Newcastle Klúbburinn á Íslandi

Aðsent efni: Júlíus Ólafsson 15.04 2006

Þeir bestu 2005-2006

Þá er komið að því að kynna úrslit kosningar newcastle.is um besta leikmann Newcastle á tímabilinu. Þátttaka fór alls ekki fram úr vonum en það ber að þakka þeim sem greiddu atkvæði. Hér eru kynntir leikmenn í fimm efstu sætum en einnig greint frá þeim sem fengu færri atkvæði. Newcastle klúbburinn á Íslandi veitir leikmanni ársins og þeim efnilegasta viðurkenningu fyrir leik Newcastle gegn Wigan á SJP þann 15. apríl. Þá verður einnig veitt viðurkenning fyrir mark ársins.

1. Shay Given
Það finnst líklega mörgum löngu orðið tímabært að heiðra írska galdramanninn. Shay hefur verið einn besti maður Newcastle mörg síðustu tímabil og þó að þetta tímabil teljist ekki með þeim betri hjá félaginu hlýtur það að teljast með þeim bestu hjá Shay. Það er í raun ótrúlegt hve oft hann hefur bjargað með frábærri markvörslu og það er á hreinu að stigin væru færri ef Shay hefði ekki verið í svo góðu formi. Shay er lægstur markvarða í úrvalsdeildinni en engu að síður ver hann meira en flestir aðrir. Hann er algjör fagmaður, einstaklega vel liðinn af öllum sem vinna með honum. Hann er glæsilegur fulltrúi klúbbsins, jafnt innan vallar sem utan.
Samningur Shay hjá Newcastle rennur út eftir næsta tímabil en hann hefur alltaf sagt að hann vilji helst vera áfram hjá félaginu. Hann segist þó vilja bíða eftir að nýr stjóri sé ráðinn og heyra hvaða framtíðarplön verði lagt upp með. Vonandi verður svo samið við hann í sumar því Shay á líklega bestu árin sín framundan. Það væri frábært að njóta krafta hans nokkur ár í viðbót eða þar til Tim Krul hefur tekið út nægan þroska og er klár í slaginn. Það hlýtur að vera eitt af forgangsverkefnum Freddy Shepherd að semja við Shay.
Shay er í raun hinn fullkomni markvörður. Hann er einn þeirra fáu sem virðast verja allt það sem þeir eiga að verja og svo á hann þessar mögnuðu vörslur að auki. Það er einmitt einkenni bestu markvarðanna að gera fá mistök. Allir kannast við markverði sem verja stórkostlega en fá svo á sig hroðaleg klaufamörk og missa inn bolta sem þeir hefðu átt að hirða. Shay er ekki í þeim hópi.
Shay háði nokkuð harða keppni við Scott Parker í valinu um besta leikmann tímabilsins en seig vel framúr á lokasprettinum. Hann hlýtur viðurkenningu frá Newcastle klúbbnum á Íslandi fyrir leikinn gegn Wigan í dag. Þar fær Alan Shearer einnig viðurkenningu fyrir mark ársins og Charles N’Zogbia fyrir að vera efnilegasti leikmaður Newcastle. Shay þakkar svo vonandi fyrir sig með því að halda hreinu.

2. Scott Parker
Flestir eru á því að það hafi verið með bestu verkum Graeme Souness að næla í Scott Parker frá Chelsea. Scotty hafði fengið nóg af varaskeifuhlutverki á Stamford Bridge og fékkst meira að segja á nokkuð góðu verði. Scott var fljótur að vinna hug og hjörtu Toon hersins með öflugri frammistöðu á miðjunni. Toon herinn hefur ávallt kunnað að meta menn eins og hann, menn sem gefa alltaf allt sitt í hvern einasta leik og í hverja einustu tæklingu. Scott hefur að vísu ekki gengið eins vel að setja mörk og menn hafa kannski vonað. Hans fyrsta mark fyrir klúbbinn var í raun algjör tilviljun en fyrsta deildarmarkið var magnað, þrumufleygur gegn hans gömlu félögum í Charlton á dögunum. Eftirminnilegastur er leikurinn gegn Arsenal á SJP. Þá barðist Scotty þangað til hann var studdur af velli, búinn að missa tennur í átökunum og sannarlega leggja sitt að mörkum til að leggja Lundúnaliðið. Scotty verður ekki meira með á tímabilinu en kemur áreiðanlega öflugur inn næsta haust. Hann ætti að eiga sín bestu ár eftir í boltanum og það verður gott að hafa hann hjá Newcastle. Hann hefur oft staðið upp úr í leikjum, ekki síst þegar illa hefur gengið.

3. Alan Shearer
Stóri Al á engan sinn líka. Hann hlaut að ljúka ferlinum á einhverju eftirminnilegu. Markamet Newcastle féll á tímabilinu og það er líklega það öðru fremur sem tryggir honum þriðja sæti í kjörinu hér. Alan hefur ekki notið góðrar þjónustu í ár og oft verið í vonlítilli baráttu frammi heilu og hálfu leikina. Það dylst samt engum sem kann gott að meta að hér fer sannur meistari knattspyrnunnar. Alan hefur verið einstakur leiðtogi fyrir lið Newcastle, ótrúlegur baráttumaður sem ávallt leiðir sitt lið af skynsemi og markaskorari af Guðs náð. Eins og alltaf hefur hann átt nokkra ógleymanlega leiki og fantafín mörk. Og eins og alltaf hefur hann dregið vagninn þegar verst hefur gengið. Hann hefur alltaf staðið upp og látið finna fyrir sér þó að aðrir leikmenn hafi nánast gerst sekir um að fara í felur. Það verður vonlaust að fylla skarð hans en vonandi á meistarinn eftir að þjóna klúbbnum í framtíðinni. Það er á hreinu að menn eiga eftir að sakna þess að sjá hann ekki leiða lið sitt á næsta tímabili. Á morgun verður Alan heiðraður af Newcastle klúbbnum á Íslandi. Hann fær viðurkenningu fyrir mark ársins (mark númer 201) sem hann gerði í leik gegn Portsmouth. Við skulum njóta þess að fá að fylgjast með honum með Newcastle í þeim fimm leikjum sem eftir eru.

4. Nolberto Solano
Það urðu víst margir kátir að fá gamla góða Nobby aftur á Tyneside. Karlinn kom að vísu laskaður en það skyggði ekki nema rétt aðeins á gleðina. Nobby var kannski dálítið seinn í gang en ekki leið þó á löngu áður en hann var farinn að sýna góða takta, mata samherja á fínum sendingum og gera falleg mörk. Souness var ekkert að flýta fyrir því að hressa karlinn og lét hann ekki hafa nægilegt vægi á vængnum en Roeder má eiga það að Nol hefur fundið sig miklu betur eftir að hann tók við. Nobby er kannski ekki eins fljótur og þegar hann var upp á sitt besta en leikskilningurinn er svo sannarlega til staðar og töframátturinn enn í skónum. Það besta við Nobby er einmitt það hve mikið og skemmtilegt spil skapast iðulega í kringum hann. Það var gott að fá þennan ættleidda son aftur í Geordieland eftir útlegð í Birmingham og vonandi á hann eftir að standa sig a.m.k. eitt tímabil enn. Það verður alltaf þörf fyrir góða boltaheila á borð við Nobby.

5. Charles N’Zogbia
Hinn ungi Charles hefur verið einn af ljósu punktunum á Tyneside í vetur. Zog hefur fengið stærra hlutverk en ætla mátti í byrjun tímabils og sannarlega slegið í gegn. Hann er ávallt hættulegur sóknarlega og hefur farið illa með marga varnarmennina. Hann hefur lagt upp mörg mörk eftir góða spretti upp vinstri vænginn og greinilegt að hann hefur afar gott auga fyrir sendingum inn á teig. Hann hefur líka bætt varnarleikinn upp á síðkastið. Þá hefur strákurinn sett góð mörk og þar stendur upp úr frábært mark gegn Blackburn þar sem hann gabbaði Brad Friedel algjörlega upp úr skónum. Þessi ungi Frakki hlýtur að teljast með efnilegri leikmönnum ensku úrvalsdeildarinnar og útkoma hans í kosningunni hér tryggir honum titilinn efnilegasti leikmaður Newcastle 2005-6 að mati lesenda newcastle.is. Charles fær viðurkenningu frá klúbbnum fyrir leikinn gegn Wigan þann 15. apríl.

Þessir voru með:
Shola Ameobi, Peter Ramage og Emre fengu allir atkvæði í kjörinu þó ekki væru þau mörg.
Shola hefur staðið fyrir sínu á tímabilinu þó skoðanir séu enn sem fyrr mjög skiptar varðandi ágæti hans. Flestir hljóta að minnast frábærrar frammistöðu hans í heimaleiknum gegn Sunderland en þar fór drengurinn á kostum og gerði tvö góð mörk.

Ramage hefur sannarlega staðið sig vel. Fyrir tímabilið var þessi drengur óreyndur en hlutverk hans hefur verið stórt. Ramage hefur oftast spilað ágætlega og stundum verið eini ljósi punkturinn í slakri vörn. Það er svo spurning hvort drengurinn nær að stíga skrefið upp á við og verða fastamaður á næstu árum.

Miklar vonir voru bundnar við Emre enda feikilega snjall leikmaður þar á ferð. Segja má að Tyrkinn hafi ekki alveg náð að standa undir væntingunum en meiðsli settu strik í reikninginn. Toon herinn kann vel að meta vinnusemina og dugnaðinn í þessum smávaxna leikmanni og vonandi nær hann að stimpla sig enn betur inn á næsta tímabili.