Fréttir í maí 2008

5.Maí

Newcastle - Chelsea 0-2

                               (Ballack 61, Malouda 82)

Terry bjargar á línu eftir skot frá Owen 

Slakur seinni hálfleikur varð Newcastle að falli

Síðasti heimaleikur Newcastle á þessu tímabili fór fram í dag fyrir framan fullu húsi á St James´ Park (52,305) og voru það gestirnir í Chelsea sem tóku öll stigin sem í boði voru. Keegan hélt sig við sama byrjunarliðið og hann hefur gert undarfarið og byrjuðu okkar menn töluvert betur. Strax á fimmtu mínútu fékk Owen gott færi eftir að Butt átti góða sendingu á hann en hann hitti boltann illa og skaut yfir markið.

Obafemi Martins var mjög líflegur í sókninni og áttu varnarmenn Chelsea fullt í fangi með hann. Á 28 mínútu átti Newcastle sitt besta færi í leiknum þegar John Terry bjargaði á línu eftir skot frá Owen. Vörn Newcastle var virkilega sterk í fyrri hálfleik og fengu Drogba og Anelka ekki úr miklu að moða. En í seinni hálfleik var allt annað að sjá til gestanna, þeir voru töluvert betri og John Terry átti hörku skalla í slánna í byrjun seinni hálfleiks. Á 61 mínútu kom fyrsta mark leiksins en þá átti Drogba góða sendingu beint á kollinn á Ballack sem skallaði framhjá Harper í markinu og staðan því 0-1. Owen fékk ágætis færi til að jafna stuttu seinna þegar Butt átti skot að markinu en hann náði ekki til boltans. Chelsea gerði út um leikinn á 82 mínútu þegar Ballack, Essien og Lampard náðu frábæru spili saman og sem endaði með góðu marki frá Malouda og 0-2 sigur Chelsea staðreynd sem heldur enn í vonina um að verða Englandsmeistarar.

Keegan eftir leik: "Við vorum aðeins betri en þeir í fyrri hálfleik og sköpuðum okkur tvö góð færi sem nýttust ekki. En við misstum Viduka í hálfleik vegna meiðsla og hann spilar ekki síðasta leikinn gegn Everton. Ég sagði að þeir myndu mæta grimmir í seinni hálfleikinn og þeir gerðu það. Þeir voru betri og við hörfuðum til baka. Það var enginn Shaun Wright Phillips og enginn Ashley Cole hjá þeim og svo eru menn eins og Lampard, Alex, Joe Cole og Shevchenko á bekknum hjá Chelsea. Keegan bætti við "Chelsea yrðu verðugir meistarar en ég held að þeir verða það ekki, ég held að Man Utd muni taka titilinn, ég sé þá ekki gera nein mistök gegn Wigan um næstu helgi".

Lið Newcastle:

Harper, Beye, Taylor, Faye, Jose Enrique (N'Zogbia 77), Geremi (Duff 71), Butt, Barton, Viduka (Smith 46), Owen, Martins.
Varamenn: Forster, Cacapa.

Skot á mark: New 13 (5) - Che 18 (9)

Hornspyrnur: New 1 - Che 6

Gul spjöld: Faye, Enrique

Áhorfendur: 52,305

Maður leiksins: Steven Taylor (Átti mjög góðan leik í vörninni og stöðvaði margar sóknir hjá Chelsea)

(FB)

4.Maí

Hefur N´Zogbia spilað sinn síðasta leik fyrir Newcastle ?

Ekki hefur farið mikið fyrir Charles N´Zogbia á leikvellinum undarfarið með Newcastle. Hann vildi ólmur fara frá liðinu í janúarglugganum en Keegan sem var þá nýtekinn við stjórastarfinu vildi ekki selja hann þá. En hann hefur ekki verið í leikmannahóp Newcastle í undanförnum fimm leikjum þrátt fyrir að vera orðin heill eftir meiðsli sem hann hlaut í byrjun mars. Hann kom síðast við sögu í heimaleiknum gegn Fulham þann 22 mars þegar hann kom inná sem varamaður. Keegan sagði í viðtali við The Chronicle "Hann meiddist á slmæum tíma þegar liðinu var byrjað að ganga vel, sama má segja um Smith og Duff sem hafa ekki fengið mikið af tækifærum". Honum hefur verið sagt bæði af leikmönnum og mér að við viljum halda honum hér en hans hugur verður að vera með Newcastle". Keegan hefur ekki sagt að hann sé á förum. en hann virðist ekki vera inní myndinni þessa dagana hjá stjóranum. N´Zogbia skrifaði undir framlengingu á samningi sínum undir lok síðasta árs og rennur hann út árið 2012. Hann hefur verið orðaður við Arsenal og Tottenham.

(FB)

2.Maí

Newcastle - Chelsea

St James´ Park

(ATH) Mánudaginn kl 15:00 (ATH)

Síðast heimaleikur Newcastle á tímabilinu fer fram á mánudaginn þegar rússaveldið Chelsea kemur í heimsókn.

Það er svolítið furðulegur leiktími á leiknum gegn Chelsea, en hann er næstkomandi mánudag kl 15:00. Leikurinn var færður fyrir nokkrum vikum síðan og er það vegna beinnar útsendingar hjá Sky Sports. Það er frídagur hjá Englendingum á mánudaginn og er hann því um miðjan dag. Þetta verður mjög erfiður leikur fyrir okkar menn enda Chelsea í harðri baráttu við Man Utd um titilinn. Mark Viduka ætti að vera leikfær en hann á við smávægileg meiðsli í hásin að stríða. James Milner, Abdoulaye Faye, Cacapa og David Edgar eru orðnir klárir og verða í leikmannahópnum sem er svona:

Harper, Forster, Beye, Enrique, Taylor, Faye, Edgar, Cacapa, Butt, N'Zogbia, Duff, Barton, Geremi, Milner, Owen, Smith, Martins, Viduka, Carroll.

Leikur liðana á St James´ Park í fyrra fór 0-0 en fyrri leikur liðana í vetur endaði með sigri Chelsea 2-1, þar sem eitt mesta rangstöðumark sögunar gerði út um leikinn á lokamínútum leiksins. Chelsea hefur ekki unnið á St James´ Park síðan 2001 þegar Eiður Smári skoraði bæði mörk Chelsea. Steve Harper mun spila sinn 100 leik fyrir Newcastle í byrjunarliði. Newcastle hefur unnið þrjá síðustu heimaleiki sína Fulham (2-0), Reading (3-0) og Sunderland (2-0) og vonandi nær Harper að halda hreinu gegn Chelsea einnig.

Dómari leiksins verður Steve Bennett.

(FB)