lovenkrands var þá réttur maður á réttum stað þegar hann fékk boltann óvænt beint fyrir lappirnar af varnarmanni WBA og skoraði hann sitt fyrsta mark fyrir Newcastle í sínum fyrsta byrjunarliðsleik. Ekki er hægt að segja að þetta hafi verið falleg knattspyrna sem liðin buðu uppá í dag enda virkaði völlurinn frekar laus í sér og erfiður yfirferðar. En undir lok fyrri hálfleiks komst Newcastle í 1-3 og þá unnu Taylor og Taylor vel saman. Ryan tók flotta hornspyrnu beint á kollinn á Steven sem skoraði annað mark sitt á tímabilinu, Staðan 1-3 í hálfleik og seinni hálfleikur var mikið basl og sóttu heimamenn nokkuð hart að marki Newcastle. Umdeilt atvik átti sér stað þegar WBA skoraði annað mark sitt. Leikmaður WBA lá meiddur á vellinum og Shola Ameobi á frekar klaufalegan hátt gaf boltan á leikmenn WBA og reiknaði Ameobi með því að þeir myndu sparka boltanum útaf en það gerðu þeir ekki heldur brunuðu í sókn sem endaði með því að Fortune skoraði sitt annað mark. Auðvitað átti Ameobi að sparka sjálfur boltanum af velli eða láta dómarann ákveða hvort það ætti að stoppa leikinn. Leikmenn Newcastle létu óánægju sína í ljós en höfðu ekki erindi sem erfiði. Leikmenn WBA efldust mikið við þetta mark og áttu ágætis færi en sem betur fer nýttu þeir þau ekki. Mark Viduka kom inná fyrir Shola Ameobi þegar um 10 mínútur voru eftir og batnaði sóknarleikur Newcastle mikið við komu hans enda mun betri leikmaður en Ameobi. Ég get ekki skilið hvað þjálfarar og stjórar sjá við hann sem leikmann. Hann er sífellt að brjóta af sér og er klaufskur á boltann. En það jákvæða í dag er að við náðum að landa þrem stigum og það er það sem skiptir öllu máli.

Við sigurinn í dag náði Newcastle að lyfta sér örlítið upp töfluna en það er mjög stutt í fallsætin, bara fjögur stig í þriðja neðsta sætið. Nú eru tvær vikur í næsta leik sem er gegn geysisterku liði Everton og ætti leikmannahópur okkar að vera orðinn sterkari. Oba Martins ætti að koma inn þá og sennilega hafa menn ekki þorað að taka áhættu með hann í dag. Það er betra að hafa hann í betri æfingu eftir tvær vikur í þennan erfiða leik.

Lið Newcastle í dag: Harper, S Taylor, Bassong, Coloccini, Enrique, R Taylor, Butt, Nolan, Duff, Ameobi (Viduka 80), Lovenkrands (Xisco 90)

Ónotaðir varamenn: Forster, Cacapa, Geremi, Edgar, Smith.

Gul spjöld: Nolan, R Taylor.

Skot (á mark): WBA 13 (7) - Nufc 10 (7)

Hornspyrnur: WBA 3 - Nufc 4

Áhorfendur: 25,817