Newcastle Klúbburinn á Íslandi

Fréttir í febrúar 2006

28.2.2006

Einn sá flottasti
Glenn Roeder hefur unnið með mörgum góðum knattspyrnumönnum en hann segir að Tyrkinn Emre jafnist á við þá albestu. Emre hefur átt fína leiki að undanförnu og mikil ánægja ríkir með þá ákvörðun hans að fara ekki í landsleik Tyrkja og Tékka á morgun. Roeder segir Emre hafa tækni á við þá bestu sem hann hafi unnið með og segir að þó hann hafi vitað að leikmaðurinn væri góður hafi hann samt komið sér á óvart. Þá sé hugarfarið alveg til fyrirmyndar. „Ég sá Emre spila nokkrum sinnum fyrir Inter Milan og ég hef séð hann spila með Tyrkjum. Ég hef alltaf vitað að hann væri góður leikmaður en í sannleika sagt þá áttaði ég mig ekki á því hve góður hann væri. Það er fyrst þegar maður fer að vinna með þessum mönnum og fylgist með æfingunum að maður getur metið getu þeirra almennilega. Sumt sem hann getur gerir mig alveg orðlausan,“ segir Roeder.
Emre var öflugur gegn Everton á laugardag þrátt fyrir að hafa verið illa sofinn vegna veikinda. Roeder segir hann smám saman vera að ná toppformi eftir meiðslin slæmu. Það er ekki ónýtt að hafa miðjumenn á borð við Emre þegar stóru byssurnar Shearer og Owen eru frá. Shearer mun væntanlega verða leikfær þegar Bolton heimsækir Newcastle um næstu helgi og Owen hefur sagt að hann eigi smá séns í að ná í bikarleikinn gegn Chelsea þó hann reikni reyndar ekki með að verða leikfær fyrr en 1. apríl.

28.2.2006

Loksins kom að því
Shay Given var um helgina valinn leikmaður ársins 2005 í Írlandi. Shay hefur nokkrum sinnum verið tilnefndur en þetta er í fyrsta sinn sem hann er valinn. Shay var hreint frábær með Írum 2005 og gerði allt hvað hann gat til að tryggja liðinu sæti í úrslitakeppni HM. Hann hefur nú leikið 74 landsleiki. Þeir Kenny Cunningham hjá Birmingham og Richard Dunne hjá Man City voru einnig tilnefndir. Shay sagðist hafa verið farinn að halda að hann væri bara alltaf hafður með í tilnefningunum til að fylla upp í tilskilinn fjölda. Það væri hins vegar gott að fá þessi verðlaun nú og hann væri afar þakklátur. Árið hafi verið gott að sumu leyti en það hefðu verið mikil vonbrigði að komast ekki í úrslitakeppni HM. Það geri það líka enn verra að hann búi í Englandi og sé alltaf að lesa um Englendingana sem séu á leið til Þýskalands. Írar verði bara að hlakka til forkeppni Evrópumótsins.

28.2.2006

Chops enn að
Michael Chopra hefur verið feikilega duglegur að skora fyrir varalið Newcastle á tímabilinu og hann setti sigurmarkið þegar liðið vann Blackburn 1-0 á útivelli í gær. Leikurinn var jafn en Chopra setti markið fimm mínútum fyrir leikhlé. Markvörður Rovers varði skot Chopra en hann fylgdi vel á eftir og skoraði. Þetta var 13. mark hans í aðeins 12 leikjum en því miður virðist framherjinn ekki hafa burði til að stimpla sig inn með aðalliðinu. Craig Moore lék allan leikinn með Newcastle og þótti standa sig vel.
Lið Newcastle: Forster, Baxter, Farman, Moore, Edgar, Gate, Brittain, Pattison, Finnigan, Chopra, Cave.

28.2.2006

Wayman látinn
Í gær var tilkynnt á heimasíðu Newcastle að fyrrum framherji liðsins, Charlie Wayman, hefði látist 84 ára að aldri. Wayman spilaði fyrir Magpies á stríðsárunum og á fyrsta tímabilinu eftir stríð, 1946-7. Þá vann liðið Newport 13-0 og Wayman setti fjögur mörk sem féllu reyndar í skuggann af sex marka frammistöðu Len Shackletons. Eftir að hafa leikið með Magpies lá leiðin til Southampton en síðar lék Wayman með Preston, Middlesbrough og Darlington. Hann spilaði í bikarúrslitum með Preston árið 1954.

26.2.2006

Nobby át Karamellurnar
Nolberto Solano var hetja dagsins þegar Newcastle vann Everton 2-0 á SJP. Nobby skoraði bæði mörk Newcastle í seinni hálfleiknum og var það seinna hreint stórglæsilegt hjá Perúmanninum snjalla. Leikurinn var annars spennandi lengi vel og Toffees allt eins líklegir til að ná forystunni. Það tókst hins vegar ekki og eftir að Nobby skoraði fyrra markið var Newcastle sterkari aðilinn. Sigurinn færði liðið upp fyrir Everton og í 11. sæti deildarinnar. Roeder og Shearer hafa nú stýrt liðinu í fimm leikjum og enn ekki tapað. Sigrarnir eru orðnir fjórir og sannarlega batamerki frá Souness eymdinni. Það var líka gott að leggja Everton sem hafði ekki tapað síðan 28. desember.

24.2.2006

Afskrifaður þetta tímabilið
Nobby Solano segist ekki eiga von á að Albert Luque geri neitt af viti þetta tímabilið. Nobby biður stuðningsmenn hins vegar að halda ró sinni því von sé til að Spánverjinn standi sig á því næsta. Segja má að sjaldan eða aldrei hafi leikmaður byrjað jafn illa á Tyneside því satt best að segja virkar Luque eins og maður sem kann hreinlega ekki neitt fyrir sér í fótbolta. Nobby hefur verið túlkur fyrir Albert og þekkir hann því líklega betur en aðrir liðsmenn. Hann segir Albert þurfa tíma og vonandi nái hann að standa sig á næsta tímabili. „Hann stendur sig vel á æfingum og leggur hart að sér. En hraðinn í leiknum er annar en hann er vanur og margt er ólíkt. Ég hef útskýrt enska boltann fyrir honum, hraðann og líkamsstyrkinn sem maður þarf að hafa. Albert vill spila og hann vill gera sitt besta. Því hefur hann enn ekki náð. Það er mikil pressa á honum, það er alltaf þannig þegar klúbbur hefur borgað svona mikið fyrir leikmann. Það er erfitt fyrir hvern sem er en sérstaklega þegar menn koma erlendis frá en hann skilur stöðuna, hann er toppmaður, og ég vona að við getum komið honum inn í liðið og hjálpað honum að standa sig betur,“ segir Nobby og víst að stuðningsmenn eru sammála. Það er hins vegar alveg vonlaust að gefa honum sénsa ef hann spilar jafn illa og til þessa. Þannig er hann bara til vandræða.

24.2.2006

Miðar á topp átta
Glenn Roeder segist miða á eitt af átta efstu sætunum í deildinni en Roeder hefur halað inn sjö stig úr þremur leikjum. Hann vonast til að hirða þrjú í viðbót þegar Everton kemur í heimsókn um helgina og lyfta liðinu upp töfluna. Hann viðurkennir að það verði erfitt að ná þessu markmiði en telur samt raunhæft að stefna á það. „Það er dáldið bil milli efstu sjö eða átta liðanna og restarinnar sem gerir það erfitt að brjótast þar inn. En það verður samt að vera markmið okkar. Ég hef alltaf trúað því að menn verði að miða hátt og við verðum því að gera það,“ segir Roeder.

24.2.2006

Óvissa með Shearer
Alan Shearer verður testaður í fyrramálið og þá skýrist hvort hann getur spilað gegn Everton. Roeder mun því ekki velja byrjunarliðið fyrr en eftir þá prufu. Dyer og Bramble eru auðvitað fjarri vegna meiðsla en Babayaro er kominn aftur í 19 manna hóp eftir leikbann. Hópurinn er þannig skipaður: Ameobi, Babayaro, Boumsong, Bowyer, Brittain, Chopra, Clark, Elliott, Emre, Faye, Given, Harper, Luque, N'Zogbia, Parker, Pattison, Ramage, Shearer, Solano

24.2.2006

Er það Jewell?
Samkvæmt kjaftafréttum dagsins hefur Martin O’Neill gefið Newcastle afsvar þar sem hann hefur meiri áhuga á enska landsliðinu. Sagt er að Freddy Shepherd ætli að ræða við Paul Jewell stjóra Wigan eftir leik Man United og Wigan í deildabikarnum. Jewell ku vera með 500.000 punda útgönguklásúlu í samningi sínum og talið er að hann hafi færst nær toppnum á óskalista Freddys að undanförnu. Þó að árangur Jewells með Wigan sé sannarlega eftirtektarverður er aldeilis óvíst hvernig honum myndi takast til með Newcastle. Þá er varla hægt að segja að hann sé ofarlega á óskalista stuðningsmannanna þó svo hann yrði áreiðanlega ekki jafn óvinsæll kostur og Souness.
Jewell segist hissa á þessum sögum, hann viti ekki neitt um málið en auðvitað séu alls kyns kjaftasögur á flugi þessa dagana. Hann sé ánægður með starf sitt hjá Wigan.

24.2.2006

Leikdagur klár
Bikarleikurinn gegn Chelsea á Stamford Bridge hefur veirð settur á miðvikudainn 22. mars og hefst klukkan 20:05. Ef jafnt verður og annan leik þarf á St James’ Park verður hann líklega spilaður miðvikudaginn 12. apríl klukkan 19:45 en það gæti þó breyst út af sjónvarpsútsendingu.

24.2.2006

Smæli valinn í landslið
Miðjumaðurinn Daryl Smylie sem er nú í láni hjá Stockport County í 2. deildinni hefur verið valinn í U21 landslið Norður Írlands. Landsliðið leikur vináttuleik gegn Wales í næstu viku. Smylie vonast auðvitað til að spila með Stockport um helgina og svo til að verða í byrjunarliðinu á Stebonheath Park í Llanelli næsta þriðjudag.

23.2.2006

Enn og aftur
Kieron Dyer er meiddur og mun ekki leika næstu vikur. Dyer meiddist auðvitað í leiknum geg Southampton og segir sjálfur að HM draumur sinn sé úr sögunni. Glenn Roeder segist vonast til að Kieron verði farinn að æfa á ný eftir þrjár vikur. Titus Bramble verður einnig frá næstu vikurnar og eru það jafnvel enn verri tíðindi. Vörnin er einstaklega þunnskipuð og vandséð hvernig tekst að leysa þau mál. Roeder segir tognunina ekki slæma og mögulegt sé að hann verði leikfær innan þriggja vikna en enn sé þó ekkert ljóst með það.

23.2.2006

Enginn trukkur
Lið Newcastle var óttalega kraftlaust á SJP og markalaust jafntefli gegn Charlton eiginlega niðurstaða við hæfi í litlausum leik. Newcastle hafði töluverða yfirburði úti á velli lengst af en gekk illa að skapa góð færi. Þegar það tókst var svo farið illa með þau. Meiðslagrýlan lét til sín taka á ný þegar Titus Bramble tognaði í seinni hálfleik og framhaldið gefur ekki sérstakt tilefni til bjartsýni. Liðið situr í 13. sæti og virðist ekkert líklegt til að hífa sig upp í efri hluta deildar. Til þess að það sé hægt þarf líklega að hafa alla heila og taka á því með meiri trukki.

23.2.2006

Strákar úr leik
Ungmennalið Magpies er á leið heim eftir að hafa fallið úr leik á Ítalíumótinu í gær. Liðið tapaði 2-0 fyrir Treviso. Ítalarnir skoruðu eftir hálftíma og bættu svo við úr víti á lokasekúndunum eftir að markvörður Newcastle hafði fengið rautt fyrir að fella leikmann. Kenny Wharton var vonsvikinn með úrslitin enda sagði hann þetta hafa verið stærsta leik tímabilsins hjá strákunum. Þetta hafi þó verið góð reynsla. Liðið kemur heim í dag og hefur undirbúning fyrir bikarleikinn gegn Brighton um helgina.
Lið Newcastle: Fraser Forster, Craig Baxter, Lewis Marr, David Edgar, Chris Farman, Phil Cave, Callum Little (James Troisi 60), Nicky Deverdics (Dean Critchlow 75), Mickey Terrell, Glenn Reay (Andy Carroll 45), Carl Finnigan

22.2.2006

Mikilvægur slagur
Leikurinn gegn Charlton í kvöld er hreint gríðarlega mikilvægur fyrir bæði lið. Charlton er einu stigi á undan Newcastle og tveimur sætum ofar og því ljóst að sigur færir Magpies í 12. sætið. Þá yrði liðið aðeins stigi á eftir Everton sem er einmitt mótherji í næsta leik. Það er því óhætt að segja að þessir tveir leikir geti skipt sköpum varðandi það í hvorum hluta deildarinnar liðið verður þegar keppni lýkur í vor og eins er ljóst að ætli Newcastle sér að eiga séns í Evrópusæti verða svona leikir að vinnast.

Það verður hins vegar alls ekki létt verk að leggja Charlton, allra síst ef þeir Shearer og Dyer geta ekki spilað. Roeder hefur sagt að ákvörðun um það verði ekki tekin fyrr en rétt fyrir leik. Það væri óðs manns æði að taka sénsa með þessa leikmenn. Shearer verður einfaldlega að vera heill eigi hann að spila og það væri fáránlegt að taka séns varðandi Dyer miðað við það sem á undan er gengið. Newcastle hefur þó sýnt það í síðustu leikjum að liðið getur spilað vel og ef menn eru rétt stemmdir frá fyrstu mínútu eiga þeir að vinna gestina frá Lundúnum. Jafntefli dugar hins vegar skammt og breytir sáralitlu þó svo það færi Newcastle upp fyrir Fulham og í 13. sætið.

22.2.2006

Krulli fer hvergi
Tim Krul hefur fengið leyfi til að draga sig út úr hollenska U19 landsliðshópnum til að geta verið með Newcastle í slagnum heima. Ungmennalið Newcastle á leik gegn Brighton í bikarnum aðeins sólarhring eftir landsleik Hollands og Svíþjóðar í Hollandi. Leikurinn gegn Brighton er í fjórðungsúrslitum og verður leikinn á SJP. Það er frábært að hafa Krulla með í slagnum en hann þykir einn alefnilegasti markvörður Evrópu.

22.2.2006

Woody meiddist enn
Jonathan Woodgate meiddist enn eina ferðina í gær. Reiknað er með að hann verði frá í um fjórar vikur en Woody fór meiddur af velli í leik Real Madrid gegn Arsenal. Það var á 9. mínútu að strákurinn laskaðist og hlýtur að vera afar súrt að þurfa að taka hlé enn einn ganginn. Ekki er enn ljóst hve slæm meiðslin eru en það skýrist væntanlega mjög bráðlega.

21.2.2006

Óbreyttur hópur
Glenn Roeder þurfti ekki að gera neinar breytingar á hópnum fyrir leikinn gegn Charlton á morgun. Ekki er víst að Alan Shearer geti leikið en Glenn segist ekki taka neinn séns með kappann. Það sé á hreinu að Shearer spili ekki nema hann sé 100% í lagi. Dyer er í hópnum þó hann hafi verið örþreyttur eftir leikinn gegn Southampton en hann kemur kannski ekki til greina í byrjunarliðið.
Hópurinn er þannig skipaður: Ameobi, Boumsong, Bowyer, Bramble, Brittain, Chopra, Clark, Dyer, Elliott, Emre, Faye, Given, Harper, Luque, N'Zogbia, Parker, Pattison, Ramage, Shearer, Solano

21.2.2006

Erfitt en skemmtilegt
Newcastle menn segjast hlakka til að takast á við Chelsea í bikarnum. Glenn Roeder sagðist hafa séð á mönnum að þeir væru til í slaginn. „Það fór ekki vel fyrir okkur þar í deildinni þetta tímabilið en þetta gefur leikmönnum annað tækifæri til að ná þeim úrslitum sem áhangendur og klúbburinn vilja,“ sagði stjórinn sem virðist ekki á útleið alveg á næstunni þar sem leitin að arftakanum gengur hægt.
Alan Shearer sagði þetta erfiðasta leikinn sem liðið hefði getað fengið. Ef menn eigi að ná einhverjum árangri þetta árið verði að fara erfiðu leiðina. „Við verðum að taka á þessu eins og þetta sé okkar bikarúrslitaleikur. Áhangendur munu fylkjast niðureftir þúsundum saman, við munum taka vel á því og sjá hvað setur,“ sagði fyrirliðinn.
Scott Parker, fyrrum leikmaður Chelsea, er þokkalega bjartsýnn. „Það er enginn vafi á að þetta er erfiður dráttur og augljóslega sá erfiðasti sem við hefðum getað fengið. Chelsea er gæðalið, þeir eru með mikla breidd í öllum stöðum og þetta verður heljar prófsteinn fyrir okkur. En við munum ekki verða hræddir við að fara þangað því við erum líka með gæðalið. Þegar menn eru komnir í fjórðungsúrslitin snýst þetta um baráttu og ef menn ætla að vinna FA bikarinn verða þeir að vinna bestu liðin.“

21.2.2006

Strákarnir fengu Treviso
Ungmennalið Magpies skreið í 16 liða úrslit Coppa Carnavale eftir 3-3 jafntefli í gær og dróst þar gegn Treviso. Leikurinn fer fram á morgun. Aðrar fréttir af drengjaliðinu eru þær að heima bíður undanúrslitaleikur í FA bikarnum gegn Manchester United eða Manchester City, takist liðinu að leggja Brighton á St James’ Park þann 1. mars. Liverpool er komið í undanúrslitin og mætir þar Southampton.

20.2.2006

Verra gat það ekki verið
Newcastle dróst gegn Chelsea á Stamford Bridge í fjórðungsúrslitum enska bikarsins. Óhætt er að segja að liðið hefði ekki getað orðið óheppnara með mótherja að þessu sinni og sennilega veðja menn á að bikardraumurinn endi á Brúnni þetta árið. Newcastle hafði haft heppnina með sér til þessa í keppninni en nú er komið að því að fást við stórfiskana. Leikið verður í miðri viku upp úr miðjum mars. Eftirtalin lið drógust saman:

Charlton - Middlesbrough
Aston Villa/Man City - Bolton/West Ham
Chelsea - Newcastle
Birmingham - Liverpool

20.2.2006

Dugar þetta?
Unglingalið Magpies lauk keppni í sínum riðli á Ítalíumótinu í dag. Liðið gerði þá 3-3 jafntefli við Empoli og hafnaði þar með í öðru sæti riðilsins. Menn bíða nú úrslita annarra leikja til að sjá hvort þetta nægi liðinu til að komast áfram en Newcastle hlaut sjö stig úr þremur leikjum. Leikurinn í dag var mjög skemmtilegur eins og úrslit gefa til kynna. Newcastle fékk á sig mark snemma leiks og varð síðan fyrir áfalli rétt fyrir hlé því þá var Ross Cowan vikið af velli. Staðan var 1-0 í hálfleik en Carl Finnigan jafnaði þegar um korter var liðið af seinni hálfleik. Empoli komst yfir á ný fimm mínútum síðar og þegar þeir skoruðu þriðja mark sitt töldu flestir úrslit ráðin. En Newcastle menn gáfust ekki upp. Phil Cave minnkaði muninn úr víti á 72. mínútu og Andy Carroll jafnaði svo metin en áður en kom að því hafði einum leikmanna Empoli verið vikið af velli. Það súra við leikinn var þó að Kris Gate var borinn meiddur af velli undir lokin eftir mikinn árekstur.
Kenny Wharton sagðist ánægður með að ná jafntefli eftir að hafa verið 3-1 undir en hann sagði dómgæsluna hafa verið skelfilega, hún hafi verið slæm á síðasta tímabili en enn verri núna. Ross Cowan hafi ekki einu sinni snert manninn þegar hann var rekinn af velli. Miðvörður andstæðinganna hafi hrækt framan í Carl Finnigan við nefið á línuverðinum sem hafi ekkert séð. Þá hafi tæklingin sem gerði útaf við Gate verið fólskuleg í meira lagi en dómarinn hafi bara látið menn spila áfram.
Þessir spiluðu í dag: Mark Cook, Ross Cowan, Paul Huntington, David Edgar, Phil Cave, Liam Atkin, Kris Gate, Chris Farman (James Troisi), Craig Baxter (Andy Carroll), Dean Critchlow, Carl Finnigan

20.2.2006

Erfir níuna
Michael Owen verður beðinn að taka við hinni frægu treyju númer níu þegar Alan Shearer leggur skóna á hilluna. Freddy og félagar telja Owen einfaldlega hinn fullkomna arftaka og þó svo að Owen hafi hingað til aðeins viljað spila í númer tíu er afar ólíklegt að hann hafni þessu boði. Þar með gefst honum tækifæri til að komast í hóp með mörgum af frægustu markaskorurum sögunnar í enska boltanum en þessi treyja er sannarlega með þeim merkari í Englandi. Það eru þó margir stuðningsmenn sem efast hreinlega um að Owen verði hjá Newcastle á næsta tímabili en auðvitað vona menn að hann fari hvergi. Ekki er talið líklegt að Owen fái fyrirliðabandið þegar Shearer hættir, menn telja að Scott Parker sé þar sá heitasti.

20.2.2006

Dyer sá um Dýrlinga
Kieron Dyer skoraði sigurmark Newcastle gegn Southampton og tryggði þar með sæti í fjórðungsúrslitum FA bikarsins. Newcastle hefði getað tryggt sigur í fyrri hálfleik, til þess fékk liðið fjölda færa sem ekki nýttust. Southampton fékk svo góð færi til að skora snemma í seinni hálfleiknum en það var Dyer sem gerði gæfumuninn að lokum, skoraði langþráð mark eftir vænan undirbúning frá N'Zogbia.

18.2.2006

Veðjað feitt á Martin
Í gær urðu þau tíðindi að veðjað var fúlgum á Martin O’Neill sem næsta stjóra Magpies. Og ekki bara það því líkur eru einnig taldar mjög miklar á að hann taki við enska landsliðinu. William Hill breytti líkunum varðandi Martin og Newcastle úr 15/8 í 6/5 og er hann að sjálfsögðu á toppnum yfir þá líklegustu. William Hill er reyndar komið með veðmál í gang þar sem menn geta veðjað á hvar Martin verði stjóri þegar næsta leiktíð hefst. Þar er Newcastle líklegast en England kemur þar á eftir, svo Man United. Betri fréttir af konu hans auka líkur á endurkomu í boltann en ekki er þó víst að þetta segi nokkurn skapaðan hlut varðandi Newcastle. Það er nú samt svo að veðbankarnir taka ávallt mark á því þegar einstaklingar fara að veðja miklum upphæðum á einstaka menn og þannig var í þessu tilviki. William Hill er nú með Glenn Hoddle í öðru sæti en síðan koma Sam Allardyce og Scolari.
Ekkert hefur frekar heyrst af Hitzfeld eða Ranieri.

18.2.2006

Alan hampaði
Alan O’Brien og félagar í U21 landsliði Írlands lögðu Portúgal í gær 2-1 og unnu þar með Madeira mótið. Liðið gerði jafntefli við Madeira í fyrsta leik og vann svo Finnland 2-1 og nægði því jafntefli gegn Portúgal. Þetta er annað árið í röð sem Írar vinna þetta mót. Alan var í byrjunarliðinu í fyrsta leiknum en hvíldi gegn Finnunum. Hann var svo aftur í byrjunarliðinu í gær.

18.2.2006

Vertu grimmur!
Glenn Roeder segir að Shola Ameobi verði að taka almennilega á því í hverjum einasta leik ef hann eigi að sýna sitt besta með Newcastle. Shola hefur átt tvo góða leiki undir stjórn Roeders og stjórinn er viss um að framherjinn eigi meira inni ef hann haldi áfram að nota líkamsstyrk sinn og hrella varnarmenn með kraftinum. Roeder segir að Shola verði að vera agressífur í leik sínum, þá sé hann illviðráðanlegur. „Ég hef sagt honum að hann þurfi að vera þannig leikmaður að þegar miðvörður andstæðinganna sér hann á leikmannalistanum hugsi hann sem svo að hann vilji ekki spila á móti þessum, hann sé alltaf til vandræða, líkamlega öflugur, haldi boltanum vel og skori mörk. Hann getur þetta allt. Hann verður að halda áfram að spila eins og hann hefur gert í síðustu tveimur leikjum og ég get ekki séð af hverju hann ætti ekki að geta það út tímabilið. Ef ég hugsa aftur til þess tíma er ég var að spila þá dettur mér John Fashanu í hug, Shola er með miklu meiri tækni en John og ég held að John myndi alveg samþykkja það. En mér líkaði ekki að leika gegn John því hann var stór og furðulegur og setti á mann pressu. Þannig verður Shola að vera. Hann hefur frábæra hæfileika, hann býr sannarlega yfir mikilli tækni. Hann getur unnið boltann, hann sér hreyfinguna í kring og hlaup leikmanna án bolta, það sýndi hann með sendingunni á Alan í metmarkinu gegn Portsmouth. Leikmennirnir hér vita hve góður hann er, þeir sjá hann á æfingum dag hvern. Ég held að stuðningsmenn okkar séu enn að bíða eftir að sjá hinn sanna Shola Ameobi. Í síðustu tveimur leikjum erum við farin að sjá glitta í hann og á meðan ég er við stjórn, hversu lengi sem það verður, mun ég leggja hart að mér til að það sé á hreinu að Shola átti sig á þessu og spili af bestu getu í hverjum einasta leik,“ segir Roeder.
Roeder telur að Shola hafi getuna til að leika með enska landsliðinu en hann verði þá alltaf að sýna fullan styrk. „Peter Crouch hefur leikið landsleiki fyrir England og ef Shola Ameobi leikur eins og hann hefur gert í síðustu tveimur leikjum þá held ég ekki að mikill munur sé á getu þeirra. Við verðum að halda honum grimmum, um það snýst þetta. Hann getur mætt út á völl vel mótíveraður og ætlað sér að vera agressífur allan leikinn, þá er ömurlegt að leika gegn honum og hann getur skapað alls kyns vandamál.“

17.2.2006

Ekki merkilegt
Ungmennalið Magpies náði ekki að setja nema tvö mörk á Inter Soccer Boston í Torneo Viareggio Coppa Carnevale í dag. Liðið vann 2-0 en Empoli hafði burstað sama lið 15-0 í fyrsta leik. Kenny Wharton hafði farið fram á markasúpu en menn klúðruðu og klúðruðu. Andy Carroll og Carl Finnigan komu í veg fyrir algera sneypu með mörkum undir lok leiksins. Wharton sagði að liðið hefði verið alveg hörmulegt og engin afsökun væri þó völlurinn hefði líka verið hörmulegur. Hann segir sína menn verða að vera 100% betri á mánudag ætli þeir að vinna Empoli en Empoli vann Avellion 4-1 í dag.
Þessir spiluðu í dag: Mark Cook, Liam Atkin, Paul Huntington, David Edgar, Phil Cave, Kris Gate, Chris Farman, Craig Baxter (Nicky Deverdics 75), Carl Finnigan, Andy Carroll (Dean Critchlow 75), James Troisi (Ross Cowan 60)

17.2.2006

Emre valinn
Þrátt fyrir að Emre sé kominn í sex leikja bann hjá Tyrkjum hefur hann verið valinn í landsliðshóp fyrir vináttuleik gegn Tékkum í Izmir þann 1. mars. Emre má leika vináttuleiki því bannið gildir aðeins í alvöru keppnum. Það kann þó að þykja hálf furðulegt af Tyrkjunum að vera að nota mann í æfingaleikjum sem mun augljóslega ekki spila þegar út í alvöruna er komið.

17.2.2006

Blessaður bikarinn
Glenn Roeder hefur sagt mönnum sínum að þeir verði að standa sig vel á heimavellinum og tryggja sæti í fjórðungsúrslitum FA bikarsins. Roeder var ánægður með sóknarbraginn sem kominn var á liðið gegn Pompey fyrir hálfum mánuði og vill að menn haldi áfram á svipuðum nótum gegn Southampton. Roeder segist vita hvers virði þessi keppni er fyrir áhangendur. „Þetta er yndisleg keppni. Við eigum möguleika á að komast í fjórðungsúrslit, maður getur ekki beðið um neitt meira en heimaleik og hann fengum við. Southampton mun mæta hingað með því hugarfari að gera okkur eins erfitt fyrir og þeir mögulega geta. George Burley er fínn stjóri og hann mun líklega hafa lagt línur fyrir skyndisóknir og við verðum að sjá við þeim. Við verðum að vera jákvæðir og spila sóknarleikinn sem við höfum spilað í síðustu tveimur leikjum. Leikurinn verður líka sýndur beint í sjónvarpi og ég held að það gefi leikmönnum alltaf smá extra löngun til að standa sig. Stuðningsmenn okkar hækkuðu í sér gegn Portsmouth og ég er viss um að þeir blasta aftur á laugardaginn. Við erum búnir að vinna heimavinnuna okkar um Southampton, höfum unnið með þá alveg eins og við hefðum gert með Chelsea. Við erum með allar skýrslur og myndbandsupptökur frá leikjum þeirra og höfum ekki látið einn stein liggja óhreyfðan. Við verðum að vera vissir um að vinna og komast í 6. umferð bikarsins,“ segir stjórinn.
Roeder mun væntanlega gera eina breytingu á liði sínu þar sem Babayaro er kominn í bann. Robbie Elliott mun fylla skarð hans í vinstri bakverðinum. Annars er Albert Luque kominn á ný í hópinn og sama má segja um Amdy Faye og aldrei að vita nema þeir fái eitthvað að sprikla.
Liðið er skipað þessum: Ameobi, Boumsong, Bowyer, Bramble, Clark, Chopra, Dyer, Elliott, Emre, Faye, Given, Harper, Luque, Parker, N'Zogbia, Ramage, Shearer, Solano

17.2.2006

Holland - taka tvö?
Nýtt nafn er komið upp í stjóraumræðunni og kemur það eins og þruma úr heiðskíru lofti. Á vefnum fannst kjaftasaga þess efnis að Ronald Koeman væri á leið í viðræður á SJP. Koeman stýrir nú liði Benfica og mætir Liverpool í meistaradeildinni næsta þriðjudag en sagt er að hann kunni að funda þá með Fredda. Heyrst hafi að umbi Koemans hafi haft samband við Newcastle og mælt með þessum mikla varnarnagla í stjórastólinn á SJP. Hæpið er að nokkuð sé að marka þessa flugufregn en það væri vissulega athyglisvert ef Freddi ætlaði sér að reyna hollensku aðferðina í annað sinn. Ruud Gullit mistókst herfilega en Koeman er reyndar mun öflugri stjóri þó hann sé kannski ekki eins sexí.

17.2.2006

Menn að braggast
Steven Taylor er mættur í endurhæfingu eftir aðgerð. Strákurinn segist ekki hafa sett neina dagsetningu varðandi endurkomu sína en segist bara stefna á að spila á tímabilinu. Það eru góð tíðindi því jafnvel var óttast að hann léki ekki fyrr en næsta haust. Michael Owen segist á góðum batavegi og reiknar með að verða með á ný eftir nokkrar vikur. Það gæti því farið svo að hann spilaði með undir lok næsta mánaðar.

16.2.2006

Hugo seldur?
The Chronicle greinir frá því í dag að Newcastle sé tilbúið að selja Hugo Viana til Valencia á 1,5 milljónir punda. Freddy Shepherd hefur ekki viljað staðfesta þetta en frá Spáni berast fregnir um að félögin hafi þegar náð samkomulagi. Hugo hefur víst staðið sig þokkalega og því er áhugi á að fá hann til að skrifa undir á næstunni. Þetta geta talist sæmileg tíðindi þó klúbburinn hafi reyndar tapað gríðarlega á drengnum. Það væri hins vegar enn verra að fá hann heim enn eina ferðina bara til að rembast við að finna handa honum nýtt lið. Vonandi tekst að losna líka við Nicky Butt.

16.2.2006

Þrír valdir
Craig Moore, Jean Alain Boumsong og Tim Krul hafa allir verið valdir í landsliðshópa vegna komandi verkefna. Moore hefur ekki leikið með Newcastle en hann er engu að síður valinn í landsliðshóp Ástrala en þeir mæta í æfingabúðir í Eindhoven um næstu mánaðamót. Krul heldur einnig til Hollands en hann er í U19 landsliði Hollands. Liðið tekur á móti Svíum þann 28. febrúar. Þá spila Frakkar vináttuleik við Slóvaka á Stade de France miðvikudaginn 1. mars og væntanlega verður Boum með í þeim slag.

16.2.2006

Smæli til Stockport
Miðjudrengurinn Daryl Smylie hefur verið lánaður til Stockport County í einn mánuð. Smylie hefur verið fastamaður í varaliði Magpies en ekki enn komist í aðalliðið. Hann er landsliðsmaður í U21 liði Norður Írlands. Stockport hefur átt í heljarbasli í 2. deildinni og verið í fallsæti lengst af. Upp á síðkastið hafa þó sést batamerki og undir stjórn nýja stjórans Jim Gannon hafa tveir síðustu leikir unnist. Þar með hefur liðið komist úr fallsæti. Smylie mun hitta fyrrum Magpie, David Beharall, hjá Stockport en hann kom nýverið frá Carlisle. Þá spilar Tesafaye Bramble með Stockport en hann er auðvitað bróðir hins góðkunna Titusar á Tyneside.

16.2.2006

Baba bann stendur
Ekki var hlustað á áfrýjunarbeiðni Newcastle gagnvart leikbanni Babayaros. Rauða spjaldið stendur því og Nígeríumaðurinn spilar því ekki tvo næstu leikina. Þetta er áfall fyrir liðið því Baba er óneitanlega sterkari en Robbie Elliott. Baba missir af leiknum gegn Southampton næsta laugardag og svo leiknum gegn Charlton á miðvikudeginum.

16.2.2006

Landsleikur 75
Shay Given hefur verið valinn í landslið Írlands sem mætir Svíum í vináttulandsleik á Lansdowne Road þann 1. mars. Ef Shay spilar þennan leik verður það 75. landsleikur hans og er hann leikjahæstur manna í hópnum. Þetta verður fyrsti landsleikurinn undir stjórn Steve Staunton og Sir Bobbys.

16.2.2006

Af stjóramálum
Ekkert skýrist enn varðandi stjóramálin. Ranieri biðlaði til Fredda í gær en hefur líklega ekki fengið neitt svar. Ottmar Hitzfeld veit af stuðningi áhangenda sem vilja fá hann og segir það mikinn heiður. Hann segir hins vegar að hann muni ekki taka neina ákvörðun fyrr en næsta sumar. Þar með verða líkur á að hann taki við að teljast fremur litlar. The Sun greinir svo frá því í dag að Freddi hafi gert Martin O’Neill gríðarlega gott tilboð. Hann bjóði 60.000 pund á viku og fjögra ára samning. Martin hafi ekki svarað enn, hann bíði eftir fréttum frá læknum varðandi konu sína en hún berst við krabbamein.

16.2.2006

Frekar þreytt
Það virkar einhvern veginn frekar þreytt þegar verið er að orða leikmenn við Newcastle þessa dagana. Eða hvernig má það vera að félagið sé á höttunum eftir hinum og þessum þegar enginn er stjórinn? Sannarlega er þetta sönnun þess að fréttamennskan er með ólíkindum mikið bull. Það er alveg á hreinu að Newcastle er ekki að spá í nýja leikmenn fyrr en nýr stjóri er kominn á svæðið. Þá fyrst er hægt að fara að leggja framtíðarlínurnar.
Í gær fóru að berast fréttir um áhuga Newcastle á Ahmed Hassan frá Egyptalandi. Þessi miðjumaður leikur með Besiktas og er þrítugur. Sagt er að Fulham og mörg fleiri lið í Evrópu hafi einnig áhuga. Fullyrða má að Newcastle hefur ekki áhuga á þessum manni, hversu góður sem hann nú er.
Sama má segja um fréttir af því að Newcastle væri fremst í flokki þeirra liða sem væru að eltast við Mauro Esposito hjá Cagliari. Í fréttinni sagði að njósnarar Newcastle héldu áfram sínu starfi þó enginn væri stjórinn og það kann svo sem að vera rétt. Esposito er framherji sem setti 16 stykki fyrir Cagliari í Serie A á síðasta tímabili og var valinn í landslið en hefur ekki náð að fylgja þeirri frammistöðu vel eftir.
Fréttir á borð við þessar eru áreiðanlega ættaðar frá umboðsmönnum sem eru að reyna að selja vöru sína og eins og svo oft áður kunna vörurnar vel að vera meingallaðar. Alla vega eru fréttirnar meingallaðar.

16.2.2006

Sigur í öðrum leik
Alan O’Brien og félagar í U21 landsliði Íra unnu í gær Finna 2-1 í Spánarmótinu. Liðið á því góða möguleika á að vinna Madeira bikarinn en jafntefli varð í leiknum gegn heimamönnum á þriðjudag. Portúgal gerði markalaust jaftefli við Madeira í gær og því nægir Írum jafntefli gegn Portúgölum á föstudaginn. Alan var reyndar ekki með í leiknum í gær en hann spilaði megnið af fyrsta leiknum.

15.2.2006

Klappað og klárt
Í dag var kunngjört að leikur til heiðurs Alan Shearer fari fram á SJP þann 11. maí. Mótherjar Newcastle verða Celtic eins og áður hafði reyndar heyrst. Allur ágóði mun renna til góðgerðarmála og vonast er til að yfir ein milljón punda komi í kassann. Það eitt er víst að kveðjustundin verður fögur enda á Shearer það skilið. Freddy Shepherd segir við hæfi að fá Celtic sem mótherja því stórkostlegt verði að hafa tvo bestu stuðningsmannahópa Bretaveldis undir sama þaki.
Stjórnarformaður Celtic, Brian Quinn, sagði þá vera mjög ánægða með að fá þetta boð. Mikil virðing ríkti milli þessara félaga og stuðningsmanna þeirra og þetta væri mikill leikur þar sem verið væri að kveðja einn besta knattspyrnumann sögunnar.

15.2.2006

Rani hefur áhuga
Claudio Ranieri er fyrstur stjóra til að lýsa opinberlega yfir áhuga á að stýra liði Newcastle. Rani sagði í dag í samtali við BBC Sport að Newcastle væri einn besti klúbbur Englands, liðið væri gott og metnaðurinn væri mikill en það þætti sér mjög mikilvægt. Hann sagði að félagið hefði ekki haft samband við sig enn. Ranieri var rekinn frá Chelsea í lok tímabilsins 2003-4 en þá hafði liðið náð öðru sæti úrvalsdeildar og komist í undanúrslit meistaradeildar. „Ég hef unnið á Ítalíu, Spáni og í Englandi en ég set England á toppinn. Ég elska England vegna stemmningarinnar og áhangendanna. Ef það er mögulegt þá vil ég snúa aftur til vinnu í Englandi. Ég er á höttunum eftir góðu djobbi hjá metnaðarfullum klúbbi. Newcastle er gott lið, metnaðarfullt lið. Það er einn af bestu klúbbunum í Englandi,“ sagði Raninn.
Það er sannarlega allt satt og rétt sem Rani karlinn segir en nú er bara að vita hvort Freddy og kó hafa einhvern áhuga.

15.2.2006

Jafntefli hjá Alan
Alan O’Brien lék með U21 landsliði Írlands gegn Madeira í fjögra liða móti á Spáni. Leikar fóru 1-1 og spilaði Alan með í 74 mínútur. Þegar hann fór af velli voru Írar 1-0 undir en náðu að jafna metin undir lokin og halda haus þó þeir lykju leiknum einum færri. Írar unnu þetta mót í fyrra en liðið leikur einnig gegn Finnum og Portúgölum.

15.2.2006

Phil tryggði sigur
Newcastle vann Avellino 1-0 í fyrsta leik Torneo Viareggio Coppa Carnevale í dag. Phil Cave skoraði eina markið úr víti þegar um klukkustund var liðin af leik en vítið var dæmt eftir að varnarmaður hafði varið með hendi. Sá var einnig rekinn af velli. Newcastle var sterkari aðilinn allan tímann en völlurinn var rennblautur og erfitt að spila. Kenny Wharton sagði að ef þetta hefði verið deildarleikur hefði hann aldrei verið spilaður, svo vondar hafi aðstæður verið
Þessir léku fyrir Newcastle: Mark Cook, Liam Atkin, Paul Huntington, David Edgar, Phil Cave, Kris Gate, Chris Farman, Craig Baxter (Ross Cowan 88), Carl Finnigan, Andy Carroll, James Troisi (Nicky Deverdics 75)

15.2.2006

Enn til vandræða
Nicky Butt getur ekki hætt að vera til vandræða þó hann sé kominn til Birmingham. Það væri svo sem í góðu lagi að hann gerði sín axarsköft þar ef það kynni ekki að koma niður á Newcastle United. Butt er sem lánsmaður hjá Birmingham og er liðið með forkaupsrétt á honum. Butt rauk í burtu þegar Steve Bruce tók hann út úr liðinu á dögunum og sagan segir að helst hefði Bruce viljað senda hann öfugan til Newcastle aftur en það getur hann víst ekki. Butt fékk mjög góðan samning hjá Newcastle og nú kann svo að fara að félagið fái hann í hausinn í sumar. Butt er engu vinsælli á St Andrews en hann var á SJP og því verður að teljast afar ólíklegt að Bruce og kó kjósi að halda í manninn þegar tímabilinu lýkur. Talið er að Butt hafi samið við Newcastle um 40.000 pund á viku og því er ljóst að hann gæti bara dinglað á SJP og hirt launin. Ekki bætir úr skák að annar lánsmaður, Hugo Viana hjá Valencia, er líklegur til að koma aftur á Tyneside næsta sumar. Hugo hefur ekki gengið vel á Spáni og þessir tveir geta átt eftir að reynast dýrkeypt mistök fyrir Newcastle. Það hafa þeir reynst hingað til en það gæti enn átt eftir að versna. Það eitt er víst að áhangendur Newcastle hryllir við þeirri tilhugsun einni að sjá Butt vafra um í búningi Magpies.

15.2.2006

Strákarnir á Ítalíumótinu
Ungmennalið Newcastle hefur leik á Torneo Viareggio Coppa Carnevale í Tuscany nú síðdegis. Liðið komst í fjórðungsúrslit í fyrra en nú hefur liðið leik gegn Avellino. Það er þjálfarinn Kenny Wharton sem sér um liðið þar sem Roeder er að sinna öðrum skyldum. Hann segist vonast til að koma liðinu lengra en í fyrra og stefnt sé að því að byrja vel í dag. Liðið mætir Inter Soccer Boston á föstudag og riðlinum lýkur svo með leik gegn Empoli á mánudag. Tíu fjögra liða riðlar eru í mótinu og sigurvegararnir fara áfram ásamt sex liðum með bestan árangur í öðru sæti.

14.2.2006

Hresstu þig við!
Glenn Roeder segir að Albert Luque verði að hafa gaman af því sem hann er að gera ef hann ætli sér aftur í lið Newcastle. Breytingarnar á SJP virðast hafa kveikt nýjan eldmóð í leikmönnum en Luque hefur ekki vaknað. Roeder leyfði Luque að skreppa heim til Barcelona í síðustu viku og átti líklega von á því sem gerðist í kjölfarið en það var að viðtal við kappann birtist í spænsku blaði. Þar sagði Luque sína sögu og þótti greinilega erfitt lífið í Bretalandi.
Roeder segist endilega vilja fá Luque aftur í liðið eins fljótt og mögulegt sé enda er nett leikjatörn framundan. Hann segist ekki hafa tekið Luque með í leikinn gegn Aston Villa því hann hafi talið það óvirðingu að láta hann horfa á af áhorfendapöllum. Hann hvetur leikmanninn til að sýna hinum í liðinu að hann langi virkilega að vera með.
Luque sagði í viðtalinu á Spáni að hann hefði ekki fengið neina skýringu á því hvers vegna hann hefði verið settur út úr liðinu en hann sagðist virða ákvarðanir Roeders enda væri hann stjórinn. Hann skilji ekkert í því af hverju hann sé ekki valinn.
Það er alveg hreint makalaust að leikmaðurinn láti svona bull út úr sér því hann hefur hreinlega ekkert getað og því lang hreinlegast að velja hann ekki.
Luque sagði einnig að þeir hjá Newcastle væru ekki að leita eftir hæfileikum þessa stundina. Þeir vildu bara menn sem gætu kýlt fram á framherjana. Slík ummæli dæma sig líka sjálf.
Roeder segist hafa séð allt þetta margoft áður, erlendir leikmenn fari í heimablöðin þegar illa gangi, menn ættu ekki að gleyma því að hann var með Paolo Di Canio sem leikmann hjá Hömrunum. Hann segir þó að Luque hafi farið frekar varlega í kommentum sínum. Stjórinn er á því að hjalið um að hann vilji bara leikmenn sem hlaupi um og kýli fram séu þó alveg út úr korti og einfaldlega ósönn. Hann vilji alls ekki slíkan bolta, ekki frekar en áhangendur liðsins. „Ég vil hjálpa Albert en fyrst verður hann að hjálpa sér sjálfur því hann virðist ákaflega óhamingjusamur sem stendur.“
Roeder segist hafa tekið Matty Pattison með í Villa leikinn því hann hafi talið að strákurinn myndi njóta góðs af reynslunni. Patti eigi líklega eftir að spila fyrir Newcastle einn daginn. Hann segir að Albert hafi æft vel um helgina og nú sé stefnan að byggja hann upp í rólegheitunum og koma honum inn í hópinn. Það sé alveg vonlaust að hafa hann lullandi um í fýlu. „Við viljum leikmenn sem eru ánægðir og með bros á vör. Ég veit hvað Albert getur. Þegar ég var stjóri West Ham sá ég mikið til Real Mallorca því við höfðum áhuga á Samuel Eto’o og Luque lék við hlið hans. Ég veit að hann lenti í vondum meiðslum á þeim stutta tíma sem hann hefur verið hér. Reyndar segir Derek Wright mér að meiðsli hans hafi verið eins slæm og þau geta orðið. Nú er hann orðinn heill á nú og hann verður að sýna mér og hinum leikmönnunum að hann vilji vera í liðinu okkar.“

14.2.2006

Woody heim...nei nei nei
The Journal greindi frá því í morgun að væntanlega muni Real Madrid bjóða Newcastle að nýta forkaupsrétt sinn og fá Jonathan Woodgate aftur á SJP. Madrid greiddi Newcastle 13,4 milljónir punda fyrir Woody sumarið 2004 en sagt er að þeir muni láta sér nægja að fá um 6 milljónir punda fyrir hann nú. Sagt er að félögin hafi gert einhvers konar heiðursmannasamkomulag varðandi Woodgate og því geti Newcastle sagt nei áður en hann verði boðinn öðrum.
Freddi Shepherd hefur ávallt sagt að Woody væri velkominn heim aftur og kannski gefst honum tækifæri til að efna það næsta sumar. Allt veltur þó væntanlega á næsta stjóra Newcastle. Það er ef til vill hreint ekki fýsilegt að veðja á mann sem hefur verið meiddur meira og minna allan sinn feril. Svo gæti líka vel farið svo að Newcastle myndi bjóða Albert Luque í skiptum því líkurnar á að hann eigi eftir að blómstra á Tyneside eru hverfandi.
Newcastle menn sögðu í dag að þeir hefðu ekki heyrt orð frá Real og fréttir þessar kæmu mjög á óvart. Eftir því sem þeir vissu best væri Woody ánægður í Madrid.

13.2.2006

Martin eða Ottmar?
Fréttir af stjóramálum eru óljósar en hinir ýmsu miðlar eru þó að reyna að vera fyrstir til. Um helgina skrifaði Alan Oliver hjá Chronicle um að Newcastle myndi hefja viðræður við Martin O’Neill í vikunni og að líkur væru á að hann myndi velja Newcastle þó svo að enskir vildu fá hann til að taka við landsliðinu. The Times styður þessa frétt í dag en The Sun segir að hann bíði eftir næsta útspili frá enska knattspyrnusambandinu. Daily Mail segir hann hins vegar ætla að hafna tilboði Newcastle upp á 2,5 milljónir punda á ári og taka við landsliðsdjobbinu.
Sky er á annarri línu og greinir frá því að Newcastle sé tilbúið að hefja viðræður við Ottmar Hitzfeld. Hann sé jafnvel á leið til Newcastle í dag.
Hvað svo sem rétt reynist þá ber fjölmiðlum saman um að Glenn Roeder muni stýra liðinu gegn Southampton í bikarleiknum en síðan ei meir. Roeder getur verið ánægður með árangur sinn en hann segist ekki sjá neina ástæðu til að Shepherd ætti að bjóða sér starfið. Verkefni hans hafi einfaldlega verið að ná í eins mörg stig og hann gæti á meðan verið væri að finna nýjan mann, síðan ætti hann að snúa aftur til starfa með unglingaliðið. Hann segist mjög sáttur við það.

13.2.2006

Spjaldi mótmælt
Newcastle hefur ákveðið að áfrýja vegna brottreksturs Babayaros gegn Aston Villa. Baba fer í tveggja leikja bann að öllu óbreyttu en brottreksturinn var óneitanlega ansi vafasamur. Babayaro segir að Baros hafi fallið of auðveldlega í jörðina en framherjar geti auðvitað gert slíkt. Hann segist hafa sagt dómaranum að það væri í lagi að dæma víti en ekki að gefa rauða spjaldið líka. „Hann var á leið frá markinu, Shay Given var á leið út og það voru fleiri leikmenn í kring. Það hefðu verið meiri vandamál fyrir okkur ef þeir hefðu skorað svo að varsla Shays var okkur gríðarlega mikilvæg. Ég var honum svo þakklátur að ég bauðst til að bera hann niður göngin þegar liðið kom af velli í leikslok,“ segir Baba.
Þar sem Baba fékk þriggja leikja bann fyrir að brjóta á Tim Cahill í leik gegn Everton þýðir rauða spjaldið nú tveggja leikja bann. Að öllu jöfnu væri það aðeins eins leiks bann. Newcastle menn freista þess nú að fá seinna leikbanninu hnekkt svo hann geti spilað deildarleikinn gegn Charlton en þurfi aðeins að hvíla gegn Southampton á laugardag.
Given segir Baba hafa verið frekar óheppinn og að gult spjald hefði í rauninni verið meira en næg refsing. Shearer er sammála og segir að Baros hafi gert vel í að ná boltanum en þar sem hann sé á leið frá marki hefði víti átt að vera næg refsing.
Öll þessi ummæli benda til að Baba hafi krafsað eitthvað í Baros en það var varla að sjá slíkt á myndum frá leiknum, þar virtist Baros einfaldlega henda sér niður.

13.2.2006

Suddalega sætt
Newcastle vann feikilega sætan sigur á Aston Villa á Villa Park á laugardag. Shola Ameobi skoraði strax á 2. mínútu en Luke Moore náði að jafna metin. Charles N’Zogbia kom Newcastle svo aftur yfir fyrir hlé. Í seinni hálfleik var Babayaro rekinn af velli og víti dæmt en Shay Given varði spyrnuna frá Baros. Newcastle náði í framhaldinu að standa af sér stórsjó Villa sókna og stóð uppi sem sigurvegari eftir hreint magnaða spennu.

10.2.2006

Bara þann besta
Alan Shearer hvetur Freddy Shepherd til að leita dyrum og dyngjum að næsta stjóra og hætta ekki fyrr en hann finnur einfaldlega besta manninn í starfið. Shearer segir að sá geti komið hvaðan sem er ef hann hafi bara það sem til þarf. „Ég reikna með að þeir leggi afar hart að sér á bak við tjöldin. Ég held að þeir muni gefa sér tíma ef þarf því þeir verða að gera rétt. Ráðningin verður að vera sú rétta. Það hafa verið margir stjórar hjá Newcastle United hver svo sem ástæðan fyrir því er en sá næsti er gríðarlega mikilvægur. Vonandi geta þeir valið þann rétta svo klúbburinn geti unnið til einhverra verðlauna. Þetta er ekki starf fyrir hvern sem er, það þarf einhvern sérstakan. En ég myndi ekki segja að það yrði að vera breskur stjóri eða segja nokkuð annað slíkt, þetta verður bara að vera rétti maðurinn. Ég veit ekki hvers konar óskalista þeir eru með en þeir munu skoða alls kyns kandídata og leita þess besta,“ segir Shearer.

10.2.2006

Hoddle skaust upp listann
Veðbankarnir breyta stuðlum sínum varðandi hverjir eru líklegastir í að fylla stjórastólinn á SJP eftir því hvernig veðjað er. Þannig gerðist það síðustu dagana að menn fóru að veðja feitt á Glenn Hoddle og síðan Sam Allardyce. William Hill ákvað því að breyta stuðlunum og er Allardyce nú líklegastur með stuðulinn 2/1. Hoddle skaustu upp listann en hann hafði verið með líkurnar 40/1. Hann fór í annað sætið og er nú með 3/1. Þriðji er Martin O’Neill með 7/2 og Luiz Felipe Scolari kemur svo fjórði með 5/1. Þetta þarf þó ekki að segja neitt um það hver verður svo ráðinn.

10.2.2006

Moore með í stórsigri
Craig Moore spilaði með varaliði Newcastle þegar liðið burstaði Ashington í Norðumbralandsbikarnum á Kingston Park í gær. Ekki reyndi mikið á Moore sem lék fyrri hálfleikinn því varla er hægt að tala um að Ashington hafi verið með í leiknum. Carl Finnigan setti fyrsta markið á 5. mínútu eftir fyrirgjöf Martin Brittains og mörkum átti eftir að rigna. Finnigan setti annað mark eftir að markvörður Ashington hafði misst boltann frá sér eftir langskot frá Alan O’Brien. Hægri bakvörðurinn Liam Atkin skoraði á 32. mínútu og staðan var 3-0 í hálfleik.
Seinni hálfleikurinn var enn betri. Vinstri bakvörðurinn Phil Cave gerði fallegasta mark leiksins á 52. mínútu með þrumufleyg og Atkin setti annað mark sitt á 76. mínútu. Þrjú mörk komu svo á lokamínútunum. Matty Pattison skoraði það fyrsta, Finnigan fullkomnaði svo þrennu sína en það var Daryl Smylie sem átti lokaorðið þegar þrjár mínútur voru eftir. Úrslitin 8-0 og óhætt að segja að Newcastle hafi labbað áfram í keppninni.

Lið Newcastle: Krul, Atkin, Cave, Moore (Smylie 45), Edgar, Farman, Brittain (Baxter 64), Gate, Finnigan, Pattison, O'Brien (Shanks 64).

9.2.2006

Einfaldlega bestur
Michael Owen er ánægður með að Alan Shearer sé búinn að slá markametið á SJP. Owen er auðvitað að jafna sig af meiðslum og á mánudaginn varð hann faðir í annað sinn en þá kom James Michael í heiminn. Owen sagði í dag að það væri frábær árangur hjá Alan að slá metið og hann segist hafa glaðst mjög. Enn sætara hafi verið fyrir Shearer að dagurinn var góður fyrir Newcastle United. „Hann hefur spilað fyrir nokkra klúbba á ferlinum og alltaf skorað mörk en að skora svona mörg fyrir einn klúbb er frábær áfangi fyrir hann. Skor hans er í rauninni alveg hreint ótrúlegt. Þegar maður er kominn á þennan aldur og á sínu síðasta tímabili er aldrei að vita nema maður lendi í meiðslum og það komi í veg fyrir að maður nái áfanganum. En nú þegar hann búinn að því er ég viss um að hann getur slakað á, notið þess að spila fótbolta og vonandi náð að setja nokkur í viðbót áður en hann leggur skóna á hilluna. Ekki gleyma mörkunum sem hann gerði hjá Blackburn og Southampton og líka fyrir England. Það er ótrúlegt hvað hann hefur skorað mikið per leik. Ég var að horfa á Sky um daginn og þeir komu með lista yfir þá markahæstu og hann var nánast með tvöfalt á við alla hina. Hann hlýtur að vera besti leikmaðurinn síðan þessi deild byrjaði, án nokkurs vafa. Það er við hæfi að hann skuli slá svona mörg met og sérstaklega svona magnað met sem hefur svo mikla þýðingu fyrir hann. Það er mikill heiður fyrir hann að vera kominn á toppinn yfir markaskorara fyrir heimaliðið,“ segir Owen.

9.2.2006

Hvað gerir Lukki?
Það vakti óneitanlega nokkra athygli að Albert Luque var ekki í liði Newcastle um síðustu helgi. Albert var hreinlega ekki valinn í hópinn og skrapp heim til Spánar. Glenn Roeder segist hafa rætt við Luque og neitar því að leikmaðurinn hafi farið í fússi. Roeder segir í fína lagi með Spánverjann, þeir hafi átt gott samtal. Luque hafi sagt sér sína hlið á málunum og það hafi verið gott að heyra hana. Roeder segir Luque vera týpískan spænskan leikmann með mikla hæfileika. Enskukunnáttan sé alltaf að batna og nú verði bara að reyna að finna leið til að ná því besta út úr leikmanninum. Það er vonandi að Roeder takist að vekja Spánverjann sem hefur sannlega verið skelfilega lélegur með Newcastle.

9.2.2006

Slagur við England?
Það kann að fara svo að Freddy Shepherd lendi í baráttu við enska knattspyrnusambandið um stjóra. Englendingar þurfa að finna mann til að taka við af Sven Göran og Shepherd hefur sagt að hann muni ekki flýta sér og kunni að bíða fram á sumar. Tommy Craig myndi þá stýra liði Newcastle í síðustu leikjum tímabilsins þar sem Roeder og Shearer hafa aðeins tímabundið leyfi.
Mögulegt er að Newcastle sækist eftir sama manni og enska knattspyrnusambandið. Shepherd hefur ekki sagt neitt um hverjir séu á óskalista enda væri það frekar heimskulegt. Samkvæmt The Journal er hins vegar óskalistinn mjög svipaður óskalista enska knattspyrnusambandsins. Á listanum eru nöfn á borð við Martin O'Neill, Sam Allardyce, Guus Hiddink og Luiz Felipe Scolari.
Þá er uppi orðrómur um að Sven Göran sé á listanum hjá Shepherd og nóg hefur verið rætt um Ottmar Hitzfeld.

9.2.2006

Góð byrjun
Daryl Smylie var í fyrsta sinn í byrjunarliðinu hjá U21 landsiði Norður Írlands í gær. Smylie lék fyrri hálfleikinn og óhætt er að segja að hann byrji vel því liðið vann Ísraelsmenn 1-0 í Nazareth. Mark Norður Íra kom á 38. mínútu og skoraði Richard Clarke en varamarkvörðurinn Paul Willis var hetja liðsins og varði víti í seinni hálfleiknum.

9.2.2006

Þrír hjá Stockport
Þrír fyrrum leikmenn Newcastle spiluðu með varaliði Stockport á þriðjudagskvöldið. Þetta voru varnarmaðurinn David Beharall og miðjumennirnir Jamie McClen og Mark Boyd en líklega muna menn best eftir McClen. Stockport steinlá fyrir Man City á Edgeley Park, tapaði 3-0. Allir þessir strákar eru uppaldir hjá Newcastle en hafa einnig leikið fyrir Carlisle. Stockport er í miklum vandræðum því liðið vermir botnsætið í 2. deildinni og er því líklega á leið út úr deildakeppninni.

8.2.2006

Enn einn áfanginn?
Alan Shearer getur farið að miða á enn einn magnaðan áfanga með Newcastle United. Al hefur nú spilað 394 leiki með liðinu og vantar því aðeins sex stykki upp á að komast í klúbb þeirra fáu sem hafa náð 400 leikjum. Ef Alan nær þessu verður hann áttundi leikmaðurinn í sögu félagsins til að ná þessum áfanga. Það eru vitanlega glæstir kappar sem skipa 400 klúbbinn og hér gefur að líta lista yfir þá, leikjafjöldann og á hvaða árum þeir léku fyrir félagið.

496 Jimmy Lawrence (1904-22)
472 Frank Hudspeth (1910-29)
457 Frank Clark (1962-75)
432 Bill McCracken (1904-23)
431 Alf McMichael (1949-63)
412 David Craig (1962-78)
408 Bobby Mitchell (1949-61)

8.2.2006

Mælt með Ottmari
Alan McInally segir að Newcastle gæti gert margt vitlausara en að ráða Ottmar Hitzfeld á SJP. Freddy Shepherd segir að félagið hafi ekki haft samband við neinn enn en mikið er spekúlerað á vefnum. Nafn Hitzfelds var á stórum þýskum fána Leazes End megin á laugardaginn og áhangendur hafa sett upp vefsíðu honum til dýrðar. McInally spilaði með Bayern München en var reyndar ekki undir stjórn Ottmars. Hann segir þó engan vafa á að Ottmar sé almennt talinn einn helsti sérfræðingur Þjóðverja í boltanum eftir magnaða frammistöðu með Bayern. McInally spilaði á sínum ferli einnig með Celtic og Aston Villa og segist afar hrifinn af aðferðum Hitzfelds. Karlinn náði að vinna sex þýska meistartitla og vinna meistaradeildina í tvígang, einu sinni með Dortmund og svo með Bayern.
McInally segir: „Ég var lengi í Þýskalandi og ég hef ekki heyrt nokkurn mann sem tengist fótbolta segja styggðaryrði um Ottmar. Hann er einn af séntilmönnunum í boltanum sem kann að vinna með toppspilurum í Evrópu, það hefur hann sannað með Bayern og Dortmund. Það er erfitt að vera stjóri í Þýskalandi. Ég man að Franz Beckenbauer sagði mér að menn reiknuðu bara með því að Bayern ynni deildina og svo er líka pressa á menn að vinna Evrópubikarinn, þannig er hugarfarið í Þýskalandi.
En Ottmar þekkir toppleikmennina og veit hvernig á að fást við leikmenn sem ganga of langt. Ég þekki ekki æfingakerfi hans 100% en ég veit að hann er mikill vinur Alex Ferguson. Hann er vissulega einn af stóru stjórunum og það er mikið starf að stýra klúbbi eins og Newcastle. það gæti verið vænlegt fyrir hann sem stendur.
Ég var svo heppinn að vinna titilinn þegar ég var í Þýskalandi og ég var hissa á því hvað Þjóðverjarnir nálgast fótboltann á ólíkan máta. Þeir leggja gríðarlega hart að sér á vellinum og stöðumat yngri leikmannanna á vellinum er einstakt.“
Af nýjum nöfnum í umræðunni má nefna Claudio Ranieri en mikið hefur verið veðjað á hann síðustu dagana. Raninn hefur ekkert komið nálægt boltanum síðan hann var með Valencia en hefur sagt að hann vilji koma aftur í enska boltann. Martin O’Neill þykir enn líklegastur og Luis Felipe Scolari kemur þar á eftir.

8.2.2006

Faye féll út
Amdy Faye hefur staðfest að hann sé hættur að leika með landsliði Senegala en liðið datt út í undanúrslitum Afríkukeppninnar í gær. Faye mætir til æfinga með Magpies á mánudaginn en landslið hans tapaði 2-1 fyrir Egyptum í Kairó. Faye segir liðið ekki hafa staðið sig illa í riðlinum, það hafi fengið á sig mörk vegna smávægilegra mistaka. Erfitt hafi verið að spila gegn Ghana, Nígeríu og Zimbabwe með stuttu millibili. Faye segir að félagar sínir í Newcastle hafi hringt í sig og látið vita af brottrekstri Souness. Hann segist hafa hugsað mikið um þetta og sér finnist leitt að sá á eftir Souness enda hafi hann keypt sig til félagsins.
Faye á eftir að leika gegn Nígeríu um þriðja sætið í Afríkumótinu.

8.2.2006

Emre fékk á baukinn
Emre var í gær dæmdur í sex leikja bann með tyrkneska landsliðinu. Fifa dæmdi hann í leikbannið vegna ólátanna sem urðu eftir leikinn gegn Sviss í umspili um sæti á HM. Tyrkir fengu sannarlega á baukinn og verða að spila næstu sex leiki fyrir luktum dyrum á hlutlausum velli. Knattspyrnusambandið var dæmt í 90.000 punda sekt og er greinilegt að Sepp Blatter ætlaði sér ekki að taka neinum vettlingatökum á Tyrkjunum. Það er svo alltaf gaman að velta fyrir sér hvort sams konar niðurstaða hefði fengist ef um hefði verið að ræða lið Þýskalands eða Englands. Hætt er við að menn hefðu verið aðeins mildari í dómnum. Emre var einnig dæmdur í 7.500 punda sekt.

7.2.2006

Loksins stemmning
Scott Parker þurfti að bíða í sex mánuði til að upplifa alvöru stemmningu á SJP. Parker þótti flott að spila undir frábærum takti Toon hersins gegn Pompey á laugardaginn og sagði hávaðann hafa verið magnaðan. Nú vill hann að liðið sjái til þess að stemmningin haldist svona áfram.
„Þetta var sá St James’ Park sem ég hafði alltaf heyrt talað um. Þetta var ótrúlegt. Við verðum að sjá til að þetta verði svona og við getum ekki átt von á því að áhangendurnir svari ef við stöndum okkur ekki. Við gáfum þeim eitthvað til að garga á,“ segir Parker.
Parker veit sem er að liðið lék mun betur en upp á síðkastið. Menn hafi verið fullkomlega klárir í slaginn frá upphafsflautinu. „Við vissum að við urðum að vinna leikinn og ekkert annað yrði ásættanlegt. Þetta var mikilvægur leikur og allir gáfu allt sitt í hann.“
Parker segir samt að liðsandinn hafi ekkert breyst, menn hafi alltaf staðið vel saman. Menn hafi orðið að gera það þegar illa gekk og þeir hafi gert það sem endranær um helgina. Hann segir að leikmenn hafi myndað baráttuhring fyrir leikinn til að sýna stuðningsmönnum að allir stæðu saman. Menn hafi vitað að áhangendur hafi verið orðnir heldur lágstemmdir og þetta hafi virkað til að hvetja þá til dáða.

Parker segir það hafa létt mjög á mönnum þegar N’Zogbia setti fyrra markið skömmu fyrir hlé og það hafi líka mátt heyra léttast yfir stuðningsmönnunum. Hann segir helsta verkefni Roeders að ná stöðugleika í liði sem hafi verið að spila undir getu.

7.2.2006

Þýskalandsherferðin
Margir Toonherjar vilja að Ottmar Hitzfeld verði ráðinn næsti stjóri Magpies. Sett hefur verið í gang heljar áróðursherferð sem miðar væntanlega að því að koma honum til valda. Ekki þarf að fara í grafgötur með að Þjóðverjinn á glæsilegan feril að baki en það gefur þó ekki neitt þegar í baráttuna í Englandi væri komið. Ljóst er að Ottmar á stuðningsmenn hér sem erlendis og víst er hann með heitari kostum á pappírunum. Fyrir þá sem hafa áhuga á að kynnast Ottmari og kostum hans er rétt að benda á mikla samantekt sem liggur nú á netinu honum til dýrðar.

6.2.2006

Hvað gerir Freddi?
Enn hefur ekkert skýrst varðandi ráðningu nýs stjóra á SJP. Margir telja að Freddy reyni að hlusta betur á áhangendur en síðast enda var Souness svo óvinsæll að verk hans var í rauninni vonlaust. Hann var í raun dauðadæmdur frá upphafi þar sem svo stór hluti stuðningsmanna var mótfallinn ráðningunni. Martin O’Neill virðist vinsæll kostur og líklega mun Freddy ræða við hann. Margir telja að hann muni ekki snúa aftur að svo stöddu. Þá er komin af stað mikil herferð þeirra sem styðja ráðningu Þjóðverjans Ottmar Hitzfeld. Stuðningsmenn Þjóðverjans hafa meira að segja sett upp vefsíðu í þeim tilgangi að auka líkur á að hann verði ráðinn, hvort sem það mun nú hafa eitthvað að segja eður ei.
Margir telja líklegt að Roeder verði með liðið út tímabilið en einn galli er á þeirri gjöf Njarðar. Roeder hefur aðeins leyfi til 27. apríl og því verður Newcastle að fá nýjan stjóra fyrir þann tíma. Annars verður liðið stjóralaust í tveimur síðustu leikjum sínum. Hvernig Freddi og kó leysa þetta skal ósagt látið.
Freddy sagði á dögunum að þegar hefðu nokkrir sótt um stöðuna. Oft hefur verið talað um að Stóri Sam Allardyce væri líklegur en Bolton hefur ávallt neitað því að hann komi til greina. Svo er annað sem mælir því í mót, áhangendur Newcastle eru áreiðanlega ekki nema rétt mátulega hrifnir af Sam og því gæti hann lent í sama pyttinum og Souness.
Það er augljóslega lykilatriði að Freddy velji mann sem fólkið styður. Það er líka lykilatriði að stuðningsmenn geri sér grein fyrir því að árangur er ekki sjálfgefinn þó einhver vinsæll stjóri sé mættur á svæðið. Ruud Gullit og Kenny Dalglish voru vinsælir en náðu ekki árangri. Áhangendur verða að gefa nýjum stjóra tíma og tækifæri til að byggja upp og þá verður að hugsa málið í árum en ekki mánuðum. Ef menn ætla að gera eitthvað af viti verður að vera með nokkurra ára áætlun í gangi. Allt annað er tómt rugl.
Það er erfitt verkefni sem Freddi stendur frammi fyrir og nokkrar líkur á að ef honum takist illa upp fái hann ærlega á baukinn. Það er nefnilega líklegt að ef mistök verða gerð nú beinist reiði stuðningsmanna að stjórn félagsins. Við getum ekkert annað en beðið spennt.

6.2.2006

Gríðarlegur feill
Malcolm Macdonald hefur aldrei verið spar í gagnrýni á stjóra og leikmenn Newcastle. Graeme Souness fékk oft vænar slettur frá Supermac og um helgina kom enn ein gusan. Supermac segir að Souness verði minnst fyrir að hafa eytt yfir 47 milljónum punda í að eyðileggja lið sem hafi komist reglulega í Evrópukeppni og í stað þess sé komið fallbaráttulið. Þessi staðreynd hafi ekki aðeins verðskuldað brottrekstur heldur ætti hún að koma í veg fyrir allar frekari greiðslur til karlsins. Souness hafi nefnilega séð sjálfur um að reka sig. Það muni taka næsta stjóra langan tíma að lagfæra skemmdirnar sem Souness hafi unnið á SJP. „Lítið bara á sum innkaup Souness - 17 milljónum punda var gjörsamlega sóað í Jean Alain Boumsong og Albert Luque. Boumsong er algjörlega hörmulegur og Luque hefur sýnt svo lítið að Souness var ekki einu sinni með hann sem byrjunarmann í sjokkerandi lélegu United liði. En þessu er ekki þar með lokið. Celestine Babayaro virðist algjörlega áhugalaus, enginn eldmóður eða kraftur í honum, og Amady Faye er hvergi nærri góður til að vera leikmaður Newcastle. Ég horfði á leikinn fara framhjá honum þegar Portsmouth kom á SJP og síðan var hann keyptur!,“ segir markahetjan.

Supermac segir vandann ekki úr sögunni þó Souness hafi verið rekinn. Glenn Roeder geti ekki veifað töfravendi og gert vonda menn að góðum. Hann geti auðvitað eflt móralinn í liðinu og bætt taktíkina en nú sé leikmannamarkaðurinn lokaður og ekki hægt að kaupa inn. Hann verði því að vinna með þann hóp sem sé til staðar og sumar stöður séu einfaldlega illa mannaðar.

Supermac segir líka einstaklega vont að horfa upp á árangurinn sem Mark Hughes hafi náð með Blackburn. Newcastle hafi tapað síðasta heimaleiknum undir stjórn Souness fyrir Blackburn og á sama tíma og liðið hafi steinlegið 3-0 í Manchester hafi vel skipulagt Blackburn lið unnið Man United 4-3. Newcastle hafi borgað Blackburn fyrir að fá Souness en Supermac segist vita hver hafi grætt á þeim díl. Það hafi tekið Hughes 18 mánuði að koma lagi á Blackburn en Souness 18 mánuði að rústa Newcastle. „Það sem við sáum gegn Manchester City var skömm, þetta voru rústir. Souness reyndi að tefla fram demantsmiðju en ég gat ekki séð neitt annað en Lee Clark og Scott Parker að þvælast hvor fyrir öðrum og það þýddi að hvorugur spilaði hægra megin sem gerði það að verkum að eymingja Peter Ramage var hroðalega einn. Á meðan Stuart Pearce hamaðist um við hliðarlínuna allan leikinn og hvatti varnarmenn sína til að pressa fram eða koma aftur sást ekki neinn koma úr skýli Newcastle United. Þeir bara sátu þar allir steini lostnir. Það var kominn tími til að þeir færu.“

Supermac segir skemmdirnar miklar og að það taki langan tíma að laga til. Það sé þó bót í máli að verkið sé hafið.

Eins og oft áður fer Supermac dálítið geyst í gagnrýninni og fellur í nokkra augljósa pytti. Það er ekki hægt að segja að liðið hafi verið merkilegt þegar Souness tók við og því verður ekki séð að hann hafi eyðilagt lið sem var líklegt til að komast í Evrópukeppnina. Þá er ekki hægt að vera sammála því að allt sé blómstrandi í garðinum hjá Blackburn þó liðinu hafi vissulega farið eitthvað fram. Það er fullkomlega eðlilegt að gagnrýna Souness og hans verk en það er líka alveg nóg að gera það á raunhæfum nótum og fara ekki að bulla einhverja steypu. Eða eru menn á því að liðið hafi verið mjög gott áður en Souness tók við og sé hörmulegt núna? Ef svo er þá eru menn líklega sammála Supermac.

5.2.2006

Í skýjunum
Alan Shearer var að vonum glaður með að hafa sett markamet hjá Newcastle. „Ég er afar hamingjusamur maður þessa stundina. Ég veit hvers virði Jackie er og var fólkinu. Ég get sofið vel núna þegar pressunni er létt af mér,“ sagði Shearer. Fyrirliðinn sagði reyndar að markið hefði ekki skipt mestu máli, mikilvægara hefði verið að landa sigri fyrir Newcastle. Shearer sagði einnig að hann hefði klúðrað færi gegn Cheltenham í síðustu viku svo hann gæti sett metið heima. Hann sagði Glenn Roeder og áhangendur eiga sinn þátt í góðum sigri, allir hefðu staðið með liðinu frá fyrstu mínútu. Svo bætti hann við: „Ég vildi að Graeme hefði verið hér til að sjá þetta því hvað svo sem mönnum finnst um hann þá er hann heiðarlegur, sanngjarn og ekta maður. Það gekk bara ekki upp hjá honum hérna vegna meiðslanna. Við urðum að bregðast rétt við stöðunni gegn Portsmouth og sem betur fór tókst það. Fólk mun spyrja hvers vegna Newcastle hafi ekki spilað svona undir stjórn Souness. Ég get ekki svarað því.“

5.2.2006

Allt opið
Freddy Shepherd heldur öllum möguleikum opnum í leitinni að nýjum stjóra. Hann segir að útlendingur komi vel til greina þó svo hann hafi verið þekktur fyrir að vilja frekar heimamann. Freddy sagði í samtali við Sunday Mirror að á þessum erfiðu tímum væri hann á því að menn yrðu að skoða hvern einasta möguleika er gæfist. Shepherd segist vera til í að bíða þar til eftir HM ef þess þurfi. Hann ætli sér að fá rétta manninn og þessi ummæli benda til þess að menn á borð við Guus Hiddink, Luiz Felipe Scolari og Sven-Goran Eriksson séu í raun inni í myndinni. Freddy segir að best væri að klára dæmið sem fyrst en það verði bara að vera á hreinu að maðurinn sé sá rétti og því geti allt eins orðið að bíða.

5.2.2006

Sjálfsmorð
Sir Bobby Robson segir það ekki hafa komið sér á óvart að Graeme Souness var látinn fara. Hann segir Souness að sumu leyti hafa klúðrað málum. „Graeme lenti í erfiðum meiðslamálum en hann lét líka góða menn fara, bæði með að selja þá og lána.
James Milner, Jermaine Jenas, Darren Ambrose, Craig Bellamy, Laurent Robert, Aaron Hughes, Andy O'Brien - allir þessir hefðu gert sitt fyrir liðið. Ég veit manna best að Craig gat verið illþolandi en hann var ekki svo slæmur að ekki væri hægt að ráða við hann,“ segir Bobby.
Þá efast gamli maðurinn um að æfingaprógramm Souness hafi verið gott. „Undanfarnar vikur hefur verið talað um meiðslabölvun en ég kaupi það ekki. Auðvitað hefur liðið verið óheppið en það var samt nóg af dýrum mönnum á vellinum til að gera betur. Samt sem áður hefur hinum mörgu mistökum Jean-Alain Boumsong í vörninni ekkert fækkað undir stjórn Graeme og þjálfara hans og ég skil nú bara ekki hvernig það má vera.“

5.2.2006

Tap í Sheffield
U18 lið Newcastle tapaði í gær fyrir Sheffield Wednesday á útivelli. Ugludrengir skoruðu eina mark leiksins en ungmennaliðið var nú undir stjórn Kenny Whartons þar sem Roeder hafði verið kallaður til æðri verka. Það var Ben Fairclough sem skoraði sigurmark Wednesday á 81. mínútu en Wharton sagði reyndar að Newcastle hefði í tvígang verið heppið að sleppa við vítaspyrnu. Segja má að Ugludrengir hafi þarna hefnt tapsins í bikarnum.
Lið Newcastle: Forster, Cowan, Deverdics, Morris (Godsmark 45), Marr, Baxter, Shanks, Terrell, Carroll, Troisi (Doninger 77), Reay (LuaLua 77).

5.2.2006

Mikið betra
Alan Shearer var maður dagsins þegar Newcastle vann Portsmouth 2-0 á SJP. Souness lausir léku Newcastle menn eins og þungu fargi væri af þeim létt og var sigurinn aldrei í hættu. Hefði raunar getað orðið mun stærri, slíkir voru yfirburðir liðsins. Charles N’Zogbia skoraði fyrra markið undir lok fyrri hálfleiksins og Shearer skoraði svo það seinna og sitt 201. fyrir klúbbinn í þeim seinni. Þar með er hann orðinn markahæsti leikmaðurinn í sögu klúbbsins.

3.2.2006

Bara til bráðabirgða
Alan Shearer segir í samtali við The Sun að hann muni ekki sækjast eftir stjórastöðu Magpies til frambúðar. „Þetta er klúbburinn minn, ég mun alltaf verða svartur og hvítur. En ég ætla að segja það hér og nú að ég vil ekki verða næsti stjóri, tíminn er ekki réttur fyrir mig eða klúbbinn. Ég er bara að hugsa um hvað sé Newcastle United fyrir bestu og nú væri ekki það besta að fá Alan Shearer sem framkvæmdastjóra. Ég hef sagt leikmönnunum þetta og Glenn hefur líka útilokað að hann taki við stöðunni nema til bráðabirgða,“ sagði Shearer.
Svo virðist einnig að útiloka megi Paul Jewell en hann hafði verið nefndur til sögu. Jewell segir hins vegar að Wigan sé málið fyrir sig.

3.2.2006

Flestir vilja Martin
Stuðningsmenn Newcastle virðast helst vilja fá Martin O’Neill sem næsta stjóra. Martin hætti hjá Celtic fyrir níu mánuðum vegna veikinda konu sinnar en þrátt fyrir þau veikindi eru vemangararnir hjá William Hill með hann efstan á blaði ásamt Sam Allardyce. Sam hafnaði tilboði Fredda í síðustu lotu og því verður að teljast ólíklegt að stjórnarformaðurinn bjóði honum aftur í slaginn. TalkoftheTyne vefsíðan var með skoðanakönnun þar sem menn voru beðnir að velja óskastjóra. Martin O’Neill er efstur með 52% atkvæða en Ottmar Hitzfeld er næstur með 21%. Sam hefur 13%, Sven Goran 8% og aðrir minna. Veðbankar eru að koma með ýmis nöfn upp. Þannig er William Hill með Luis Felipe Scolari heitan, reyndar í þriðja sætinu.
Spurning er hvort Martin O’Neill slær til ef til hans verður leitað. Víst er að hann hefði stuðning á Tyneside. Hitzfeld hefur verið í fríi síðustu tvö árin og Paul Le Guen gæti langað að spreyta sig í Englaveldi.

3.2.2006

Lee vill Keegan
Robert Lee telur að Shepherd eigi að reyna að fá Kevin Keegan til að koma enn eina ferðina á SJP. Rob segir Keegan rétta manninn til að endurreisa félagið. „Ég held að þetta sé líklega full snemmt fyrir Alan Shearer. Hann vill ná í öll réttindi áður en hann tekur við erfiður starfi. Ég myndi elska að fá Kevin Keegan aftur. Ég efast stórlega um að þeir gætu fengið hann, að hann vildi fara, en ég held að fólkið myndi elska að fá hann aftur,“ segir Rob.
Rob er einnig efins um að Martin O’Neill fáist til að koma úr felum en hann er með á hreinu að Freddy Shepherd muni standa vel við bakið á þeim sem taki við. Hann segir Fredda mega þola mikla gagnrýni, suma réttmæta en aðra ekki. Hvað sem megi segja þá hafi hann látið Graeme Souness fá 50 milljónir punda.

3.2.2006

Kieron í hópnum
Kieron Dyer er í 19 manna leikmannahópi Newcastle fyrir leikinn gegn Pompey á morgun. Roeder og Shearer kynntu fyrsta hóp sinn í morgun og var nafn Dyers komið á listann eftir langt hlé vegna meiðsla og veikinda. Hvort Dyer leikur er svo annað mál en það er vissulega gott að sjá hann nálgast. Hópurinn er annars þannig skipaður:

Given, Harper, Ramage, Babayaro, Bramble, Elliott, Boumsong, Clark, Parker, Solano, Emre, Dyer, Brittain, N'Zogbia, O'Brien, Shearer, Ameobi, Luque, Chopra.

3.2.2006

Rossi með þrennu
Varalið Newcastle steinlá í gær gegn Man United á Ewen Fields vellinum. Ólánið byrjaði þegar dæmd var vafasöm vítaspyrna á Magpies. Giuseppe Rossi skoraði og kom ManU yfir. Tim Krul kom í veg fyrir að Rossi bætti við öðru marki fyrir hlé en seinni hálfleikurinn var ömurlegur. Sean Evans gerði annað markið og Rossi bætti svo tveimur við og fullkomnaði því þrennu og 4-0 sigur. Markvörðurinn Krul var besti maður Newcastle svo augljóslega hefði getað farið enn verr.
Lið Newcastle: Krul, Gate, Cave, Farman, Edgar, Smylie, Brittain, Pattison, Finnigan, Atkin, O'Brien.

2.2.2006

Sannarlega nóg komið
Með Graeme Souness hverfa einnig á braut þeir Dean Saunders, Roy Tunks, Alan Murray og Terry McDermott. Líklega eiga menn ekki eftir að sjá eftir neinum þeirra enda óhætt að segja að þeir hafi ekki unnið hug og hjörtu Toonverja. Staðreyndin er sú að áhangendur Magpies hafa kvalist á þessu tímabili og menn hafa horft á hugmyndalaust lið spila með enga sýnilega leikaðferð leik eftir leik. Það hefur því ekki verið skemmtanagildið sem hefur rekið menn til að horfa á leiki heldur einfaldlega stuðningurinn við klúbbinn.
Það var sannarlega kominn tími á að Souness færi og áreiðanlega segja margir þó fyrr hefði verið. Það verður svo sem ekki létt fyrir Roeder og Shearer að koma liðinu í stand og í raun ómögulegt að segja hvað gerist á næstu vikum. Það er þó á hreinu að þeir fá fullan stuðning Toon hersins á laugardaginn þegar liðið tekur á móti Harry Redknapp og Pompey.
Þeir Roeder og Shearer hafa fengið leyfi til að stýra liðinu næstu 12 vikurnar. Tveir úrvalsdeildarleikir verða enn eftir að þeim liðnum. Spurning er hvort Freddi ætlar sér að ráða mann fljótlega eða halda þessu svona út tímabilið.
Shearer hefur sagt mönnum að gleyma einfaldlega FA bikarnum, málið snúist um að bjarga liðinu frá falli. Skynsemin ræður hjá honum eins og fyrri daginn. Árangur liðsins upp á síðkastið er einfaldlega hroðalegur og ef Lee Clark hefði ekki bjargað stigi með síðasta sparki leiksins gegn Boro væri liðið stigalaust úr síðustu sex leikjum. Það er hreinlega ótrúlega lélegt. Og markatalan úr þessum leikjum er 2 gegn 11.
Graeme Souness stýrði Newcastle í 56 úrvalsdeildarleikjum. Liðið vann aðeins 16, gerði 17 jafntefli en tapaði 23. Hann eyddi 50 milljónum punda í leikmenn en fékk 19,4 greiddar fyrir sölur. Þessi eyðsla skilaði nákvæmlega engu hvað árangur á vellinum varðar.
Souness sagði alltaf að menn ættu ekki að dæma fyrr en hann gæti stillt upp sínu óskaliði. Ef að líkum lætur verður hans þó minnst sem eins lélegasta stjóra félagsins fyrr og síðar. Það virðist nefnilega svo að hann hafi ekki nokkra hugmynd um hvernig á að spila fótbolta. Souness er svo sannarlega ekki taktískur snillingur.

2.2.2006

Pressa á Shepherd
Auðvitað er vonlaust að segja til um það hvort þeir Roeder og Shearer klára tímabilið með Newcastle eður ei. Vonandi er Freddy Shepherd með einhverja áætlun í kollinum en það er að minnsta kosti eins gott að hún sé vel ígrunduð. Menn eiga eftir að spá mikið um hver taki við liðinu. Þegar eru nokkrir nefndir til sögunnar.

Það kemur ekki á óvart að veðbankar telji mestar líkur á að Sam Allardyce verði næstur. Það er hins vegar ekki víst að ráðning hans yrði vinsæl meðal stuðningsmanna því Sam er ekki beinlínis þekktur fyrir góðan fótbolta. Paul Jewell stjóri Wigan þykir einnig líklegur og næstir koma Steve Bruce (aaaaarrggghhhhhh), Sven Göran Eriksson og Mark Hughes. Alan Curbishley er næstur og á eftir honum kemur Alan Shearer. Aðrir sem þykja sæmilega líklegir eru Stuart Pearce, Paul Le Guen, David Moyes, Kevin Keegan, Louis van Gaal og David O’Leary. Einhverra hluta vegna eru Ladbrokes ekki með Martin O’Neill á listanum.

Chris Waddle segir að Freddy Shepherd sé undir mikilli pressu og það sé eins gott fyrir hann að vandal valið. Næsti stjóri verði einfaldlega að standa sig, það sé ekkert flóknara en svo. Waddle telur að a.m.k. tíu til 15 stjórar verði orðaðir við klúbbinn á næstunni og eflaust verði þeir Allardyce og Bruce (aaaaarrrrrggghhhh) nefndir eins og síðast. Freddy hafi einfaldlega orðið að reka Souness því það hafi verið mjög stutt í að bræði áhangenda beindist að stjórninni.

Mark Jensen ritstjóri The Mag telur klúbbinn vera að leika hættulegan leik með því að reka Souness og ráða Roeder og Shearer aðeins tveimur dögum eftir að markaðurinn lokaðist. „Ef við náum ekki nokkrum hagstæðum úrslitum bráðlega verðum við í meiri vanda en nú. Ef menn vinna ekki neina leiki og skora ekki nokkur mörk stefnir þetta bara í eina átt. Mér finnst klúbburinn hafa verið að leika afar hættulegan leik. Nú eru Roeder og Shearer með liðið út tímabilið og hendur þeirra eru bundnar. Ég held að þá vanti sárlega annan framherja sem er dáldið fljótur og kann nokkuð fyrir sér þar sem Michael Owen er frá.“ Jensen telur hins vegar að það sé léttir fyrir alla að losna við Souness þar sem hann hafi ekki verið að standa sig.

2.2.2006

SOUNESS REKINN!
Nú fyrir hádegið bárust þær fréttir frá St James’ Park að Graeme Souness hefði verið rekinn frá störfum. Ungmennaliðsþjálfarinn Glenn Roeder hefur verið settur bráðabirgðastjóri og verður Alan Shearer honum til aðstoðar. Leikurinn gegn Man City virðist hafa verið dropinn sem fyllti mælinn hjá Fredda og félögum en það er vissulega kaldhæðnislegt að stjórinn sé rekinn tveimur dögum eftir að markaðnum er lokað. Souness hefur eiginlega verið með snöruna um hálsinn síðan hann var ráðinn og nú verður fróðlegt að vita hvort Shepherd er kominn með nýjan mann inn í myndina. Það hlýtur að vera krafa áhangenda að stjórnarformaðurinn velji betur að þessu sinni því ljóst er að afar fáir höfðu áhuga á að fá Souness. Hans verður ekki minnst með neinum hlýhug á Tyneside enda hefur liðið leikið hörmulegan fótbolta undir hans stjórn. Við fáum örugglega miklu meira um þetta allt saman áður en langt um líður en næsta verkefni er augljóslega að vinna Pompey á laugardaginn.

2.2.2006

Fallþefur
Newcastle er að sogast í fallbaráttuna. Liðið steinlá í Manchester í gær og sá þar aldrei til sólar. Liðið var algjörlega hugmyndalaust og lenti undir þegar um korter var liðið af leiknum. City bætti við öðru marki fyrir hlé og því þriðja í seinni hálfleiknum. Í raun hefði tapið geta orðið enn verra, svo slæmur var leikurinn hjá Newcastle. Það er hreinlega sorglegt að horfa upp á ömurðina, ekkert gerist og ekkert gengur upp. Souness hefur sagt að menn eigi að dæma þegar hann geti teflt fram besta liði sínu en menn hljóta að dæma þetta sem óviðunandi frammistöðu hvort sem honum finnst það sanngjarnt eður ei.

1.2.2006

Langaði svo mikið?
Ekki virðist Lee Bowyer hafa langað neitt óskaplega mikið að snúa heim til Charlton ef marka má kjaftasögur dagsins. Samkvæmt þeim var hann í viðræðum við sitt gamla félag í gær en samningar tókust ekki þar sem launakröfur Bowyers voru of miklar. Þar með er ljóst að hann verður hjá Newcastle fram á sumar en varla mikið lengur en það. Souness hefur margoft sagt að Bow langi mikið heim en ekki virðist löngunin hafa verið peningahyggjunni yfirsterkari.
Annars var Newcastle ekki í neinum dansi á síðasta degi félagaskipta. Danny Murphy var seldur til Tottenham og gæti félagið þurft að borga 2 milljónir punda fyrir hann. Það er súrt að Newcastle skuli ekki gera neitt á markaðnum en nú verða menn bara að vona að liðsmenn taki sig almennilega á og geri eitthvað af viti fram til vors. Í kvöld á liðið erfiðan leik gegn Manchester City og það væri sannarlega kærkomið að taka þrjú stig þar.