Fréttir í sept 2008

15.Sept

Hver er líklegur til að kaupa Newcastle ?

Eins og komið hefur fram þá vill Mike Ashley selja Newcastle og eru nokkrir aðilar taldir líklegir til að kaupa félagið.

# Anil Ambiani  Indverjinn Ambiani og fyrirtæki hans (Reliance Group) hefur verið sterklega orðað við kaup á Newcastle undanfarið en er sagður hafa snúið sér að Everton. Sjötti ríkasti maður í heimi. 

Líkur: 7/10 - Gætu snúð sér aftur að Newcastle ef Everton dæmið gengur ekki upp.

# Microsoft  Bill Gates sem eigandi Newcastle ? The Sun greinir frá því að hann hafi áhuga á að kaupa sér eitt stykki fótboltalið. Einn ríkasti maður í heimi.

Líkur 3/10 Ekki miklar líkur á þessu.

# DIC  Dubai International Capital hefur áður verið orðað við kaup á Newcastle en voru taldir líklegir að kaupa Liverpool. En þar sem Ashley vill ólmur selja eru þeir taldir hafa mikinn áhuga á að kaupa Newcastle. Eiga sand af seðlum.

Líkur: 9/10 Lang líklegastir eins og staðan er í dag. 

# Xu Rongmao  Kínverji sem leiðir samsteypu sem hafa áhuga á að kaupa Newcastle. Ekki er mikið vitað um Rongmao en hann eins og hinir er talin eiga nóg af peningum.

Líkur: 6/10 Áætlanir hans eru ekki á hreinu og er hann því ekki talinn líklegur.

# Aðdáendur Mike Ashley bauð aðdáendum Newcastle að kaupa félagið og reka það. Það hljómar kannski vel en myndi aldrei ganga upp.

Líkur: 2/10 Fín hugmynd en mun aldrei gerast.

Fleiri hafa verið nefndir til sögunnar eins og Freddy Shephard, InterMedia Partners, Ken Bates, Polygon Investment Parners ofl. en það verður spennandi að fylgjast með framgangi mála á næstu dögum.

(FB)

14.Sept

Yfirlýsing frá Mike Ashley: "Newcastle til sölu"

Mike Ashley eigandi Newcastle hefur sent frá sér yfirlýsingu þess efnis að hann vilji selja félagið. Samband hans við stuðningsmenn hefur verið frekar slæmt undanfarna daga og í gær hefur hann fengið nóg eftir mikil mótmæli fyrir utan St James´ Park og á leiknum í gær. Hann sendi frá sér yfirlýsingu á heimasíðu Newcastle í dag þar sem hann útskýrir sín sjónarmið. ,,Félagið er til sölu. Ég vona að stuðningsmennirnir fái það sem þeir vilja og að næsti eigandi sé einhver sem getur eytt þeim peningum í félagið sem stuðningsmennirnir vilja,"

,,Ég ber hag Newcastle fyrir brjósti. Ég hef hlustað á ykkur. Þið viljið mig burt og það er það sem ég er að reyna að gera en það gerist ekki á einni nóttu og það gæti alls ekki gerst ef að enginn kaupandi kemur," segir Ashley meðal annars í yfirlýsingu sinni. Hana má lesa í heild sinni hér á ensku.

(FB) 

13.Sept

Newcastle - Hull City 1-2

(Xisco 82) - (King 34 vsp, 55)

Newcastle hörmulega slakir í dag

Ekki hélt ég að ég ætti eftir skrifa um að Newcastle hefði tapað fyrir Hull City á St James´ Park, en það gerðist nú samt í dag. og það sem meira er að sigurinn var sanngjarn, leikmenn Hull höfðu miklu meiri áhuga á að vinna þennan leik en leikmenn Newcastle. Það má vera að mótmæli áhangenda bæði fyrir utan St James´ Park fyrir leik og á leiknum sjálfum hafi haft áhrif á leikmenn sem virtust gjörsamlega ekki í sambandi. Newcastle náði ekki að skapa sér mikið af færum en Danny Gurthrie fékk þó besta færi heimamanna í fyrri hálfleik en hitti boltann illa. Hull fékk svo vítaspyrnu á silfurfati og Marlon King nýtti vítaspyrnuna en Given var ekki langt frá því að verja spyrnu hans. King var svo aftur á ferðinni á 55 mínútu þegar vörn Newcastle svaf fasta svefni, King slapp einn í gegn og átti hann ekki í miklum erfiðleikum að skora annað mark Hull. Danny Guthrie átti svo skot á slánna stuttu seinna en það var ekki fyrr en á 82 mínútu að Xisco sem var að spila sinn fyrsta leik skoraði af stuttu færi eftir að N´Zogbia átti skot í stöngina. Newcastle náði ekki að skapa sér hættulegt færi á loka mínútum leiksins. Danny Guthrie hagaði sér svo eins og asni á lokamínútu leiksins þegar hann sparkaði viljandi í lappir Craig Fagan leikmann Hull og fékk rautt spjald að launum. Hann mun væntanlega fá þriggja leikja bann fyrir þetta brot.

Lið Newcastle:

Given, Edgar (Bassong 68), Taylor, Coloccini, N'Zogbia, Geremi, Butt, Guthrie, Xisco, Owen, Ameobi (Gonzalez 61).
Varamenn: Harper, Cacapa, Danquah, Doninger, Donaldson.

Rautt spjald: Guthrie

Lið Hull:

Myhill, McShane, Turner, Gardner, Dawson, Mendy (Folan 73), Marney (Hughes 78), Ashbee, Halmosi, King (Zayatte 83), Fagan.
Varamenn: Duke, Windass, Geovanni, Ricketts.

Gul spjöld: Folan, Halmosi

Skot á mark: Nufc 13 (4) - Hull 8(4)

Horn. Nufc 5 - Hull 3

Áhorfendur: 50.242

Dómari leiksins: Andre Marriner

Maður leiksins: Xisco (Barðist nokkuð vel og skoraði mark í sínum fyrsta leik.)

(Mótmæli stuðningsmanna á St James´ Park)

Það voru mikil mótmæli fyrir leikinn í dag og beindust þau gegn Mike Ashley og Dennis Wise sem eru sennilega óvinsælustu menn í Newcastle. Mér finnst það alveg óskiljanlegt að skoðanir Dennis Wise skuli vera teknar fram yfir King Kev og það er alveg svakalega pirrandi að enn eitt tímabilið er komið í algjört rugl. Eini stjórnarmaðurinn sem lét sjá sig í stúkunni var Derek Llambias stjórnarformaður og ekki sást til bjórþambarans Mike Ashley.

(FB)

12.Sept

Newcastle - Hull City

11.Sept

Stuttar fréttir

# Jonas Gutierrez meiddist á öxl í leik Argentínu og Perú  í gær og er óvíst hvort hann verður með gegn Hull. Hann þurfti að fara af velli eftir aðeins 16 mínútur og var talið í fyrstu að hann hefði farið úr axlarlið en upplýsingafulltrúi Argentínu Anders Ventura taldi meisðlin ekki vera alvarleg en hann þarf að fara í frekari læknisskoðun til að meta hversu alvarleg meiðslin eru. Leikurinn endaði 1-1.

# Mike Ashley ætlar ekki að vera á meðal áhorfenda á leiknum gegn Hull, hann ætlar heldur að vera í boxi stjórnarmanna.

# Guus Hiddink þjálfari Rússneska landsliðsins og Dick Advocat stjóri Zenit eru sagðir vera á lsitanum yfir næsta stjóra hjá Newcastle. 

# Slaven Bilic þjálfari Króata sagði eftir leik þeirra gegn Englendingum að hann hefði ekki áhuga á að taka við Newcastle. Hans hugur er með Króatíska landsliðinu. 

(FB)

9.Sept

9.Sept

Zico og Gus Poyet líklegir

Þeir sem eru líklegastir í stjórastarfið hjá Newcastle eru Brasilíumaðurinn Zico og Gus Poyet frá Uruguay aðstoðarþjálfari Tottenham. Allmargir hafa verið nefndir sem eftirmaður Keegan og má þar nefna Fatih Terim, Slaven Bilic, Gerard Houllier, Frank Rijkard, Roberto Mancini, Didier Dechamps ofl. Zico segir í viðtali á Sky Sports að hann hafi mikinn áhuga á að taka við stjórastarfi Newcastle. "Ég hef alltaf haft áhuga á úrvalsdeildinni og ég hef trú á að ég nái góðum árangri í Englandi. Stjórastarfið hjá Newcastle er eitthvað sem ég hefði mikinn áhuga á að taka að mér. Ég er vanur að vinna með yfirmanni fótboltamála (technical director) þannig að það er ekki vandamál að minni hálfu" sagði Zico sem er stjóri tyrkneska liðsins Fenerbahce. En það segja margir miðlar frá því að Gus Poyet sé næsti stjóri Newcastle og hefur hann átt í viðræðum við Tottenham um að losna þaðan.

Stuðningsmenn Newcastle vilja ekki sjá Mike Ashley á áhorfendapöllunum á leikjum og allra síst í Newcastle treyjunni. Hann hefur verið að grafa sína eigin gröf með aðgerðum sínum undanfarna daga. Á myndinni má sjá mótmælaaðgerðir stuðningsmanna fyrir utan St James´ Park sem eru ekki sáttir við gang mála og hafa ritað á borðann "Ashley not so Wise"

(FB)

8.Sept

McDermott og Sadler látnir fara

Terry McDermott og Adam Sadler voru í dag látnir fara frá félaginu. McDermott var aðstoðarmaður Keegan og Sadler þjálfaði varaliðið.Þá hefur Chris Houghton tekið við Newcastle tímabundið.

Richard Money og Alan Thompson úr akademíu Newcastle munu vera honum til aðstoðar. McDermott kom fyrst til Newcastle árið 1992 þegar Keegan tók við í fyrra skiptið og var einnig þegar Kenny Dalglish tók við. Hann var svo látin taka pokann sinn þegar Ruud Gullit (1998) tók við af Dalglish. Það var svo Graeme Souness sem fékk McDermott til að koma aftur til Newcastle árið 2005 og hefur hann starfað hjá Newcastle þar til dagsins í dag. Adam Sadler tók við varaliðinu af Lee Clark í janúar á þessu ári en hann hafði starfað hjá akademíu Newcastle.Þeir eru báðir miklir stuðningsmenn Kevin Keegan.

Mike Ashley heldur áfram að gera í buxurnar og er nokkuð ljóst að hann lætur ekki sjá sig í stúkunni á næstunni enda orðinn óvinsælasti maðurinn í Newcastle.

(FB)

7.Sept

Given: "Ringulreið hjá Newcastle"

Shay Given hefur áhyggjur af ástandinu sem er þessa dagana hjá Newcastle. Keegan segir óvænt af sér og Mike Ashley gagnrýnir Keegan harðlega í yfirlýsingu í gær. Keegan svarar svo gagnrýninni, þannig að skotin ganga manna á milli. Given sem hefur spilað í 11 ár með Newcastle segir að liðið verði að ná sér á strik aftur. "Já ég var virkilega  undrandi. Hann er frábær stjóri og frábær náungi. Hans verður virkilega saknað hjá bæði hjá leikmönnum og aðdáendum. Við viljum allir liðið taki framförum og vonandi gerum við það. Við viljum allir að félagið nái sér á strik og taki skref í rétta átt. En í augnablikinu er ringulreið hjá félaginu". Sagði Given í viðtali á Sky Sports.

Og til að bæta gráu ofan á þá fékk Joey Barton 6 leikja bann fyrir árásina á Ousmane Dabo fyrir einu og hálfu ári síðan. Hann fær þó aðeins sex leikja bann til að byrja með, en ef hann brýtur aftur á sér þá fær hann sjálfkrafa auka sex leiki til viðbótar í bann.

(FB)

5.Sept

Ný könnun

Hver verður næsti stjóri Newcastle ?  Er spurningin í könnunni og eru þeir menn sem nefndir eru hér í fréttinni hér að neðan í boði.

Í síðustu könnun var spurt "Viltu Mike Ashley og stjórn hans í burtu ?" og var niðurstaðan nokkuð afgerandi, 70% vildu fá Mike Ashley og hans menn í burtu en 30% vildu gefa honum lengri tíma.

(FB)

5.Sept

Hver er næstur ?

Þetta er orðið á hverju tímabili sem maður þarf að velta þessari spurningu fyrir sér "hver verður næsti stjóri Newcastle ?" Það geta ekki verið margir sem vilja taka þetta starf að sér ef vinnubrögðin eru þannig að stjórinn hafi lítið sem ekkert að segja varðandi leikmannakaup og sölur. Dennis Wise og Mike Ashley eru sennilega óvinsælustu menn í Newcastle þessa dagana og þeirra bíður erfitt verkefni í að finna eftirmann King Kev. Þeir sem hafa verið nefndir til sögunnar eru David Moyes, Didier Deschamps, Alan Shearer, Gustavo Poyet og Dennis Wise.

(FB)

5.Sept

Keegan hættur

Kevin Keegan er hættur sem stjóri Newcastle eftir aðeins átta mánuði í starfi. Framtíð hans hefur verið í mikilli óvissu síðustu daga en nú í dag er það staðfest að hann sé hættur. "Ég hef lagt mjög hart að mér til að finna leið fram á við með stjórnarmönnunum en því miður hefur það ekki reynst mögulegt," sagði Keegan í yfirlýsingu sem hann sendi frá sér í dag. ,,Það er mín skoðun að knattspyrnustjórar verði að hafa réttinn til að stjórna og að félagið eigi ekki að þröngva leikmanni upp á stjórann sem hann vill ekki fá..Það er mín heitasta ósk að Newcastle United muni vegna vel í framtíðinni og ég er mjög leiður fyrir hönd leikmannanna, starfsfólksins og aðallega stuðningsmannanna. Ég á ekki annars kostar völ en að hætta" sagði Keegan í yfirlýsingu sinni.

Það er alveg ljóst að það verður mikil óánægja með þessi málalok og sagt er að stuðningsmenn Newcastle muni ekki mæta á næsta leik til að mótmæla Mike Ashley og stjórn Newcastle.

Mín skoðun er að þetta fer að verða ansi þreytandi, þessi sápuópera sem er alltaf í gangi hjá Newcastle.Að vera sífellt að skipta um stjóra er ekki boðlegt fyrir lið í efstu deild. Það næst aldrei árangur með þetta lið með svona rugli. Til dæmis er Charles N´Zogbia nokkrum öðrum leikmönnum að fá sinn sjötta stjóra á fjórum árum !!!!! Sir Bobby Robson 2004 (rekinn), Souness 2004/06 (rekinn), Glen Roeder 2006/07 (rekinn), Sam Allardyce 2007/08 (rekinn), Kevin Keegan 2008 (hættur) og svo kemur einhver nýr stjóri á næstu dögum væntanlega.

Mike Ashley og stjórn hans með Dennis Wise í fararbroddi hafa heldur betur gert í buxurnar og vonandi mun einhver koma með kauptilboð í Newcastle og koma þessum pappakössum sem lengst í burtu.

Enn eitt tímabilið komið í algjöra steypu og maður sér fram á strögl í vetur. Og ef Ashley ræður Wise sem stjóra þá yrði ég gjörsamlega orðlaus. Það skal tekið fram að þetta er ritað í smá reiðikasti og það gæti tekið nokkra daga að renna af mér.

Sælir að sinni

(FB)

4.Sept

Aldrei fleiri heimsóknir

Á þriðjudaginn síðasta (2 sept) var aðsókarmet á Newcastleis.com slegið. Alls voru 484 sem kíktu á síðuna og var fyrra met slegið frá 8 ágúst 2007, en þá voru 455 sem kíktu inn á síðuna. Það má reikna með því að dramtíkin sem er nú í gangi hjá Newcastle hafi mikið að segja hvað þetta met varðar en aðsókn á síðuna hefur engu að síður farið vaxandi á undanförnum vikum. Að meðaltali voru 210 á dag sem kíktu á síðuna í ágústmánuði en það sem af er september eru 401 sem hafa sótt síðuna að meðaltali.

Þetta er ánægjulegt að sjá enda hef ég lagt mikla vinnu í að halda síðunni vel uppfærði. Ég myndi samt vilja að Newcastle menn væru svolítið duglegri að tjá sig á spjallborðinu. Ég trúi ekki öðru en að menn hafi sínar skoðanir á því sem er að gerast hjá Newcastle þessa dagana.

TOON ARMY

(FB)

3.Sept

Önnur yfirlýsing frá Newcastle

Ný yfirlýsing var send frá Newcastle nú fyrir stundu og er hún svona: "Newcastle United getur staðfest að viðræður eru í gangi milli stjórnarinnar og Kevin Keegan. Bæði félagið og Kevin vilja ítreka að Kevin er enn stjóri liðsins. Hann er ekki hættur og honum hefur ekki verið sagt upp störfum, eins og staðfest hefur verið af viðkomandi yfirlýsingu frá Kevin og Newcastle United."

Það er greinilega mikið í gangi hjá Newcastle og við skulum vona að málið leysist á farsælan hátt og að Keegan verði áfram stjóri hjá Newcastle.

(FB)

3.Sept

Ungu strákarnir við það að snúa til baka

Adam Sadler þjálfari varaliðs Newcastle vonast til að fá Tamas Kadar og Andy Carroll í lið sitt fljótlega. Kadar sem kom til Newcastle í janúar stóð sig mjög vel á síðasta tímabili en hann meiddist á hné undir lok tímabilsins og hefur ekkert spilað síðan þá. "Hann er bara rétt byrjaður að skokka en það styttist í að hann fari að sparka í bolta. Andy Carroll er einnig byrjaður að skokka. Líkamsstyrkur Andy og reynsla Tamas mun bara auka styrk liðsins og það mun verða meiri samkeppni um stöður í liðinu, þannig að það er mjög ánægjulegt að fá þá til baka" sagði Adam Sadler að lokum,

(FB) 

2.Sept

Xisco: "Frábært að vera komin til Newcastle"

Spánverjinn Xisco sem Newcastle keypti á lokadegi félagskiptagluggans segir í viðtali á heimasíðu Newcastle að hann sé mjög ánægður að vera komin til Newcastle. Xisco sem er 22 ára gerði fimm ára samning segir: " Ég hef beðið eftir þessu tækifæri í langan tíma og ég vill sýna hvað í mér býr. Ég elska úrvalsdeildina og hún hentar mér vel. Mig hlakkar til að hitta liðsfélagana. Ég þekki þá Colo og Jose Enrique vel, ég talaði við Colo og hann sagði mér allt um klúbbinn og borgina. Það eru líka fleiri spænskumælandi þarna og það mun hjálpa mér í fyrstu. En ég ætla að læra enskuna á næstu mánuðum svo ég kynnist öllum hér betur" sagði Xisco að lokum.

(FB) 

2.Sept

Ný könnun

Það er komin ný könnun og er spurt hvort menn vilji fá Mike Ashley og hans hafurtask í burtu frá félaginu. Í síðustu könnun var spurt hvort menn vildu semja vil Owen og var niðurstaðan þannig að 86% vildu semja við hann en 14% vildu losna vil hann.

(FB)

2.Sept

Yfirlýsing frá Newcastle "Keegan ekki rekinn"

Stjórn Newcastle sendi út yfirlýsingu varðandi Kevin Keegan nú fyrir stundu og þar kemur fram að það hafi verið haldnir fundir með Keegan í gær og í dag. Klúbburinn vill halda áfram langtímaáætlun sinni og leggur áherslu á að Keegan er mjög mikilvægur fyrir Newcastle, bæði núna og fyrir framtíðina. Newcastle metur mikið það sem Keegan hefur gert fyrir klúbbinn frá því hann snéri aftur til St James´ Park. og vill að hann haldi áfram því starfi sem stjóri félagsins. Til að taka allan vafa af þá hefur Kevin Keegan EKKI verið rekinn sem stjóri Newcastle.

Það á svo eftir að koma í ljós hvort Keegan heldur áfram sem stjóri. Hann gæti hætt, enda eru greinileg ósætti milli hans og stjórn félagsins. 

(FB) 

2.Sept

Keegan hættur ?

Ýmsir netmiðlar hafa greint frá því að Kevin Keegan sé hættur sem stjóri hjá Newcastle. Keegan hefur setið á fundi með stjórnarmönnum Newcastle í allan morgun í stað þess að stjórna æfingu liðsins, en hann er afar ósáttur við stefnu stjórnarinnar í leikmannamálum. Enn eru þessar fréttir óstaðfestar og beðið er eftir yfirlýsingu frá Newcastle. BBC greinir frá því að Keegan sé hættur með Newcastle eftir aðeins átta mánuði við stjórnvölin. Keegan er sagður ósáttur við hvað hann hefur litla stjórn á leikmannakaupum og sölum, þó sérstaklega varðandi söluna á James Milner. Reiðir stuðnigsmenn Newcastle hafa safnast saman fyrir utan St James´ Park og mótmælt brottför Keegan enda er hann geysilega vinsæll í Newcastle.

(FB)

1.Sept

Félagskiptaglugganum lokað

Nú hefur félagskiptglugganum verið lokað og staðfestar fréttir eru að Newcastle náði að landa tveimur leikmönnum, einn keyptur og annar fengin að láni út tímabilið. Sóknarmaðurinn Xisco (22 ára Spánverji) var keyptur frá spænska liðinu Deportivo La Coruna og miðjumaðurinn "Nacho" Gonzalez (26 ára frá Uruguay) ára var fenginn að láni frá Valencia

(FB)

1.Sept

Síðasti dagur félagskiptagluggans

Nú er síðasti dagur félagskiptagluggans og verður fróðlegt að sjá hvort Keegan næli í þessa 3 - 4 leikmenn eins og hann talaði um í síðustu viku. Sett verður inn helstu tíðindi hvað varðar leikmennakaup en það er mikið af sögusögnum í dag. Sett verður "Staðfest" fyrir aftan fréttina ef satt reynist.

Kl:23:30 Newcastle hefur keyptsóknarmanninn Xisco frá Deportivo La Coruna. Þessi 22 ára Spánverji gerði fimm ára samning við Newcastle og hefur fengið úthlutað númerið 19 hjá Newcastle. Hjá Newcastle hittir hann Coloccini, fyrrum liðsfélaga sinn frá Deportivo. Kaupverð er ekki uppgefið, en það er talið vera um rétt undir 6 milljónum punda. STAÐFEST

Kl:22:30 Joey Barton segir í viðtali á Sky Sports að hann ætli að vera áfram hjá Newcastle. Hann hafði verið orðaður við Aston Villa og Portsmouth en segist skulda Newcastle að vera áfram hjá þeim. "Ég vill ekki fara frá Newcastle vegna þess að ég skulda þeim og aðdáendum þeirra svo mikið vegna þess hvað ég hef sett þá í gegnum undanfarið".

Kl:19:40 Feyenoord hefur boðið 1,5 milljónir punda í hollenska markmanninn Tim Krul hjá Newcastle.

Kl:19:30 Joey Barton gæti verið á förum frá Newcastle. Aston Villa og Portsmouth eru sögð vilja fá þennan vandræðagemling til sín.

Kl.12:55 Everton vill fá Michael Owen til sín og ætla að bjóða 6 milljónir punda í hann.

Kl:12:30 Ignacio Gonzalez er kominn til Newcastle á láni frá Valencia. "Nacho" eins og hann er kallaður verður í láni út þetta tímabil. Nacho er 26 ára og leikur á miðjunni. STAÐFEST

Kl:08:40 Alan Smith er sagður vera á leið til Everton fyrir 3 milljónir punda.

Kl:08:25 Xisco 22 ára sóknarmaður Deportivo La Coruna er sagður vera á leið til Newcastle fyrir 5,7 milljónir punda.  Francisco Jiménez Tejada eins og hann heitir fullu nafni hefur verið orðaður við Aston Villa en Newcastle virðist ætla hafa betur í baráttunni um hann. Xisco hefur gert 12 mörk í 44 leikjum með Deportivo. Hann á 4 leiki með U21 landsliði Spánverja og hefur skorað eitt mark.

(FB)