Newcastle Klúbburinn á Íslandi

Fréttir í janúar 2009

31.Jan

Newcastle - Sunderland

Þá er komið að því að spila við "The Mackems" eins og stuðningsmenn Newcastle kalla þá.

Kevin Nolan mun spila sinn fyrsta leik fyrir Newcastle og má reikna með að hann verði á miðjunni með Nicky Butt sem kemur aftur inn í liði eftir að hafa tekið út eins leiks bann. Shay Given og Charles N´Zogbia verða ekki með þar sem þeir eru báðir á förum frá félaginu. Steve Bruce stjóri Wigan hefur staðfest að Newcastle hefur samþykkt tilboð í N´Zogbia og hefur hann því spilað sinn síðasta leik fyrir Newcastle. Meiðslalistinn hjá Newcastle er allsvakalegur Barton, Beye, Cacapa, Gonzalez, Guthrie, og Owen. Þeir Viduka, Ameobi og Martins eru allir byrjaðir að æfa en eru ekki orðnir leikfærir. Alan Smith er búinn að spila einn æfingaleik en er sennilega ekki klár í svona slag.

Kevin Nolan: "Ég vissi ekki að við værum að spila við Sunderland fyrr en ég var á leið hingað á fimmtudagskvöldið. Þetta er svakalegur leikur að byrja á en vonandi náum við að sigra og byrja klifra upp töfluna.

Fyrri leikur liðanna í vetur endaði með sigri Sunderland 2-1 og skoraði Ameobi mark Newcastle. leikur liðanna á SJP á síðasta tímabili endaði 2-0 og var það fyrirliðinn Michael Owen sem skoraði bæði mörk Newcastle.

Líklegt byrjunarlið: Harper, Taylor, Coloccini, Bassong, Enrique, Jonas, Butt, Nolan, Duff, Carroll, Lovenkrands.

Mike Ashley mun mæta á SJP í fyrsta sinn í langan tíma en hann hefur ekki mætt á SJP síðan Kevin Keegan hætti í september. Hann var hinsvegar á leiknum gegn Man City á miðvikudag og horfði á sína menn tapa.

Leikmannahópurinn:

Harper, Forster, Krul, Enrique, Bassong, Coloccini, Taylor, Edgar, Duff, Gutierrez, Nolan, Lovenkrands, Geremi, Donaldson, Donninger, Godsmark, Xisco, Carroll, LuaLua, Ranger

Dómari leiksins verður Howard Webb.

"Howay The Lads"

(FB)

31.Jan

Graeme Danby syngur Blaydon Races á SJP

Stærsti leikur tímabilsins fer fram á morgun sunnudag þegar erkifjendurnir Newcastle og Sunderland mætast á St James´ Park. Þetta er leikurinn sem verður að vinnast, leikir gegn liðum eins og Man Utd, Liverpool og Arsenal eru ekki stóru leikirnir í Newcastle. Þessi leikur skiptir stuðningsmenn þessara liða öllu máli.

Ég fór á minn fyrsta leik með Newcastle á síðasta tímabili og var það einmitt gegn Sunderland og unnu okkar menn 2-0. Það er ólýsanleg tilfinning að vera á meðal 52 þúsund áhorfenda og upplifa stemminguna sem er á vellinum. Fyrir leik gekk óperusöngarinn Graeme Danby um völlinn með stóran Newcastle fána og söng þjóðlag Newcastle stuðningsmanna "The Blaydon Races" við miklar undirtektir stuðningsmanna Newcastle og ætlar hann að endurtaka leikinn á sunnudag. "Ég mun aldrei gleyma þessari stund þegar við spiluðum gegn Sunderland. Sem stuðningsmaður Newcastle, að vera beðinn um að syngja The Blaydon Races á St James´ Park var eins og draumur sem rættist. Ég hef sungið á frábærum stöðum í heiminum, en að syngja fyrir framan 50.000 "Geordies" er ótrúleg upplifun" sagði óperusöngvarinn Danby.

(FB)

31.Jan

Ryan Taylor í skiptum fyrir Charles N´Væl ?

Sky Sports greinir frá því að Newcastle hafi samþykkt 6 milljón punda tilboð Wigan í Charles N´Væl og að Ryan Taylor fari til Newcastle sem partur af kaupunum. Sagt er að Newcastle vilji klára þetta mál í dag svo Taylor verði klár í leikinn gegn Sunderland. Taylor sem sést hér á myndinni tækla Jonas Gutierrez er að renna út á samning hjá Wigan.

Hann hefur spilað í hægri bakverðinum og einnig á vinstri kantinum hjá Wigan.

Ekki tel ég það vera skref uppá við fyrir hinn unga vælukjóa að fara til Wigan en hann hefur verið allsvakalega yfirlýsingaglaður um að komast í burtu frá Newcastle. Hann hefur mikið talað um að hann vilji fara til Aston Villa, Arsenal, Tottenham eða Lyon en svo endar hann sennilega bara hjá Wigan sem spilar yfirleitt alltaf fyrir hálftómum velli á JJB Stadium.

(FB)

30.Jan

Leikmannamál

# Shay Given hefur fengið grænt ljós að ræða við Man City. Talið er að City þurfi að borga á bilinu 7-8 milljónir fyrir Given sem er 32 ára. City á að hafa boðið 5 milljónir en Joe Kinnear sagði að það væri hrein móðgun að bjóða slíka upphæð í besta markmann deildarinnar.

# Newcastle er hætt við að kaupa hægri bakvörðinn Albin Ebondo frá Toulouse eftir að franska liðið hækkaði verðið á honum úr 3 milljónum í 6 milljónir.

# Ryan Taylor hægri bakvörður Wigan er sagður vera í viðræðum við Newcastle. Taylor þessi er Newcastle mönnum mjög kunnugur því hann hefur skorað í nánast hverjum leik sem hann hefur spilað gegn Newcastle. Sagt er að Newcastle þurfi að borga 1 milljón fyrir Taylor en hann rennur út á samning í sumar. Joe Kinnear hafði þetta um málið að segja í dag: "Við erum búnir að gera tilboð í hann og nú erum við bara að bíða".

# Newcastle er orðað við vinstri bakvörð Coventry Daniel Fox (22 ára). Strákurinn er mjög efnilegur og á hann einn leik að baki með U21 árs landsliði Englands. Talið er að Newcastle þurfi að borga 2,5 - 3 milljónir fyrir hann.

(FB)

30.Jan

Michael Owen frá í 4-6 vikur

Newcastle hefur staðfest að fyriliðinn Michael Owen verði frá keppni næstu 4-6 vikur. Hann meiddist á vinstri ökkla í leiknum gegn Man City á mðivikudag og kom í ljós að liðbönd eru skemmd. "Þetta er mikið áfall og meiðslin eru að hrannast upp en við verðum að gera okkar besta" sagði Joe Kinnear í dag.

(FB)

30.Jan

Kevin Nolan til Newcastle

(Nolan á SJP í dag)

Newcastle hefur gengið frá kaupum á Kevin Nolan frá Bolton fyir 4 milljónir punda. Hann gerði fjögurra og hálfs árs samning. "Þetta gerðist allt svo hratt en þetta var tækifæri sem ekki var hægt að hafna. Ég get ekki beðið eftir að spila fyrir framan þessa áhorfendur í hverri viku næstu árin" sagði skælbrosandi Nolan í dag.

(FB)

29.Jan

N´Zogbia enn með kjaftinn opinn

Enn einu sinni er Charles N´Zogbia með yfirlýsingar og nú segir hann að hann muni aldrei spila fyrir Newcastle á meðan Kinnear er stjóri. "Fyrst af öllu vill ég byðja áhangendur afsökunar að ég vilji fara héðan. Joe Kinnear hefur móðgað mig og ég mun ekki spila undir hans stjórn. Félagið er með nokkur tilboð í mig og þeir ættu að taka einu þeirra" sagði hinn yfirlýsingaglaði N´Zogbia. Wigan hefur sýnt honum áhuga ásamt Aston Villa, Arsenal og Frönsku meistararnir Lyon.

Sagt er að Newcastle vilji fá um 8 milljónir fyrir hann en þau lið sem hafa áhuga á honum vilja ekki borga svo mikið.

Það á að losa sig við svona pjakk. Hann er sífellt vælandi í fjölmiðlum um að hann vilji fara. Hann er búinn að vera efnilegur í nokkur ár en hefur aldrei virkilega sprungið út.

(FB)

29.Jan

Kevin Nolan til Newcastle ?

Sky Sports greinir frá því að Bolton hafi samþykkt tilboð frá Newcastle í Kevin Nolan. Þessi 26 ára miðjumaður hefur verið allan sinn feril hjá Bolton er talið að gengið verði frá kaupunum fljótlega.

Nolan hefur spilað 323 leiki fyrir Bolton og skorað 49 mörk. Hann á tvo U21 landsleiki að baki með Englandi.

Enn hefur ekki verið gengið frá kaupum á hægri bakverðinum Albin Ebondo en Toulouse er talið vilja fá um 3 milljónir fyrir hann en ekki 2,5 eins og talið var í fyrstu.

(FB)

29.Jan

Joey Barton frá næstu tvo mánuði

Það hefur verð staðfest að Joey Barton verður frá næstu tvo mánuðina vegna þerra meiðsla sem hann varð fyrir í gær gegn Man City. Barton er ristarbrotinn og fer í aðgerð næsta föstudag. Þetta eru svipuð meiðsli og hann varð fyrir í byrjun síðasta tímabils.

Michael Owen fer í skoðun í dag og kemur þá í ljós hversu alvarleg meiðlsi hans eru. Talið er að hann verði frá í sex vikur en það hefur ekki verið staðfest.

Ekki batnar því ástandið hjá Newcastle og er nú talið að Shay Given verði seldur til Man City fyrir um 8,5 milljónir og Charles N´Zogbia verði einnig seldur fyrir um 6 milljónir.

(FB)

28.Jan

Man City - Newcastle 2-1

(Wright Phillips 17, Bellamy 77) - (Carroll 81)

Tíunda tapið í vetur

Mikið er ég orðinn þreyttur á að skrifa um tapleiki með

okkar ástkæra liði. Í hnotskurn var leikurinn svona.

Man City mun betra í fyrri hálfleik. Owen fór meiddur útaf og var á hækjum síðast þegar fréttist af honum. SWP skoraði auðvelt mark þar sem Enrique gleymdi honum í teignum.

Newcastle aðeins betra í seinni hálfleik. Hefði átt að fá vítaspyrnu þegar brotið var augljóslega á Taylor. Barton fór meiddur af velli. Bellamy skoraði með aumu skoti rétt fyrir utan teig.

Carroll skoraði eina mark Newcastle eftir góðan undirbúning frá Edgar.

Sem sagt slakur leikur hjá okkar mönnum og tveir lykilleikmenn meiddir af velli. Að öllum líkindum eru Shay Given og Charles N´Zogbia að fara frá liðinu. Næsti leikur er enginn smá leikur gegn Sunderland á sunnudaginn. Ég verð illa svikinn ef það verður ekki búið að styrkja leikmannahópinn verulega fyrir lok félagsskiptagluggans.

Lið Newcastle: Harper, Edgar, Taylor, Bassong, Enrique, Duff, Geremi (LuaLua 90), Barton (Lovenkrands 64), Coloccini, Owen (Jonas 19), Carroll.

Ónotaðir varamenn: Forster, Xisco, Donaldson, Inman.

Gul spjöld: Taylor, Jonas.

Skot (á mark): MC 14(7) - Nufc 2(1)

Hornspyrnur: MC 7 - Nufc 0

Áhorfendur: 42,280

Maður leiksins: Andy Carroll

(FB)

28.Jan

Allt bendir til þess að Given sé á förum

Allar líkur eru nú á því að Shay Given verði seldur til Man City. Hann er ekki í leikmannahópnum í kvöld og hefur Joe Kinnear staðfest að hann vilji fara frá félaginu. "Ég hef gert allt sem ég get til að halda í Given en ég skil afstöðu hans fullkomlega. Hann hefur verið hér í 11 ár og vill nýja áskorun" sagði Kinnear í dag.

Talið er að City þurfi að borga um 10 milljónir punda fyrir Given sem er 32 ára. Kannski er þetta bara allt gott og blessað ef peningarnir verða nýttir í leikmannakaup á næstu dögum.

Það er alveg gífurlega svekkjandi að missa Given en við getum huggað okkur við það að hafa Steve Harper sem er frábær markmaður og hver veit nema hinn efnilegi Hollendingur Tim Krul komi til með að taka sæti í byrjunarliðinu á komandi árum. Ég er sannfærður um það ef Harper væri búinn að vera aðalmarkmaður Newcaslte öll þessi ár sem hann hefur verið hjá félaginu, þá væri hann fyrir löngu búinn að vinna sér sæti í enska landsliðinu sem aðalmarkmaður þar. Þetta verður kannski ekki mikil breyting fyrir okkur enda eru þeir Harper og Given sláandi líkir :)

(FB)

27.Jan

Chris Houghton blæs á sögusagnir um Given

Aðstoðarstjóri Newcastle Chris Houghton segir ekkert til í þeim sögum að ástæða þess að Steve Harper hafi gert nýjan samning við Newcastle sé vegna þess að Shay Given verður seldur til Man City. "Það eina sem menn eiga lesa úr þessu er að við viljum halda okkar bestu leikmönnum hér. Við höfum aldrei litið á Harper sem markmann númer 2, við höfum alltaf litið á hann sem markmann sem er að reyna vera markmaður númer 1. Það sem hann hefur haft fyrir framan sig er heimsklassamarkmaður sem hefur þjónað félaginu mjög vel".

Aðspurður um áhuga Man City á Shay Given sagði Houghton: "Ég veit ekki um neina ákvörðun sem City hefur tekið eða ekki tekið. Það sem við vitum að höfum mjög góðan markmann sem æfir á fullu alla daga. Ef þú skoðar frammistöðu hans þá er hann að spila sitt besta tímabil og við viljum halda honum hér"

(FB)

27.Jan

Varaliðið tapaði 3-0 gegn Man City

Varalið Newcaslte og Man City mættust í kvöld og sigruðu heimamen sannfærandi 3-0. Alan Smith spilaði í 65 mínútur og komst hann heill frá leiknum en hann hefur ekki spilað í fimm mánuði. Smith byrjaði í framlínunni ásamt Nile Ranger en hann hefur verið sjóðandi heitur í vetur.

City skoraði tvö mörk í fyrri hálfleik og það þriðja kom 10 mínútum fyrir leikslok. Leikmenn Newcastle pressuðu nokkuð á mark heimamanna í seinni hálfleik en markmaður City átti góðan dag og kom í veg fyrir að Newcastle náði að minnka muninn.

NUFC: Tim Krul, James Taylor, Darren Lough (Michael McCrudden 77), Matthew Grieve (James Marwood 13), James Tavernier, Mark Doninger, Brad Inman, Jonny Godsmark, Frank Wiafe Danquah, Nile Ranger, Alan Smith (Shane Ferguson 65)

Ónotaðir varamenn: Greg McDermott, Paul Dummett.

(FB)

27.Jan

Manchester City - Newcastle United

Þá er komið að því að mæta milljarðamæringunum í Man City annað kvöld kl 19:45. Craig Bellamy mun enn einu sinni mæta sínum fyrrum félögum en hann var keyptur til City í síðustu viku fyrir rúmar 14 milljónir.

Það er óvíst hvort Shay Given verði í markinu en hann hefur verið orðaður sterklega við City undanfarna daga. Vitað er að hann átti fund með stjórn Newcastle í gær en ekki er vitað hver útkoman var á þeim fundi. Það þykir ýta undir þær sögusagnir að Steve Harper gerði í dag þriggja ára samnig við Newcastle.

Nicky Butt tekur út eins leiks bann vegna rauða spjaldsins sem hann fékk gegn Blackburn. Danny Guthrie er meiddist á æfingu í síðustu viku og er ekki reiknað með að hann taki þátt í leiknum. Það má því reikna með að Joey Barton og Geremi muni byrja inná á miðjunni. Það verður fróðlegt að sjá hvernig verður tekið á móti Barton á sínum fyrri heimavelli, en hann spilaði 153 leiki með City og skoraði 17 mörk.

Það styttist í að Obafemi Martins verði klár og hefur hann sett stefnuna á grannaslaginn næstu helgi. Aðrir leikmenn sem eru frá vegna meiðsla eru: Tamas Kadar, Cacapa, Ameobi, Mark Viduka, Habib Beye, Ignacio Gonzalez og Alan Smith en hann spilar einmitt með varaliðinu í kvöld.

Daninn Peter Lovenkrands er í leikmannahópnum og gæti hann því spilað sinn fyrsta leik fyrir Newcastle. Steven Taylor er orðinn leikfær eftir að hafa spilað æfingaleik í síðustu viku. Jonas Gutierrez er tæpur en hann hefur lítið æft að undaförnu vegna meiðsla aftan í læri. Líklegt byrjunarlið er: Given/Harper, Taylor, Bassong, Coloccini, Enrique, Duff, Geremi, Barton, N´Zogbia, Owen, Carroll.

Chris Houghton í viðtali í dag: "Helsta forgangsatriði okkar er að fá menn til að stækka leikmannahópinn. Ef við náum því þá lítur dæmið mun betur út. Við verðum fá lykilleikmenn okkar til baka og út á völlinn, það mun gleðja okkur mikið. Við þurfum svo tvo góða leikmenn til viðbótar við leikmannahópinn, það á eftir að strykja okkur".

Leikur liðanna á síðasta tímabili endaði 3-1 fyrir City og var það Martins sem gerði mark Newcastle. Fyrri leikur liðanna endaði með 2-2 jafntefli og voru það Ameobi og Dunne (sjm) sem gerðu mörk okkar manna.

Leikmannahópur Newcastle:

Given, Harper, Krul ?, Enrique, Bassong, Coloccini, Taylor, Edgar, N'Zogbia, Duff, Gutierrez, Lovenkrands, Geremi, Owen, Xisco, Carroll, LuaLua, Ranger.

Dómari leiksins verður Michael Jones.

(FB)

27.Jan

Steve Harper skrifar undir nýjan samning

Harper hefur gert nýjan þriggja ára samning við Newcastle og rennur hann út sumarið 2012. Hann kom til Newcastle frá Seaham Red Star árið 1993 og hefur spilað aðeins 111 leiki fyrir Newcastle á þeim 16 árum sem hann hefur verið hjá Newcastle. "Ég er Norht East strákur og Newcastle hefur alltaf verið stór partur af lífi mínu og ég er mjög ánægður að það verður framhald á því. Undir lok samningsins mun ég hafa verið 19 tímabil hérna, þannig að menn sjá hversu mikið þetta félag skiptir mig. Ég er mjög ánægður að þetta sé að baki og nú get ég einbeitt mér að því sem ég hef alltaf gert sem er að æfa af fullum krafti og gera mitt besta í að reyna komast í byrjunarliðið" sagði Harper á heimasíðu Newcastle i dag.

(FB)

27.Jan

Alan Smith spilar í kvöld með varaliðinu

"Smudge" eins og Smith er kallaður mun snúa til baka í kvöld eftir fimm mánaða fjarveru. Hann meiddist á ökkla á undirbúningstímabilinu og hefur ekkert komið við sögu á þessu tímabili. Hann byrjaði að æfa að fullum krafti í síðustu viku og Richard Money þjálfari varaliðsins mun spila honum í kvöld gegn varaliði Man City. Eftirfarandi leikmenn eru í varaliðshópnum í kvöld:

Tim Krul, Max Johnson, James Taylor, Shane Ferguson, James Marwood, James Tavernier, Darren Lough, Paul Dummett, Jonny Godsmark, Mark Doninger, Bard Inman, Frank Wiafe Danquah, Alan Smith, Nile Ranger, Greg McDermott, Michael McCrudden, Matthew Grieve.

(FB)

26.Jan

Albin Ebondo til Newcastle ?

Talið er að Newcastle sé við það að ganga frá kaupum á Frakkanum Albin Ebondo frá Toulouse. Ebondo (24ára) er hægri bakvörður og er sagður kosta um 3,5 milljónir. Newcastle er í vandræðum með stöðu hægri bakvarðar eftir að Habib Beye meiddist illa í leik gegn Wigan um jólin.

Joe Kinnear: "Það verður unnið fram á síðustu stundu í félagsskiptaglugganum til að fá leikmenn til okkar. En þetta er erfiður tími til leikmannakaupa. En ég held að við munum fá til okkar tvo leikmenn og það yrði mikill léttir fyrir okkur. Ég hreifst af Ebondo þegar ég sá Toulouse spila fyrir nokkrum vikum og ég tel að hann verði góður kostur fyrir okkur. Habib Beye er enn á hækjum og verður frá í tvo mánuði í viðbót þannig að okkur vantar klárlega hægri bakvörð".

(FB)

26.Jan

Vera eða fara ?

Talið er að framtíð Shay Given hjá Newcastle muni ráðast næsta sólarhring en hann hefur sífellt verið orðaður við moldríka Man City. Given og lögfræðingur hans Michael Kennedy munu hitta Joe Kinnear og Derek Llambias og ákveða framtíð hans.

Given er talin hafa fengið sig fullsaddann á ástandinu hjá Newcastle eftir 1-5 tapleikinn gegn Liverpool þann 28 desember. City er sagt tilbúið að borga um 10 milljónir punda fyrir Given. En hann er hátt skrifaður í Newcastle og það yrði mikill missir ef hann færi. Hann hefur sýnt það í vetur að hann er besti markmaðurinn í deildinni (alveg hlutlaust mat :) .

Steve Harper er sagður vera skrifa undir þriggja ára samning og þykir það ýta undir að Given sé á förum.

(FB)

26.jan

Colin Calderwood í þjálfarateymi Newcastle

Fyrrum stjóri Nottingham Forest Colin Calderwood hefur verið ráðinn sem þjálfari hjá Newcastle til lok þessa tímabils. Hann var rekinn frá Forest í desember síðastliðnum eftir að hafa starfað þar í tvo og hálft ár. Þessi fyrrum Skoski landsliðsmaður spilaði með Mansfield, Swindon, Tottenham, Aston Villa, Nottingham Forest og Notts County. Hann stýrði svo Northampton Town 2003-06 og Nottingham Forest 2006-08.

(FB)

24.Jan

Saviola til Newcastle ?

Enn og aftur er Javier Saviola orðaður við Newcastle. Hann er sagður óánægður með dvöl sína hjá Real Madrid enda fær hann ekki mörg tækifæri í byrjunarliðinu. Í viðtali á Spáni sagði Saviola: „Juande Ramos sagði mér að finna minna lið ef ég vildi spila reglulega. Staða mín er óþolandi og ég vill fara frá Madrid núna í janúar. Þetta er erfið staða. Maður verður að vera andlega sterkur vegna þess að með hverjum leiknum sem líður án þess að ég fái að spila brýtur mann niður. Framtíð mín er ekki hér hjá Real Madrid. Ég vill ekki vera áfram á Spáni. Ég sé sjálfan mig í ensku úrvalsdeildinni eða á Ítalíu“

Sagt var að Newcastle hafi verið á eftir Saviola síðasta sumar og nú eftir að Argentínumennirnir Coloccini og Gutierrez eru komnir á Tyneside, þá ætti að vera auðveldara fyrir Saviola að aðlagast í Newcastle. Verðmiðinn á Saviola er sagður vera um 6 milljónir punda og það ætti því ekki að vera vandamál. Launakröfur hans gætu hinsvegar verið háar. Sagt er að Newcastle hafi áhuga á þessum kaupum. Þetta gætu verið góð kaup fyrir liðið, þó svo að liðinu vanti fyrst og fremst miðjumenn og varnarmenn núna.

(FB)

24.jan

Hnífjafnt hjá strákunum.

Ungmennalið Newcastle heimsótti í dag strákana í Huddersfeild og endaði leikurinn 1-1. Það var Jonny Godsmark sem hélt uppteknum hætti og skoraði mark Newcastle en hann er búinn að skora í síðustu þremur leikjum hjá varaliði Newcastle. Newcastle komst yfir í leiknum á 22 mínútu og náðu heimamenn að jafna á 68 mínútu með skalla af stuttu færi. Með jafnteflinu fóru Newcastle drengirnir úr fyrsta sæti riðilsins í annað. Newcastle U18 eru í D riðli í deild sem heitir FA Premier Academy League. Strákarnir eru eitthvað að dala núna og hafa gert þrjú jafntefli í röð en fyrir það voru þeir að gera það mjög gott og unnu níu leiki í röð. Vonandi fara þeir að finna sitt fyrra form og raða inn stigum.

Newcastle U18: Johnson, Tavernier, Dummett, Lough, Grieve (Taylor 73), McDermott, Marwood (Williams 54), Bath (Inman 69), McCrudden, Neary, Godsmark.
Ónotaðir varamenn: Spear, Alnwick.

(ÞV)

23.Jan

Peter Lovenkrands skrifar undir

Daninn Peter Lovenkrands skrifaði undir samning í morgun og er hann til enda tímabilsins. Hann kemur frítt frá Schalke og gæti hann spilað sinn fyrsta leik gegn Man City á miðvikudaginn. Hann hefur hann fengið úthlutað númerið 24 hjá Newcastle. "Ég er mjög ánægður að hafa gert samning út þetta tímabil. Nú get ég ekki beðið eftir mínum fyrsta leik. Þetta er frábært tækifæri til að sanna mig og vonandi fæ ég áframhaldandi samning" sagði Lovenkrands.

Joe Kinnear: "Við erum mjög ánægðir að hafa fengið svona leikmann með slíka reynslu. Hann hefur verið hér í næstum tvær vikur og hann hefur heillað mig. Hann aðlagaðist leikmannahópnum strax og hefur haft mikla ánægju að vera hér. Hann er mjög ógnandi fram á við og við vonum að hann muni hjálpa okkur að krækja í stig til að færa okkur upp stigatöfluna".

Þær sögusagnir eru nú í gangi að Hull City sé að ganga frá kaupum á Jimmy Bullard frá Fulham fyrir um 5 milljónir punda. Ég skil ekki af hverju Newcastle sé ekki að reyna krækja í þennan leikmann. Bullard er akkúrat leikmaðurinn sem okkur vantar á miðjuna, hann er betri en allir miðjumennirnir sem eru hjá Newcastle, hann er góður skotmaður, góður í aukaspyrnum og hornspyrnum eitthvað sem hefur verið mjög ábótavant hjá Newcastle.

(FB)

22.Jan

Tamas Kadar frá í 4-6 mánuði

Newcastle hefur staðfest að Tamas Kadar sé fótbrotinn og verði frá keppni í allt að 6 mánuði.

Kadar meiddist í leik með varaliðinu í gær gegn Sunderland sem okkar menn sigruðu 1-2. Richard Money þjálfari varaliðsins: "Þetta er mikið áfall fyrir strákinn og fyrir aðalliðið. Hann hefur verið á bekknum undanfarið og hefur verið partur af hópnum vegna þess að hann hefur verið að spila mjög vel. Þetta er svekkjandi eftir svona frábæran sigur. Við óskum honum alls hins besta og ég veit að hann hefur karakterinn til að koma til baka".

Umfjöllun um leikinn má sjá fyrir neðan stöðuna í deildinni.

(FB)

22.Jan

Frábær sigur hjá varaliðinu gegn Sunderland

Varalið Newcastle lagði erkifjendur sína í Sunderland í gær 1-2. Það voru þeir Nile Ranger og Jonathan Godsmark sem skoruðu mörk Newcastle. Nile Ranger (mynd) kom Newcastle yfir á 20 mínútu með skallamarki og er þetta 19 markið sem hann skorar fyrir félagið . Sunderlands menn náðu að jafna nokkrum mínútum fyrir hálfleik. Newcastle byrjuðu seinni hálfleik mjög vel og komust aftur yfir eftir níu mínútur þegar Jonathan Godsmark kom okkar mönnum aftur yfir á 54 mínútu. Á 77 mínútu var leikmanni Sunderland vísað af velli þegar hann fékk að líta annað gula spjaldið sitt í leiknum. Á síðustu mínútu venjulegs leiktíma bætist en einn leikmaður við meiðslalistann það er hinn 18 ára Tamas Kadar sem er leikmaður unglingalandliðs Ungverja og bráð efnilegur. Talið er að hann verði frá í 4-6 mánuði.

NUFC: Forster; Taylor, Henderson (Dummett 81), Kadar (McDermott 90), Lough; Godsmark, Doninger (Inman 68), Lua Lua, Danquah; Ranger, Donaldson.

Ónotaðir varamenn: Soderberg, Williams

(ÞV)

21.Jan

Grannaslagur hjá varaliðinu í kvöld

Varalið Newcastle og Sunderland mætast í kvöld á Hetton Centre heimavelli varaliðs Sunderland. Richard Money mun stilla upp ungu liði og verða allnokkrir strákar úr U18 ára í hópnum. Lið Sunderland er sem stendur í efsta sæti varaliðsdeildarinnar og verður þetta því erfiður leikur fyrir okkar menn. Richard Money: "Við erum með mikið af heimamönnum í liðinu og þeim hlakkar mikið til að spila þennan leik. Það er alltaf mikið lagt í Tyne - Wear grannaslaginn, sama hvort það sé aðalliðið eða varaliðið. Þannig að þetta ætti að vera góður leikur".

Leikmannahópurinn:

Ryan Donaldson, Mark Doninger, Paul Dummett, Fraser Forster, Jonny Godsmark, Jeff Henderson, Brad Inman, Tamas Kadar, Darren Lough, Kazenga LuaLua, Greg McDermott, Nile Ranger, Ole Soderberg, James Taylor, Frank Wiafe Danquah, Dan Williams

(FB)

21.Jan

Ahmed-Reda Madouni til reynslu hjá Newcastle

Newcastle er að skoða Alsírbúann Ahmed-Reda Madouni sem er 28 ára varnarmaður. Hann er fyrrum leikmaður Montpellier, Dortmund, Leverkusen en hefur verið í Quatar undanfarin tvö ár með Al-Gharafa. Madouni er 1,91 sentimetrar á hæð og á tvo landsleiki að baki með Alsír.

(FB)

21.Jan

Danny Guthrie á sjúkralistann

Enn einn leikmaðurinn bættist á sjúkralistann í gær þegar Danny Guthrie meiddist á æfingu. Guthrie meiddist aftan í læri og verður ekki með gegn Man City í næstu viku að sögn Joe Kinnear. "Við erum að bíða eftir niðurstöðu læknisskoðunar sem hann fór í. Vonandi er þetta ekki eins slæmt og ég hélt í fyrstu. En hann mun örugglega ekki spila gegn Man City" sagði Kinnear. Það eru þó einhverjar jákvæðar frétir af leikmönnum Newcastle. Obafemi Martins er byrjaður að æfa en hann hefur ekki spilað síðan í sigurleiknum gegn Porstmouth þann 14 des síðastliðinn. Kinnear vonast til að hann verði klár í leikinn gegn Sunderland þann 1 feb næstkomandi.

(FB)

21.Jan

Lovenkrands boðin samningur

Dananum Peter Lovenkrands hefur verið boðin samningur út leiktíðina. Honum verður svo hugsanlega boðinn áframhaldandi samningur ef hann stendur sig vel.

Joe Kinnear var ánægður með frammistöðu hans í æfingaleik í gær gegn Carlisle. Í viðtali við The Evening Chronicle sagði Kinnear: "Ég er búinn að koma þessu áfram til Derel Llambias, sem er að tala við umboðsmann Peter. Hann er að útbúa samning fyrir hann út leiktíðina. Mér fannst hann nokkuð góður í gær, hann mun styrkja okkur. Hann er búinn að standa sig vel hjá okkur"

(FB)

21.Jan

Hvað er að gerast í leikmannmálum ?

Nú eru þrjár vikur liðnar af félagsskiptaglugganum og Newcastle hefur ekki enn keypt leikmann og hafa einungis ungir strákar verið fengnir til liðsins, en það hefur samt ekki enn verið staðfest á heimasíðu Newcastle. Það var æfingaleikur í gær gegn Carlisle og það eina sem vitað er að Joey Barton, Geremi, Steven Taylor og Peter Lovenkrads spiluðu í þessum leik sem endaði 1-1. Steven Taylor skoraði mark Newcastle. Lovenkrands var einn af sex leikmönnum sem eru á reynslu sem spiluðu í gær, en ekki er vitað um lánsmennina sem Kinnear talaði um í síðustu viku. Hann talaði um einn Ítala og einn Argentínumann sem myndu koma á láni til liðsins en ekki hefur heyrst meira um það mál.

Enn einn ungur leikmaður er sagður vera á reynslu hjá liðinu, Jukka Raitala vinstri bakvörður frá HJK Helsinki í Finnlandi er til skoðunar hjá Newcastle og eru fleiri lið sögð á höttunum eftir honum.

The Newcastle Journal greinir frá því að Ungverjinn Andras Gosztonyi, Norðmennirnir Even Hovland og Per Egil Flo, Finninn Jukka Raitala hafi spilað umræddan æfingaleik ásamt einum ónefndum miðjumanni frá Svíþjóð. Nú eru aðeins 12 dagar eftir af félagsskiptaglugganum og eru stuðningsmenn Newcaste orðnir óþreyjufullir og vilja fá leikmenn til að styrkja leikmannahópinn.

(FB)

19.Jan

U18 ára liðið skaust á toppinn

Ungennalið Newcastle mætti strákunum frá Nottingham Forest í gær og gerðu liðin 1-1 jafntefli á heimavelli Newcastle í Benton. Þar með skaust Newcastle upp fyrir grannana í Sunderland í toppsæti deildarinnar á markamun. Sunderland á tvo leiki til góða á Newcastle. Það var James Marwood sem kom Newcastle yfir snemma í seinni hálfleik en Forest jafnaði stuttu síðar. Nile Ranger var nálægt því að tryggja Newcastle öll stigin en hann átti skalla á lokamínútu leiksins en varnarmaður Forest bjargaði á marklínunni.

NUFC: Soderberg, Leadbitter, Dummett, McDermott, Grieve, Taylor, Marwood ( Ranger 63), Danquah, Zamblera ( Inman 20), Williams ( Donaldson 65), McCrudden.

Ónotaðir varamenn: Henderson, Neary.

(FB)

19.Jan

Ole Soderberg kallaður í U19 ára lið Svía

Hinn ungi markmaður Ole Soderberg hefur verið kallaður í landsliðshóp Svía sem tekur þátt í La Manga æfingamótinu á Spáni. Þar eiga þeir leiki gegn Norðmönnum, Pólverjum og Portúgölum. Soderberg sem er 18 ára kom til Newcastle frá Sænska liðinu Hacken í Janúar í fyrra og hefur staðið sig vel með vara og ungmennaliði Newcastle undanfarna 12 mánuði.

(FB)

18.Jan

Fjórir ungir til reynslu hjá Newcastle

Enn koma fréttir af ungum

og efnilegum strákum sem eru undir smásjánni hjá Newcastle. Joe Kinnear greinir frá því að það séu fjórir ungir til reynslu í viðbót við þá tvo sem Newcastle á að hafa samið við (Haris Vuckic og Caio Ferreira). Í þetta sinn eru það tveir Norðmenn, einn Svíi og einn Ungverji sem er verið að skoða. Ungverjinn Andras Gosztonyi (mynd) er 18 ára miðjumaður frá Ungverska liðinu MTK Budapest og verður í eina viku til reynslu. Skandinavarnir þrír eru allir U21árs landsliðsmenn og koma með meðmæli frá Norska umboðsmanninum Rune Hauge og eru þeir ætlaðir sem framtíðarleikmenn.

Kinnear segir í viðtali við The Sun að hann muni taka ákvörðun um þrjá aðra leikmenn í æfingaleik sem hefur verið settur á næsta þriðjudag.

"Ungu strákarnir munu spila, þeir eru allir í ungmennaladsliðum í sínu landi. Einn er miðvörður, einn er vinstri bakvörður og einn er miðjumaður. Við munum skoða þá en ég er ekki að hugsa um þá í aðalliðið".

Peter Lovenkrands, tveir lánsmenn sem Kinnear minntist á í síðustu viku og svo Skandinavarnir munu spila á þriðjudag og vonandi verður Kinnear með einhverjar fréttir eftir leikinn.

(FB)

17.Jan

Blackburn - Newcastle 3-0

(McCarthy 61 vsp, Roberts 66, 86)

Hræðilegur seinni hálfleikur

Big Sam brosir sínu breiðasta í dag eftir að hafa sigrað liðið sem hann var rekinn frá.

Það var eins og það kæmi allt annað lið inná í seinni hálfleik í dag því að í fyrri hálfleik voru okkar menn mun betri og fengu heimamenn ekki færi í fyrri hálfleik. Andy Carroll átti skalla að marki sem var bjargað á línu og Nicky Butt átti ágætis færi. Varnarleikur Newcastle var bara nokkuð góður. En í seinni hálfleikur var algjör hörmung. Blackburn skorar þrjú mörk, Nicky Butt lætur reka sig útaf og Joey Barton húðskammar Jose Enrique eftir þriðja mark heimamanna. Já Joey Barton er kominn aftur og það fór ekki framhjá neinum. Vítaspyrnudómurinn var algjör gjöf frá ömurlega lélegum dómara leiksins Rob Styles og er hann greinilega ekki besti vinur okkar Newcastle manna. Það var einmitt hann sem rak Habib Beye útaf fyrr í vetur gegn Man City sem var svo síðar tekið til baka.

Enn einu sinni kemur það berlega í ljós hvað miðjan er hræðilega slök hjá okkur. Það eina jákvæða sem hægt er að taka úr þessum leik er að Nicky Butt verður í banni vonandi í næstu þremur leikjum. Ég gjörsamlega skil ekki hvað menn sjá við þennan leikmann. Danny Guthrie er svo sem ágætur leikmaður en hann er bara efni í góðan miðjumann. Að mínu mati þarf algjöra úthreinsun á þessu liði, en þetta er kannski ekki rétti tíminn til að gera það nú í janúar. Ef við höldum okkur í deildinni þá ætla ég að Kinnear (sem verður væntanlega stjóri næsta tímabil) hreinsi út í sumar. Þeir leikmenn sem ég vil halda eru: Bassong, Jonas, Coloccini, Beye, Taylor, Martins,Carroll, Given, Guthrie. Svo má alveg halda í ungu strákana eins og LuaLua, Kadar, Krul ofl.

Restina má losa sig við mín vegna: Cacapa, Viduka, Butt, Ameobi, Enrique, Duff, N´Zogbia (alltaf vælandi um að hann vilji fara), Edgar, Owen (hefur greinlega ekki áhuga á að vera þarna áfram), Smith, Xisco, Geremi. Það skal tekið fram að þegar þetta er ritað er undirritaður ekki alveg í andlegu jafnvægi.

Næsti leikur er gegn milljarðaliðinu Manchester City og hver veit nema það verði fyrsti leikur Kaka hjá City.

Svo kemur leikur ársins í Newcastle gegn erkifjendunum í Sunderland sem verður að vinnast. Við töpuðum fyrir þeim í fyrri leiknum á Stadium of Shit og það væri hræðilegt að tapa báðum leikjunum gegn þeim.

Lið Newcastle í dag: Given, Edgar, Bassong, Coloccini, Enrique, Duff (Jonas 79), Guthrie, Butt, N´Zogbia (Barton 74), Carroll, Owen.

Ónotaðir varamenn: Harper, Xisco, Taylor, Kadar, LuaLua.

Gul spjöld: Butt, Barton, Edgar.

Rautt spjald: Butt.

Skot (á mark): Bla 9 (4 ) - Nufc 10 (3)

Hornspyrnur: Bla 2 - Nufc 5

Áhorfendur: 25,583

Maður leiksins: Shay Given.

(FB)

17.Jan

Ungur og efnilegur Slóveni til Newcastle

Samkvæmt fréttum á Sky Sports þá hefur Newcastle gert þriggja og hálfs árs samning við ungan og bráðefnilegan Slóvena Haris Vuckic að nafni frá NK Domzale sem eru núverandi meistarar þar í landi. Vuckic er 17 ára gamall og er miðjumaður. Hann er um 188 á hæð og 80 kg. Hann er talinn með efnilegri leikmönnum í Evrópu og sýndi ítalska stórliðið AC Milan honum mikinn áhuga og var til reynslu hjá Ítalska stórliðinu fyrir stuttu. Þetta þykir ýta undir þá stefnu Newcastle að njósna og krækja í unga og efnilega leikmenn.

(FB)

16.Jan

Blackburn Rovers - Newcastle United

Þá er komið að því að heimsækja Big Sam og félaga í Blackburn á Eawood Park á morgun laugardag.

Big Sam fyrrum stjóri Newcastle segir að það væri mjög gaman að vinna fyrrverandi lið sitt. "Ég er eins og allir aðrir, þegar maður spilar við fyrrverandi liðið sitt hvort sem leikmaður eða þjálfari þá vill maður vinna þá" sagði Big Sam.

Steven Taylor og Andy Carroll ættu að vera klárir í leikinn en þeir voru báðir á bekknum gegn Hull í vikunni. Carroll kom inná og spilaði síðustu 15 mínúturnar gegn Hull en Taylor var allan tímann á bekknum. Joey Barton var með á æfingu í dag og ætti því að vera stutt í að hann verði klár í slaginn(sjá mynd). Alan Smith mætti á æfingasvæðið og skokkaði með og tók léttar æfingar.

Það er eitthvað lengra í alla hina sem eru meiddir (Beye, Martins, Enrique, Ameobi, Gonzalez, Viduka)

Það má reikna með að byrjunarliðið verði eins og það var gegn West Ham um síðustu helgi fyrir utan að Butt kemur inn á miðjuna fyrir Geremi sem virðist vera á förum frá Newcastle. Joe Kinnear í viðtali fyrir leik: "Næstu fjórir leikir eru gegn liðum sem eru fyrir neðan okkur svo þetta er gott tækifæri til að auka bilið. Þetta er búið að vera strembið undafarið en við verðum að leggja hart að okkur og ná hagstæðum úrslitum".

Steven Taylor mun spila sinn 100 leik fyrir Newcastle í úrvalsdeildinni ef hann kemur við sögu.

Michael Owen hefur skorað níu mörk gegn Blackburn í deildinni, sjö fyrir Liverpool og tvö fyrir Newcastle.

Fyrri leikur liðanna í vetur endaði með 1-2 sigri Blackburn og var það Owen sem skoraði mark Newcastle úr vítaspyrnu. Leikur liðanna á síðasta tímabili á Eawood Park endaði 3-1 fyrir heimamönnum og var það Martins sem skoraði mark Newcastle.

Leikmannahópur Newcastle:

Given, Harper, Bassong, Coloccini, Taylor, Edgar, Kadar, Butt, Guthrie, N'Zogbia, Duff, Gutierrez, Donaldson, Godsmark, Owen, Xisco, Carroll, LuaLua, Ranger.

Dómari leiksins verður Steve fokking Bennet. (smá einkahúmor

(FB)

16.Jan

Joe Kinnear íhugar samningstilboð frá Mike Ashley

Mike Ashley eigandi Newcastle hefur boðið Joe Kinnear nýjan og betri samning. Kinnear sagði við Sky Sports í dag: "Ég er bara að íhuga hlutina þessa stundina. Mér hefur verið boðin mjög góður samningur. Mike og stjórnarformaðurinn ræddu við mig um framtíð félagsins og að styrkja liðið í sumar. En ég sagði þeim að fyrsta mál á dagskrá væri að styrkja stöðu okkar í deildinni og koma okkur úr fallbaráttunni sem við erum í. Það þarf að einbeita sér að því núna. Það sem ég lagði til var að við myndum ræða málin í sumar og ákveða hvaða stefnu við ætlum að taka með liðið. Það þarf líka að endurfjármagna liðið. Losa mig við leikmenn og ná í leikmenn sem ég vill. Ég mun einnig ræða við fjölskylduna mína um þetta og að flytja hingað til frambúðar"

(FB)

16.Jan

5 Milljón punda tilboð í Stephane Mbia

Joe Kinnear hefur staðfest að Newcastle hefur gert 5 milljón punda tilboð í Stephane Mbia sem leikur með Rennes í Frakklandi. Mbia er 22 ára miðjumaður og kemur frá Kamerún. En Everton er einnig sagt hafa áhuga á honum og nú er bara að bíða og sjá hvað verður úr þessu. Newcastle er einnig sagt vera á eftir Bafetimbi Gomis 23 ára sóknarmanni St Etienne í Frakklandi. Kinnear sagði í dag: "Við erum enn að reyna krækja í þá báða og reynum eins og við getum. Okkur sárvantar leikmenn".

Peter Lovenkrands mun fá æfingaleik fyrir luktum dyrum í byrjun næstu viku og Kinnear vonast til að semja við hann strax í kjölfarið.

(FB)

16.Jan

Kinnear staðfestir að Geremi sé á förum

Kamerúninn Geremi (30 ára) er að öllum líkindum á förum til Tyrkneska liðisns Besiktas fyrir 1,5 - 2 milljónir punda. Geremi kom til Newcastle frá Chelsea á frjálsri sölu í júlí 2006. Hann hefur spilað 13 leiki í vetur með Newcastle og vill komast frá félaginu. "Hann er að tala við Besiktas" staðfesti Kinnear. "Hann er að tala við okkur á sama tíma, en ég held að hann sé að reyna að ná einhverjum samning þar. Á miðvikudagskvöld héldum við að gengið yrði frá samningi en það hefur dregist aðeins og núna bíðum við eftir að sjá hvað gerist".

(FB)

15.Jan

Yfirlýsing frá Newcastle

Newcastle sendi frá sér yfirlýsingu fyrir stuttu (kl 20.00) varðandi kaup á Lucas Neill varnarmanni West Ham en hann hefur verið orðaður við Newcastle í dag. Yfirlýsingin er svona:

"Í leit okkar að styrkja leikmannahópinn hefur félagið verið að skoða allmarga leikmenn nú í félagskiptaglugganum. Varðandi Lucas Neill, þá hefur West Ham United komið þeirri skoðun á framfæri að hann er leikmaður sem þeir meta mikið og mikilvægur hluti af þeira leikmannahópi og eru því ekki á því að fara selja hann. Newcastle United virðir stöðu þeirra og munu því ekki aðhafast neitt frekar í málinu".

(FB)

15.Jan

Ungur Brassi til Newcastle

Það gengur mikið á nú í janúar á leikmanna-markaðnum og samkvæmt fréttum í dag hefur Newcastle samið við 18 ára Brasilískann sóknarmann Caio Ferreira að nafni (sjá mynd). Hann er með Ítalskt vegabréf og þarf því ekki atvinnuleyfi, kaupverð er ekki uppgefið. Ferreira hafði komið til Englands fyrr í þessum mánuði og æfði með nokkrum liðum þar á meðal WBA og var honum boðin samningur þar. En njósnarar Newcastle höfðu fylgst með honum og var honum snögglega boðin samningur hjá Newcastle.

Það skal tekið fram að þetta er ekki staðfest á heimasíðu Newcastle.

(FB)

15.Jan

Newcastle - Hull 0-1

(Cousin 81)

Ekki fáum við Guðjón Þórðarson á St James´ Park

Það fór ekki þannig að Guðjón Þórðarson myndi mæta á St James´ Park með lið sit Crewe Alexandra í fjórðu umferð bikarsins. Bæði lið töpuðu sínum leikjum á heimavelli og verða það því Hull sem tekur á móti Mllwall í bikarnum um aðra helgi.

Leikurinn í gær hefði með réttu átt að enda með sigri okkar manna en þegar menn nýta ekki færin sem gefast þá er þeim refsað eins og kom berlega í ljós í gær. Newcastle hafði átt nokkur góð færi til að skora áður en Hull skoraði eina mark leiksins nokkrum mínútum fyrir leikslok í gær. Newcastle fékk tvö ágætisfæri til að jafna en allt kom fyrir ekki og tap í annað sinn á heimavelli gegn Hull staðreynd. Til að toppa þessi ömurlegu úrslit þá var Joe Kinnear rekinn upp í stúku ásamt Phil Brown stjóra Hull fyrir að rífast á hliðarlínunni.

"Geysileg vonbrigði en ég get ekki gagnrýnt leikmennina mína. Við hefðum átt að vinna með fjórum mörkum. Þeir áttu eitt gott færi og nýttu það. Við erum því úr leik í bikarnum, ég er óánægður en ekki ósáttur við leik okkar manna. Phil Brown og ég skiptumst á orðum, hann kom þessu af stað og ég svaraði honum. Við verðum svo að sjá til hvað dómarinn setur í sína skýrslu" sagði Kinnear að leik loknum.

NUFC:Given, Edgar, Bassong, Coloccini, N'Zogbia, Gutierrez (LuaLua 82), Butt, Guthrie, Duff, Owen, Xisco (Carroll 76).
Ónotaðir varamenn: Harper, Taylor, Kadar, Donaldson, Ranger.

Gult spjald: Coloccini

Skot á mark. Nufc 12(3) - Hull 5(4)

Hornspyrnur: Nufc 7 - Hull 3

Áhorfendur: 31,380

Maður leiksins: Shay Given (samkvæmt einkunnargjöf Sky Sports) Ég sá ekki leikinn frekar en aðrir, ég reyndi mikið að finna hann á netinu en án árangurs :(

(FB)

15.Jan

1-3 sigur í London

Ungmennalið Newcastle sigraði QPR örugglega í fjórðu umferð bikarsins í kvöld. Newcastle komst í 0-3 með mörkum frá James Henderson (mynd), James Taylor og Michael McCrudden. QPR minnkaði svo muninn í lokin en það kom of seint og ungu strákarnir eru því komnir áfram og mæta Portsmouth í næstu umferð á Fratton Park.

NUFC: Max Johnson, James Tavernier, Paul Dummett, Brad Inman, Jeff Henderson, James Taylor, Conor Newton (Dan Williams, 57m) Ryan Donaldson (c), Nile Ranger, Michael McCrudden, Shane Ferguson (Stephen Folan, 83m)
Ónotaðir varamenn: Dan Leadbitter, Jak Alnwick, Greg McDermott

(FB)

15.Jan

U18 liðið spilar í kvöld gegn QPR á Loftus Road

Richard Money fer með strákana til London í kvöld og þar mæta þeir unglingaliði QPR í fjórðu umferð Youth Cup. Kazenga LuaLua má ekki spila með þar sem hann kom inná sem varamaður í gær með aðalliðinu gegn Hull. Nile Ranger og Ryan Donaldson voru á bekknum í gær en komu ekki inná og mega því spila með U18 ára liðinu í kvöld. Sigurvegararnir úr leiknum í kvöld mæta Portsmouth í næstu umferð. Leikurinn hefst kl 19:00 og verður hægt að fylgjast með gangi leiksins á heimasíðu Newcastle. Leikmannahópurinn sem fer til London er svona:

Jak Alnwick, Max Johnson, Matthew Grieve, Dan Leadbitter, James Tavernier, James Taylor, Jeff Henderson, Paul Dummett, Conor Newton, Ryan Donaldson, Brad Inman, Shane Ferguson, Michael McCrudden, Nile Ranger, Dan Williams, Greg McDermott, Stephen Folan, Dan Neary

(FB

13.Jan

Newcastle - Hull

Eftir að hafa gert 0-0 jafntefli í KC Stadium þurfa liðin að mætast aftur og nú á St James´ Park.

Leikurinn fer fram annað kvöld kl 19:45 og er ekki í beinni hér á landi. Vil ég því benda mönnum á síður á netinu þar sem hægt er að horfa á leiki í beinni. Þær bestu sem ég veit um eru myp2p.eu og adthe.net.

Joe Kinnear hefur ekki úr stórum leikmannahóp að velja og enn bætist við fræga meiðslalistann hjá Newcastle. Geremi verður ekki með vegna bakmeiðsla og eru þá 12 leikmenn meiddir. Nicky Butt kemur aftur inn í liðið eftir að hafa tekið út eins leiks bann. Jonas Gutierrez þarf aðeins eitt gult spjald í viðbót og þá er hann kominn í leikbann. Það má reikna með að spánverjinn Xisco fái sjaldséð tækifæri í byrjunarliðinu á morgun og vonandi að hann muni nýta það. Xisco hefur ekki spilað síðan hann kom inná sem varamaður í leik gegn WBA í október og spilaði síðustu 13 mínúturnar.

Byrjunarliðið verður nær örugglega svona (nema einhver stígi detti í sturtunni kvöld og meiðist)
Given, Edgar, Bassong, Coloccini, N´Zogbia, Jonas, Guthrie, Butt, Duff, Owen, Xisco.

Aðrir leikmenn sem Kinnear hefur úr að velja koma úr vara og unglingaliðinu fyrir utan Steve Harper markmann. Leikmannahópur Newcastle:

Gráletraðir eru unglinga og varaliðsmenn, rauðletraðir eru meiddir eða í láni.

Markmenn:
Given, Harper
Forster, Soderberg
Krul (í láni)
Varnarmenn:
Coloccini, Bassong, Edgar
Kadar, Lough, Tozer, Morris
Beye, Cacapa, Jose Enrique, Taylor (meiddir)
Miðjumenn:
Butt, Duff, Guthrie, N'Zogbia, Gutierrez
Donaldson, Doninger, Marwood, Godsmark
Barton, Gonzalez, Geremi (meiddir)
Sóknarmenn:
Owen, Xisco
LuaLua, Danquah, Ranger, Zamblera
Ameobi, Carroll, Martins, Smith, Viduka, Baheng (meiddir)
(FB)

13.Jan

Þrír leikmenn inn fyrir vikulok ?

Joe Kinnear segir í viðtali á Sky Sports að Newcastle hefur samþykkt að fá tvo dýra lánsmenn til enda tímabilsins. Svo má reikna með að það verði samið við Peter Lovenkrands sem er á reynslu.

"Þetta eru landsliðsmenn. Einn er Ítali og hinn er Argentínumaður. Staðreyndin er sú að þeir eru ekki fastamenn í liðum sínum. Þetta eru reyndir leikmenn, eitthvað sem okkur vantar þessa stundina. Við höfum fengir jákvæða strauma frá umboðsmönnum þeirra um að þeir vilji koma hingað. En þeir eru dýrir og við þurfum bara að leysa peningahliðina á þessu" sagði Kinnear.

Þegar hann var spurður um hvort fleiri leikmenn væru í sigtinu á komandi vikum sagði hann: "Það er möguleiki vegna þeirra meiðslavandræða sem við erum í og ég held að það sé brýn þörf á því. Ég er búinn að útskýra það fyrir eigandanum og stjórnarformanninum, ég er með krosslagða fingur og vona bara innilega að svarið verði já"

(FB)

13.Jan

Kinnear ánægður með Lovenkrands

Joe Kinnear segir að Peter Lovenkrands hefur staðið sig vel tvo fyrstu dagana sem hann er á reynslu með Newcastle. Hann keypti sjálfur upp samning sinn við Schalke og verður út þessa viku hjá Newcastle til reynslu og mun því ekki kosta neitt ef Kinnear ákveður að semja við kappann.

"Hann er með mikla reynslu og skorar mikið af mörkum. Samningur hans yrði til enda tímabilsins til að hjálpa okkur í þessum meiðslavandræðum sem eru að hrjá okkur þessa stundina. Ég gerði mína heimavinnu og hef verið í sambandi við umboðsmann hans. Þegar ég frétti að hann hafi

keypt upp samning sinn þá hafði ég strax samband" sagði Kinnear í dag.

(FB)

13.Jan

Enn lengist meiðslalistinn

Þrír leikmenn bættust við á meiðslalista Newcastle í dag og verða ekki með gegn Hull annað kvöld. Andy Carroll, Jose Enrique og Steven Taylor eiga allir við smávægileg meiðsli að stríða. Joe Kinnear vonast hinsvegar til þess að Taylor og Carrol verði búnir að jafna sig fyrir leikinn gegn Blackburn næsta laugardag. "Steven er meiddur á kálfa og hefur verið í meðferð þessa viku. Við ákváðum að spara hann fyrir leikinn gegn Blackburn. Andy meiddist lítillega aftan í læri og það hefði verið hættulegt fyrir hann að spila. Ég hefði viljað sjá hann spila aftur eftir góða frammistöðu um síðustu helgi, en læknarnir töldu það ekki ráðlegt að láta hann spila. Vonandi verður hann klár í leikinn gegn Blackburn" sagði Kinnear.

Þeir leikmenn sem eru því frá vegna meiðsla eru: Cacapa, Ameobi, Viduka, Beye. Martins, Barton, Gonzalez, Smith, Enrique, Carroll og Taylor.

Þá eru alls 11 leikmenn á þessum blessaða meiðslalista og eins og ég hef sagt áður að þá er þetta ekki eðlilegt hvað margir leikmenn meiðast hjá Newcastle ár eftir ár og kannski eðlilegt að liðinu gengur svona illa þegar að það þarf sífellt að vera breyta liðinu vegna meiðsla og þessir leikmenn eru endalaust að reyna koma sér í form. Þeir vita það sem hafa spilað fótbolta að það tekur sinn tíma að komast í leikform eftir að hafa verið frá í einhverjar vikur eða hvað þá í nokkra mánuði !.

(FB)

12.Jan

Peter Lovenkrands til reynslu hjá Nufc

Daninn Peter Lovenkrands (28 ára) er til reynslu hjá Newcastle eftir að hafa verið losaður undan samningi hjá þýska liðinu Schalke 04. Þetta staðfesti Chris Houghton í dag á heimasíðu Newcastle. "Hann er án samnings og við ætlum að skoða hann. Hann er með mikla reynslu og er nokkuð fljótur. Það kemur svo í ljós hvort við semjum við hann eða ekki. Hann getur spilað á kantinum eða á miðjunni. Við erum svo að vinna í því að fá til okkar tvo til þrjá leikmenn í viðbót" sagði Houghton.

Lovenkrands byrjaði atvinnumannaferilinn hjá AB í Danmörku árið 1998 og spilaði þar 32 leiki og skoraði 7 mörk. Rangers keypti hann svo árið 2000 og var hann hjá skoska liðinu í 6 ár, hann spilaði 182 leiki þar og skoraði 54 mörk. Leið hans lá svo til Schalke 04 og spilaði hann 56 leiki með þeim og gerði 8 mörk. Lovenkrands á að baki 21 landsleik með Dönum og hefur skorað eitt mark. Hér má sjá myndbrot með honum á Youtube og ef hann sýnir svona hæfileika með Newcastle þá er meira en velkominn í Newcastle.

(FB)

11.Jan

Houghton óttast brottför leikmanna

Aðstoðarstjórinn Chris Houghton viðurkennir að Newcastle hefur ekki efni á að missa sína bestu leikmenn í þeirri baráttu sem er framundan í vetur. Charles N´Zogbia og Shay Given hafa eru sagðir hugsanlega á förum frá Newcastle nú í janúar. "Við vonumst til að halda okkar bestu leikmönnum. Auðvitað miðað við það sem gengur á og hefur gengið á í nokkurn tíma getur verið fráhrindandi en þetta er bara eitthvað sem við verðum að þola og við erum ekki eina liðið í þessari stöðu". sagði Houghton í viðtali á Sky Sports í dag.

(FB)

10.Jan

Newcastle - West Ham 2-2

(Owen 19, Carroll 78) - (Bellamy 29, Cole 55)

Heimamaðurinn Andy Carroll til bjargar

Andy Carroll kom í veg fyrir þriðja tapleikinn í röð í deildinni í dag gegn West Ham þegar hann jafnaði um 12 mínútum fyrir leikslok. Þetta var í fyrsta sinn sem hann er í byrjunarliði Newcastle á St James´ Park og hefur hann nú átt tvo góða leiki í röð en hann þótti spila mjög vel í bikarleiknum gegn Hull um síðustu helgi. Michael Owen kom Newcastle yfir á 19 mínútu með góðu skoti rétt fyrir utan teig en skömmu áður átti hann skot í stöng. Fyrrum Newcastle maðurinn Craig Bellamy jafnaði leikinn á 29 mínútu eftir frábæra sendingu frá Scott Parker. Shay Given átti góðan leik eins og venjulega og bjargaði hann á glæsilegan hátt strax í byrjun seinni hálfleiks frá Carlton Cole. En hann náði ekki að koma í veg fyrir að gestirnir komust yfir á 55 mínútu en þá kláraði Cole færið sitt mjög vel. Staðan orðin 1-2 og þetta leit ekki vel út fyrir okkar menn, liðið búið að spila illa í seinni hálfleik og staðan alls ekki ósanngjörn. West Ham hefði hugsanlega átt að fá vítaspyrnu í seinni hálfleik en fengu ekki. Síðustu mínútur leiksins voru hinsvegar eign heimamanna og kom það í hlut heimamannsins Andy Carroll að jafna leikinn. Jonas og Duff spiluðu þá vel saman á vinstri kantinum og Duff sendi góða sendingu inn á teiginn og þar var Carroll á rétttum stað og skallaði glæsilega í markið hjá Robert Green. Stuttu áður hafði Alan Wiley dómari leiksins dæmt mark af Newcastle og taldi hann að Steven Taylor hafði brotið á varnarmanni West Ham áður en Lucas Neill sendi boltann í eigið mark. Newcastle pressaði nokkuð stíft á mark West Ham í lokin eins og áður sagði. Matthew Upson bjargaði stiginu fyrir gestina þegar hann stöðvaði skot frá Jonas á lokamínútu leiksins, í kjölfarið fékk Newcastle hornspyrnu og átti Owen skalla framhjá markinu. Jafntefli niðurstaðan sem eru kannski sanngjörn úrslit miðað við færi leiksins en það hefði verið gaman að taka öll stigin.

Þrátt fyrir að fá eitt stig í dag fór liðið upp í 11 sæti deildarinnar en það eru aðeins þrjú stig í fallsæti.

Chris Houghton eftir leikinn: "Andy hefur átt góða innkomu í síðustu tveimur leikjum og ég er ánægður að hann skyldi skora. Maður vill alltaf fá þrjú stig á heimavelli en þegar við vorum 1-2 undir voru þeir alltaf hættulegir fram á við. Í þeirri stöðu er ásættanlegt að gera jafntefli".

NUFC:Given, Taylor, Coloccini, Bassong, Jose Enrique, Gutierrez, Guthrie, Geremi (N'Zogbia 62), Duff, Owen, Carroll.
Subs Not Used: Harper, Xisco, Kadar, Edgar, LuaLua, Donaldson.

Skot á mark: Nufc 21(12) - WH 12(11)

Hornspyrnur: Nufc 8 - WH 3

Gult spjald: Guthrie

Maður leiksins: Andy Carroll (frábært jöfnunarmark og vonandi fær hann áfram tækifæri í liðinu í næstu leikjum)

(FB)

9.Jan

Newcastle United - West Ham United

Joe Kinnear og lærisvænar hans eiga erfiðan leik fyrir höndum á morgun gegn West Ham sem hefur gengið ágætlega í undanförnum leikjum. Scott Parker og Craig Bellamy fyrrum leikmenn Newcastle munu að öllum líkindum byrja inná á sínum gamla heimavelli en Kireon Dyer er í leikmannahópnum og gæti því komið inná, en hann er nýbyrjaður að spila aftur eftir slæmt fótbrot sem hann hlaut á síðasta tímabili. En Lee Bowyer mun ekki vera með þar sem hann hefur verið lánaður til Birmingham.

Af okkar leikmönnum er það að frétta að Danny Guthrie og Charles N´Zogbia stóðust læknisskoðun í dag og verða með. Nicky Butt tekur út eins leiks bann vegna fimm gulra spjalda. Aðrir leikmenn sem eru frá vegna meiðsla eru: Mark Viduka, Joey Barton, Alan Smith, Ignacio Gonzalez, Oba Martins, Habib Beye, Cacapa og Shola Ameobi.

Andy Carroll mun sennilega byrja inná enda þótti hann standa sig afbragðsvel í leiknum gegn Hull í bikarnum. Hann mun skarta nýrri hárgreiðslu (sjá mynd) sem hann frumsýndi á æfingu í dag. Leikmenn Newcastle æfðu inni í dag vegna þess að æfingasvæði þeirra var frosið. Fyrri leikur liðanna endaði með 3-1 sigri West Ham og var það fyrsti leikur þeirra undir stjórn Gianfranco Zola. Leikur liðanna á SJP á síðasta tímabili endaði 3-1 fyrir okkar mönnum og voru það Mark Viduka (2 mörk) og N´Zogbia sem gerðu mörkin.

Chris Houghton: "Joe Kinnear er reyndur þjálfari, og reyndir þjálfarar ganga í gegnum góða og slæma tíma. Og það er núna sem kemur í ljós hvernig þeir bregðast við á slæmum tímum. Markmið Joe er núna er að koma liðinu frá þeirri stöðu sem liðið er í, og í þægilegri stöðu í deildinni".

Líklegt byrjunarlið gegn West Ham:

Given
Taylor Colccini Bassong Enrique
Gutierrez Guthrie Geremi Duff
Carroll Owen (c)

Leikmannahópurinn er svona:

Given, Harper, Enrique, Bassong, Coloccini, Taylor, Edgar, Kadar, Guthrie, N'Zogbia, Duff, Gutierrez, Geremi, Donaldson, Owen, Carroll, Xisco, LuaLua, Ranger.

Dómari leiksins verður Alan Wiley.

(FB)

9.Jan

U18 liðið gegn Man City eða Portsmouth í bikarnum ?

Fari svo að U18 ára liðið vinni QPR í bikarleik liðanna á fimmtudag í næstu viku munu þeir mæta annaðhvort Man City eða Portsmouth á útivelli í næstu umferð.

Þá hefur leikur þeirra gegn N.Forest í deildinni verið færður til sunnudagsins 18 janúar vegna bikarleiksins gegn QPR.

(FB)

8.Jan

Janúarglugginn

Það er mikið af fréttum um leikmenn sem eru að koma og fara frá Newcastle og hér eru þau helstu nöfn sem eru nefnd í fréttum.

INN:

Barry Ferguson miðjumaður Rangers,

Gael Givet varnarmaður Marseille,

Nedum Onuoha varnarmaður Man City,

Jose Manuel Flores Moreno varnarmaður Almeria, Artur Boruc markmaður Rangers, Pedro Mendes miðjumaður Rangers,

Ariza Makukula sóknarmaður Benfica,

Nicolas Burdisso varnarmaður Iner Milan,

Leroy Lita sóknarmaður Reading,

Michael Mancienne varnarmaður Chelsea (lán), Kyle Naughton vinstri bakvörður Sheff Utd,

Stephen Quinn miðjumaður Sheff Utd,

Madjid Bougherra varnarmaður Rangers,

Vasilis Torosidis varnarmaður Olympyakos,

Mido sóknarmaður Middlesbrough (í skiptum fyrir Alan Smith),

Allan McGregor markmaður Rangers,

Stephen Warnock og Christopher Samba varnarmenn Blackburn,

Richard Dunne varnarmaður Man City.

ÚT:

Alan Smith í skiptum fyrir Mido hjá Middlesborogh, Charles N´Zogbia til Tottenham, Arsenal eða Paris SG,

Shay Given til Man City eða Arsenal,

Jose Enrique til spánar,

Michael Owen til Juventus eða Man City,

Joey Barton til Portsmouth,

Geremi til Besiktas,

Xisco til spánar, Nicky Butt til Wigan,

Cacapa til frakklands.

(FB)

7.Jan

Umboðsmaður Obafemi Martins gefur sjúkrateymi Newcastle ekki háa einkunn

Martins hefur ekki spilað síðan í leiknum gegn Portsmouth 14 desember en þá haltraði hann af velli og hélt um nárann. Sjúkrateymið virðist ekki hafa greint kviðslit sem hefur hrjáð hann

Hann gæti þurft á aðgerð að halda ef skoðun á morgun leiðir slíkt í ljós og yrði þá frá í nokkrar vikur í viðbót.

Dapo Kujore umboðsmaður Martins segir að hann ætti að vera byrjaður að spila fyrir nokkru síðan ef þeir hefðu greint vandmálið rétt í byrjun. "Sjúkrateymið þarna er hræðilegt, Oba hefur haft þetta vandamál af og til en þeir hafa ekki fundið þetta út. Það var bara vegna þess að hann fór til Ítalíu fékk greiningu þar og hann mun fara í aðgerð í vikunni. Sjáðu bara liði, Mark Viduka, Alan Smith og Nicky Butt eru allir meiddir ásamt mörgum öðrum leikmönnum. Jafnvel þegar Alan Shearer var að spila, hversu oft lenti hann á sjúkralistanum ?" sagði Kujore.

Það er eins og við vitum eitthvað að einhversstaðar í þessu ferli, staðreyndin er að Newcastle eru yfirleitt alltaf með fleiri menn meidda en önnur úrvalsdeildarlið. Og það hjálpar ekki hvað leikmannahópurinn er lítill. Þetta er eitthvað sem félagið ætti að skoða og það höfum við vitað í mörg ár. Stjórar undanfarinna ára hafa átt við þetta vandamál að stríða hjá Newcastle og Joe Kinnear er að kynnast þessu núna. Það hlýtur að vera einhver ástæða fyrir því að við erum sífellt með flesta menn meidda tímabil eftir tímabil.

(FB)

7.Jan

Geremi á förum ?

Það lítur út fyrir að Geremi sé á leið frá Newcastle en hann hefur ekki fengið mörg tækifæri í byrjunarliðinu í vetur. Geremi Sorele Njitap Fotso eins og hann heitir fullu nafni hefur aðeins byrjað inná í 9 leikjum af þeim 23 sem liðið hefur spilað í deild og bikar. Þessi 30 ára gamli fyrrum leikmaður Chelsea og Real Madrid á eitt og hálft ár eftir af samningi sínum við Newcastle og samkvæmt ýmsum miðlum þá hefur Tyrkneska liðið Besiktas áhuga á að kaupa hann. Í viðtalið við Skysports sagði Geremi: "Ég er að nálgast endalok ferilsins og ég vill fá að spila, ég vill ekki sitja á bekknum leik eftir leik. Ég hef heyrt að lið í Evrópu hafi áhuga á mér en ég er að bíða og sjá hvað þeir ákveða að gera".

(FB)

7.Jan

Ameobi gerir þriggja ára samning

Shola Ameobi gerði í dag nýjan þriggja ára samning við Newcastle. Samningur hans rennur því út sumarið 2012. "Ég er mjög ánægður að hafa skuldbundið framtíð mína hér hjá Newcastle. Þetta er mitt heimalið og ég er ánægður að geta nú horft fram á veginn með Newcastle. Að komast í gott form og spila leiki er það sem mig langar að gera núna. Þeir hafa sýnt mér mikið traust og nú er það undir mér komið að endurgjalda það traust. Markmið mitt fyrir framtíðina er að halda mér í góðu formi og spila reglulega og sýna það form sem ég sýndi fyrr á þessu tímabili

sagði Ameobi á heimasíðu Newcastle. Það leit út fyrir að tími Ameobi (27 ára) hjá Newcastle væri búinn síðast sumar en hann hefur verið hjá liðinu í 13 ár og kom upp úr unglingastarfinu hjá Newcastle. Hann hefur spilað 182 leiki og skorað 31 mark með Newcastle. Hann á að baki 20 leiki og 7 mörk með Enska 21árs landsliðinu þrátt fyrir að vera fæddur í Nígeríu.

(FB)

6.Jan

Shay Given leikmaður desembermánaðar

Shay Given var með nokkra yfirburði í síðustu kosningu um leikmann mánaðarins. Þessi snjalli markmaður hefur nú verið hjá Newcastle síðan Kenny Dalglish keypti til liðsins árið 1997. Hann átti mjög góða leiki í desember og má þá helst nefna leikinn gegn Liverpool þar sem hann sýndi snilldartilþrif hvað eftir annað og bjargaði Newcastle frá enn stærra tapi en raun bar vitni. Hann varð skiljanlega mjög svekktur eftir umræddan leik og var mikið ritað um að hann vildi fara frá Newcastle nú í janúar. Við skulum bara vona að það verði ekkert úr því. Joe Kinnear hefur margoft sagt að hann vilji alls ekki missa hann því hann segir að Given sé besti markmaður úrvalsdeildarinnar og get ég alveg tekið undir þau ummæli.

Úrslit í kosningu um leikmann desembermánaðar eru svona:

Shay Given

59.7%

Sebastien Bassong

20.9%

Jonas Gutierrez

10.45%

Charles N´Zogbia

5.97%

Michael Owen

2.99%

Eins og sést hér til hliðar þá er komin aðeins betra fyrirkomulag á könnunni hjá mér og vonandi munu fleiri taka þátt en hafa gert hingað til.

(FB)

5.Des

Sannfærandi 3-0 sigur hjá varaliðinu

Varalið Newcastle tók á móti varaliði Bolton í kvöld á Witley Park og unnu okkar menn sannfærandi sigur 3-0. Þetta var aðeins annar sigur Newcastle á heimavelli í vetur en þeir eru um miðja deild. Það var Jonny Godsmark sem átti stórleik í kvöld og lagði hann upp tvö mörk fyrir sókarmennina Nile Ranger og Frank Wiafe Danquah og skoraði svo eitt sjálfur. Frank Wiafe Danquah spilaði sinn fyrsta leik í þrjá mánuði en hann hefur átt við meiðsli að stríða.

NUFC: Fraser Forster, James Tavernier, Darren Lough, Phil Airey (James Taylor, 46m) Jeff Henderson, Jonny Godsmark, Mark Doninger, Brad Inman (Conor Newton, 86m) Nile Ranger, Ryan Donaldson, Frank Wiafe Danquah.
Ónotaðir varamenn: Fabio Zamblera, Ole Soderberg, James Taylor, Conor Newton, Michael McCrudden.

(FB)

5.Jan

Varaliðið spilar í kvöld gegn Bolton

Eftir sex vikna hlé hefst deildarkeppni varaliðanna í kvöld kl 19:00 með leik Newcastle og Bolton á Witley Park heimavelli varaliðs Newcastle. Síðasti leikur varaliðsins var gegn Carlisle í bikarnum í desember og fóru okkar menn með 6-1 sigur af hólmi.

(FB)

5.Jan

Bikarleikur U18 færður til

Ungmennalið Newcastle átti að mæta QPR á St James´ Park í fjórðu umferð FA Youth Cup þann 14 janúar næstkomandi en þar sem aðallið Newcastle mætir Hull þetta sama kvöld í FA bikarnum, þá hefur leikur ungu strákanna verið færður til fimmtudagsins 15 janúar og hefst sá leikur kl 19:00.

(FB)

5.Jan

Fjórir leikmenn seldir ?

Samkvæmt fréttum í dag þarf Newcastle að selja leikmenn áður en þeir geta keypt menn til sín og hafa fjögur nöfn verið nefnd sem eru hugsanlega á förum frá Newcastle. Það eru þeir Charles N´Zogbia, Xisco, Jose Enrique og Alan Smith. Í viðtali við slúðurblaðið The Sun viðurkenndi Kinnear að hann þyrfti að selja einn til tvo leikmenn áður en hann gæti keypt leikmenn. "Einn kaup mun setja önnur kaup af stað, svo ég vona að þeir sem ætla að kaupa af okkur munu ákveða sig fljótlega. Ég vona bara að Mike Ashley muni ekki stinga upp á því að selja Shay Given" sagði Kinnear.

Það er sagt að spænsku liðin Getafe, Malaga og Real Betis hafi áhuga á Jose Enrique og spænska annara deildar liðið Salamanca hafi áhuga á Xisco. En hvort þessi séu til í að borga það sem Newcastle borgaði fyrir þessa tvo leikmenn (12 milljónir £) er ekki talið líklegt.

Þá hefur Barry Ferguson miðjumaður Rangers verið mikið orðaður við Newcastle undanfarið en spilaði með Blackburn í úrvalsdeildinni frá 2003-2005 og spilaði 36 leiki og skoraði 3 mörk. Hann hefur hinsvegar spilað 278 leiki með Rangers og skorað 42 mörk með skoska liðinu.

(FB)

4.Jan

Guðjón Þórðarson á St James´ Park ?

Dregið var í fjórðu umferð FA bikarsins í dag og munu sigurvegararnir úr leik Newcastle og Hull fá heimaleik gegn annaðhvort Millwall eða Crewe. Eins og menn vita þá tók Guðjón Þórðarson við Crewe nú um áramótin og stýrði þeim í fyrsta sinn í gær gegn Millwall í bikarnum og endaði sá leikur 2-2. Sá möguleiki er því í stöðunni að Guðjón mæti með lið sitt á St James´ Park í fjórðu umferð bikarins. Leikir í fjórðu umferðinni fara fram helgina 24/25 janúar næstkomandi.

Hér er svo drátturinn í heild

Hull/Newcastle - Millwall/Crewe

Liverpool - Everton
Man Utd - Tottenham
Sunderland/Blyth - Blackburn
Hartlepool - West Ham
Leyton Orient/Sheff Utd - Charlton/Norwich
Cardiff - Arsenal
Portsmouth/Bristol City - Histon/Swansea
Chelsea/Southend - Ipswich
Cheltenham/Doncaster - Aston Villa
West Brom/Peterborough - QPR/Burnley
Torquay - Coventry
Kettering Town - Fulham
Watford - Leicester/Crystal Palace
Derby County - Nottingham Forest
Birmingham City/ Wolves - Middlesbrough

(FB)

3.Jan

Hull City - Newcastle Utd 0-0

Jafntefli á KC Stadium

Liðin þurfa að mætast að nýju þann 14 janúar til að skera út um hvort liðið kemst áfram í fjórðu umferð bikarsins. Andy Carroll byrjaði inná í sókninni með Owen og var strákurinn bara nokkuð sprækur, hann þarf bara að fá að spila meira til að öðlast reynslu. Hann er nefnilega nokkuð sterkur og gefur ekkert eftir í návígjum. Newcastle fékk ágætis færi til að skora í dag, sérstaklega í fyrri hálfleik. Owen fékk tvö mjög góð færi og hefði átt að nýta allavega annað þeirra. Hann slapp nánast einn í gegn og vippaði boltanum yfir Matt Duke markmann Hull (sjá mynd) en boltinn fór framhjá markinu. Carroll fékk einnig gott færi en þá varði Duke frá honum. Hull átti sín færi einnig en Shay Given besti markmaður úrvalsdeildarinnar átti enn einn stórleikinn og varði allt sem á markið kom. Hull átti svo hættulegasta færi seinni hálfleiksins þegar Michael Turner skallaði í hausinn á Damien Duff og þaðan fór boltinn í innanverða slánna og beint í hendurnar á Given.

Jonas Gutierrez var á bekknum en kom inná á 36 mínútu fyrir N´Zogbia sem átti við smá meiðsli að stríða. Jonas var mjög sprækur og bæði í vörn og sókn enda geysilega vinnusamur leikmaður þar á ferð.

Jafntefli var niðurstaðan í dag og sennilega voru það sanngjörn úrslit þegar á heildina er litið.

Chris Houghton aðstoðarmaður Kinnear í viðtali eftir leikinn í dag: "Leikurinn varð mjög opinn eftir leikhlé og bæði lið áttu tækifæri til að vinna leikinn, en ég held að jafntefli hafi verið sanngjörn úrslit. Mér fannst við vera nokkuð betri í fyrri hálfleik og áttum betri færi en þetta var bara dæmigerður bikarleikur. En það var mjög mikilvægt eftir leikinn gegn Liverpool að halda hreinu í dag. Við búumst við erfiðum leik gegn þeim á St James´ Park. Þeir eru með gott lið og komu þangað fyrr í vetur og unnu okkur þar".

Um atvikið þegar Turner skallaði í slánna sagði Houghton: "Ég viðurkenni að mín fyrstu viðbrögð voru þegar ég sá alla hlaupa þá hélt ég að þeir væru búnir að skora. En þá sá ég viðbrögð okkar leikmanna og þeir voru á því að Duff hafði gert nokkuð vel, skallað boltann í slánna og í lúkurnar á Given".

Lið Newcastle: Given, Coloccini, Taylor, Bassong, Enrique, N´Zogbia (Jonas 36), Butt, Guthrie, Duff, Carroll, Owen.

Ónotaðir varamenn: Harper, Xisco, Geremi, Kadar, Edgar, LuaLua.

Gul spjöld: Butt, Jonas.

Skot á mark: Nufc 10(6) - Hull 13(8)

Hornspyrnur: Nufc 6 - Hull 2

Áhorfendur: 20,557.

Maður leiksins: Jonas Gutierrez (virkilega líflegur á vinstri kantinum, sérstaklega síðasta hálftímann.)

(FB)

2.Jan

Hull City - Newcastle Utd

3 umferð FA bikarsins

Joe Kinnear og lærisvænar hans fá það erfiða hlutverk að mæta spútnikliði úrvalsdeildarinnar Hull City á KC Stadium í þriðju umferð FA bikarsins á morgun kl 15. Það eru liðin 54 ár síðan Newcastle vann þennan titil síðast en það var árið 1955, þá sigraði Newcastle Man City 3-1 í úrslitaleiknum á Wembley fyrir framan 100 þúsund áhorfendur með mörkum frá Jackie Milburn, Bobby Mitchell og George Hannah. Miburn skoraði fyrsta mark leiksins eftir aðeins 45 sekúndur og var það met sem stóð í 42 ár.

En að leiknum á morgun, Nicky Butt, Jose Enrique og Shola Ameobi eru allir tæpir og kemur það í ljós í fyrramálið hvort þeir verða með eða ekki. Habib Beye, Mark Viduka, Obafemi Martins, Joey Barton, Cacapa, Alan Smith, Ignacio Gonzalez eru frá í lengri tíma og verða ekki með.

Habib Beye gæti verið frá í allt að 8 - 10 vikur eftir meiðslin sem hann varð fyrir í leiknum gegn Wigan.

Það styttist í endurkomu Joey Barton og er reiknað með að hann byrji að æfa um miðjan janúar og spila um mánaðarmótin. Það sama má segja um Alan Smith en hann hefur ekki enn spilað leik á þessu tímabili.

Martins, Viduka og Cacapa verða frá í tvær til þrjár vikur.

Sebastien Bassong kemur aftur inn eftir að hafa tekið út leikbann gegn Liverpool .

Joe Kinnear: "Við höfum þurft að sleppa æfingu til að forðast frekari meiðsli svo að við náum 11 mönnum heilum gegn Hull. Þetta er erfitt, en það er undir mér komið að gera þá klára fyrir leikinn hver svo sem mun spila. Það eru margir lykilleikmenn frá en ég mun stilla upp eins sterku liði og ég get gegn Hull. Þetta er mikilvægur leikur fyrir okkur og þetta er keppni sem mér finnst mjög gaman að taka þátt í. Kannski ættum við að vera með leikinn gegn West Ham í deildinni helgina eftir í huga en það eru ekki skilaboðin sem leikmennirnir fá frá mér. Við munum sækja gegn Hull og ætlum okkur sigur"

Þetta er í sjötta sinn sem þessi lið dragast saman í FA bikarnum og hefur Newcastle unnið fjórum sinnum og Hull einu sinni.

Þessi lið mættust í deildinni 13 september síðastliðin og sigraði Hull 1-2 með mörkum frá Marlon King. Það var svo Xisco sem minnkaði muninn í lok leiks.

(FB)

2.Jan

Kinnear ítrekar að Given er ekki á förum frá Newcastle

Það hafa verið fréttir í ýmsum netmiðlum þess efnis að Shay Given sé á förum frá Newcastle en Joe Kinnear ítrekar sinn vilja að halda honum á St James´ Park og hann muni byrja inná gegn Hull á morgun. "Við höfum engan áhuga á að selja hann og hann er ómissandi partur af liðinu. Hann æfði vel í dag og mun byrja inná gegn Hull. Ég ætla mér að halda í þá leikmenn sem munu halda okkur í úrvalsdeildinni. Ég átti langt samtal við Shay og hann vill gera sitt besta fyrir liðið" sagði Kinnear á blaðamannafundi fyrir leikinn gegn Hull.

(FB)

2.Jan

78755 innlit á heimasíðuna á árinu 2008

Á síðasta ári voru alls 78755 sem kíktu inn á heimasíðu Newcastle klúbbsins newcastleis.com eða 215 á dag að meðaltali. Það er örlítið betra en á árinu á undan (2007) en þá voru 75882 heimsóknir eða 207 að meðaltali á dag.

Flest innlit voru þann 16 janúar 2008 en þá voru 410 sem kíktu inn á síðuna. Það var einmitt dagurinn sem Kevin Keegan var ráðinn sem stjóri Newcastle. Langflestir af þeim sem skoða síðuna eru frá Íslandi en það eru einnig margar heimsóknir frá hinum ýmsu löndum eins og Bretlandi, Bandaríkjunum, Danmörku, Færeyjum, Svíþjóð, Noergi, Frakklandi, Hollandi, Þýskalandi, Kína og Spáni. Svo eru einnig heimsóknir frá Japan, Rúmeníu, Ítalíu, Rússlandi, Nýja Sjálandi, Írlandi, Ástralíu ofl.

Flestir þeir sem heimsækja síðuna nota Windows XP og Windows NT. Vafrarnir Internet Explorer og Firefox eru mest notaðir.

Vonandi munum gera enn betra á þessu ári og er markmiðið að fara yfir 80000 innlit á árinu 2009.

(FB)

1.Jan

Stuttar fréttir

# Nú þegar janúarglugginn hefur verið opnaður eru þó nokkrir leikmenn orðaðir við Newcastle. Kyle Naughton (20 ára) hægri bakvörður hjá Sheffield United er talin vera sá fyrsti sem Joe Kinnear muni festa kaup á. Naughton er sagður vera einn sá besti varnarmaður utan úrvaldeildarinnar og er metinn á um 1,5 milljónir.

# Papa Boupa Diop miðjumaður hjá Portsmouth er sagðu